2 ATEPTAP PEETUUSYEK 15 - BUKUIT NE TILIIL Sireet ne Dutero Kanon

Wolutik che ki yai laitoryat Asa

¹ Ki nyoonji `Kabuusetap Kamuktaindet ne Toroor Azariah weeriitap Obed,

² ak ki wo kotorookta Asa, koleenji, “Ogasa okweek, inyee Asa ak Judah tugul ak Benjamin! Mi Kamuktaindet ne Toroor kobootok koteen otebye ak ineendet. Ye ocheeng' ineendet, onyooru, ago ngot omete ineendet, kometook.

³ Kiga kotebee Israel egosyek che chaang' ama tinyei Kamuktaindet ne po iman, ama tinyei tisiindet ne ineetisyei, ama tinyei ng'atuutik.

⁴ Ago kingo weekyigei Kamuktaindet ne Toroor, Kamuktaindetap Israel, eng' nyalildanywa, ak kocheeng' ineendet, konyoor ineendet.

⁵ Ki ma komi kaalyeet eng' peetuusyechooto eng' ineendet ne mandoi anan ko eng' ineendet ne nyoonei ko, ago ki tinyei kaimutik icheek tugul che ki menyei emotinwechooto.

⁶ Kibargei, kobar pororyet age pororyet age, ak kobar nganaseet age nganaseet age: amu ki inyaliil Kamuktaindet icheek eng' nyalilowogik tugul.

⁷ Ago ogimegitu, among' kochorirenso eunekwok, amu onyooru melekto eng' poisyonikwok.”

⁸ Kingo kas Asa ng'aleechuuto, ak maonateetap maotyot Obed, konyiganit, ak koisto tuguuk che kiwechei eng' emet tugul ne po Judah ak Benjamin, ak eng' nganasook che kiga korep eng' emetap tuloonoogap Ephraim. Ak ki teech kogeny kaptisisyetap Kamuktaindet ne Toroor, ne ki mi taitap keterutap Kamuktaindet ne Toroor.

⁹ Ki iyum `inee Judah tugul ak Benjamin, ak punootik che ki mi kobooto icheek, che po Ephraim, che po Manasseh ak che po Simion. Ki pwanji ineendet `piik che chaang' miising' kobun Israel, ye kingo keer kole mi Kamuktaindet ne Toroor Kamuktaindennyi kobooto ineendet.

¹⁰ Koyumgei anyun eng' Jerusalem eng' kenyiitap taman ak muut eng' arawetap somok ne po laitornatetap Asa.

¹¹ Ki eng'ji Kamuktaindet ne Toroor tiseiywek eng' peetuunooto, che po parunenik che kigetu, eiik pogol tisap ak keechiirek eliphuusyek tisap.

¹² Ki yai arorutyet kocheeng' Kamuktaindet ne Toroor, Kamuktaindetap kwanisyekwak, eng' mugulelwekwak tugul ak eng' saboonwekwak tugul,

¹³ ak kole, “Age tugul ne ma chamei kocheeng' Kamuktaindet ne Toroor, Kamuktaindetap Israel, kebarei ngo ming'in anan ko oo, ngo muren anan ko kwony.”

¹⁴ Ki iyasyechi Kamuktaindet ne Toroor komwa eng' kutit ne oo, ak eng' waagaat, ak eng' iryagook, ak eng' igondisyek.

¹⁵ Kiboiboitu Judah tugul amu kayasyonooto; amu kigayosyo eng' mugulelwekwak tugul, ak kocheeng' ineendet eng' magennywa tugul, ak kinyoor ineendet. Ki igoochi anyun `Kamuktaindet ne Toroor icheek kamuung'et eng' tabanwekwak tugul.

¹⁶ Ki isto `Asa kamennyi Maaka agine, si mata koek laitoryat ne kwondo, amu kiga koyai kanamwet ne kiwechei ne po Asera. Kibut Asa kanamwennyi ak kotui koek temburyek, ak kobeel eng' ole neegitee kererutap Kidron.

¹⁷ Ago ki ma kiisto komoswek che torooreen eng' Israel. Nganda ki uu nooto ko ki igeesunotkei muguleldap Asa eng' peetuusyekyik tugul.

¹⁸ Ki ip kobwa kootap Kamuktaindet tuguuk che kigaitabaan kwandanyi kobooto che kiga kotabaan ineendet: fedha, thahabu ak tereenik.

¹⁹ Ki mata kobiit lugeet kogeny agoi kenyiitap sosom ak muut ne po laitornatetap Asa.