2 ATEPTAP PEETUUSYEK 17 - BUKUIT NE TILIIL Sireet ne Dutero Kanon

Laitornatetap Jehoshaphat

¹ Ki laitoran weeriinnyi Jehoshaphat kogeer ineendet ak kogimitkei kobargei ak Israel.

² Ki inde lugoosyek nganasook tugul che ng'ootaatiin che po Judah, ak konde riibiik emetap Judah, ak nganasoogap Ephraim, che kiga rep kwandanyi Asa.

³ Ki mi Kamuktaindet ne Toroor ak Jehoshaphat amu kiwendote ortinwek che po tai che po kwandanyi Daudi. Ki ma cheeng' `ineendet Baalik,

⁴ ago ki cheeng' Kiptaiyat Kamuktaindetap kwandanyi ak kowendote ng'atuutikyik, ama isup tuguuk che ki yai Israel.

⁵ Ki igimit anyun Kamuktaindet ne Toroor laitornatet eng' eunnyi. Ki ipchi piik tugul che po `Judah Jehoshaphat kagoochinoik, ak ki tinyei mogornateet eng' chaang'indo ak teegisto.

⁶ Ki itoroorok muguleldanyi eng' ooreetap Kamuktaindet ne Toroor, ak kogeny, ki isto komoswek che torooreen ak Aserik kobetyo eng' Judah.

⁷ Eng' kenyiitap somok ne po laitornatennyi, ko ki iyookto pounikyik, chooto ko ki Benail, Obadiah, Zekariah, Nethanel ak Mikaia, koba koneetisyot eng' nganasoogap Judah.

⁸ Ki mi kobooto icheek Lawiik, chooto ko Semaiah, Netania, Sebadia, Asahel, Semiramot, Jeonatan, Adonijah, Tobija ak Tobadonija, ak tisiik che ki mi kobooto icheek ko Elisama ak Jehoram.

⁹ Ki ineetisyot eng' Judah, kotinyei bukuitap Ng'atuutigap Kamuktaindet ne Toroor. Kibendate nganasook tugul che po Judah ak koneetisyot eng' kwenutap piik.

Ooindap Jehoshaphat

¹⁰ Ki ibutyi `kamuisetap Kamuktaindet ne Toroor laitornatosyek tugul che po emotinwek che ki mi tabanwegap Judah, kot ko mata kobookyi Jehoshaphat.

¹¹ Ki ipchi Philistiik alak Jehoshaphat kagoochinoik ak fedha koek aisuruut, kigetyi Arabuuk ak icheek akwotisyegap keechiirek, mengichik eliphuusyek tisap ak pogol tisap, ak kwesik eliphuusyek tisap ak pogol tisap.

¹² Kitesak Jehoshaphat koeet miising'. Ki teech irimoik ak nganasook che kigonoree tuguuk eng' Judah.

¹³ Ki tinyei poisyonik che chaang' eng' nganasoogap Judah; kobooto piigap lugeet, che kiimeen che nyigoonen, eng' Jerusalem.

¹⁴ Chu kaitosyekwak ko uu kooriigap kwanisyekwak: che po kap Judah, che ki kiptainigap eliphuusyek ko ki Adna ne ki kiptaiyat, ak ki tinyei piik che kiimeen che nyigoonen eliphuusyek pogol somok.

¹⁵ Ne kirubei ineendet ko ki Jeohanan ne ki kiptaiyat, ak ki tinyei piik eliphuusyek pogol aeng' ak tamanwogik sisiit,

¹⁶ kirubei ineendet Amasia weeriitap Zikri, ne ki igoochigei Kamuktaindet ne Toroor eng' chamyet, ak ki tinyei piik che kiimeen che nyigoonen eliphuusyek pogol aeng'.

¹⁷ Eng' che po kap Benjamin ko ki Eliada ne kiim ak ko nyigan, ak ki tinyei piik eliphuusyek pogol aeng' che ki tinyei kwangok ak long'onik,

¹⁸ ak kirubei ineendet Jeosabad ne ki tinyei piik eliphuusyek pogol ak tamanwogik sisiit che ki chobootiin koyai lugeet.

¹⁹ Chuuto ko che kiboisyechin laitoryat, koma ki itito che ki inde laitoryat nganasook che ng'ootaatiin che po Judah tugul.