2 ATEPTAP PEETUUSYEK 16 - BUKUIT NE TILIIL Sireet ne Dutero Kanon

Kobaregei Judah ak Israel

¹ Eng' kenyiitap sosom ak lo ne po laitornatetap Asa, kogiwo Baasha laitoryatap Israel kobargei ak Judah, ak koteech Ramah si mata kochamji chii komanda anan konyo oriit ole mi Asa laitoryatap Judah.

² Ki inem anyun `Asa fedha ak thahabu eng' ole kigonoree tuguugap kootap Kamuktaindet ne Toroor ak kootap laitoryat, ak koyookyi Ben-Hadad laitoryatap Syria, ne ki menyei Damasko, koleenji,

³ “Miitei kasyinet kwenunnyo, anee ak inyee, ko uu ye kimi kwenutap kwandanyu ak kwandang'ung'. Keero, kaayogun fedha ak thahabu; ui put kasyinet ne oting'egei ak Baasha laitoryatap Israel, si kwo koistoenagei.”

⁴ Ki kasyi anyun `Ben-Hadad laitoryat Asa ng'aleekyik, ak koyookto kiptainigap lugosyekyik koba kobar nganasoogap Israel. Ki par Ijon, Dan, Abel-maim ak nganasook tugul che po Naphtali che ki kigonoree tuguuk.

⁵ Kingo kas Baasha, ko mata koteech Ramah, kobagaakta poisyennyi ne kiyaei.

⁶ Ki imut anyun laitoryat `Asa Judah tugul, ak koba koip koik che po Ramah, kobooto keetiik, che kiga teekse Baasha. Kiboisyee chooto koteege Geba ak Mispa.

Keerindet Hanani

⁷ Ki nyo eng' peetuusyechooto Hanani keerindet ole mi Asa laitoryatap Judah, ak koleenji, “Amu koitiegei laitoryatap Syria, ma itiegei Kamuktaindet ne Toroor Kamuktaindeng'ung', ko kachililso anyun lugeetap laitoryatap Syria eng' eung'ung' amu nooto.

⁸ Tos ki ma ko lugeet ne oo Ethiopik ak piigap Libya, che ki tinyei kariisyek ak piik che chaang' miising' che ki laanyei paraisisyek? Ko amu ki itiegei Kamuktaindet ne Toroor, ko ki inde ineendet icheek eung'ung'.

⁹ Amu pendoti konyegap Kamuktaindet ne Toroor eng' ng'wony komugul, koboortogei kole kiim agobo icheeget che ititaatiin mugulelwekwak eng' tainnyi. Koiyai kioto eng' perberyo; amu kobooch nguno ko kenyooru lugoosyek agoi.”

¹⁰ Ki nereekyi anyun Asa miising' keerindet, kot konde ineendet korgoreet. Eng' peetuusyechooto, ko ki inam kous Asa piik alak eng' pichooto.

Kogesugei laitornatetap Asa

¹¹ Poisyonigap Asa, kobooch che po tai agoi che po let, ko ki kisirchi kitabuutap laitorinigap Judah ak Israel.

¹² Eng' kenyiitap sosom ak sogool ne po laitornatennyi, ko ki nam Asa myando keelyekyik ak kieet miising' myandanyi. Agot eng' myandanyi koma cheeng' Kamuktaindet ne Toroor, ago ki cheeng' toreteet eng' chepkerichinik.

¹³ Ki ru Asa ak kwanisyekyik, ak kime eng' kenyiitap artam ak agenge ne po laitornatennyi.

¹⁴ Ki kitup ineendet eng' kererit ne kiga kowachigei eng' nganaseetap Daudi. Ki kinde itoogut ne ki nyiitaat nyamdutik che anyiny, ak tuguuk alak che teerchiin che ki kichop eng' ng'omnatetap chepkerichinik: ak ki kibeelji tuguuk che chaang' miising'.