2 ATEPTAP PEETUUSYEK 14 - BUKUIT NE TILIIL Sireet ne Dutero Kanon

Laitornatetap Asa

¹ Ki ru anyun Abijah kobooto kwanisyekyik, ak ki kitupchi nganaseetap Daudi, ak ki laitoran Asa weeriinnyi kogeer ineendet. Ki nyoor emet kaalyeet kenyiisyek taman eng' peetuusyekyik.

² Ki yai Asa ne myee ak ne po iman eng' taitap Kamuktaindet ne Toroor Kamuktaindennyi.

³ Ki isto kapkorosusyek che teer, ak komoswek che torooreen, kibut tolochik ak koep Aserik.

⁴ Ki ng'at Judah kocheeng' Kamuktaindet ne Toroor, Kamuktaindetap kwanisyekwak, ak koyai ng'atuutik ak kayomisutik.

⁵ Ki isto kogeny eng' nganasook tugul che po Judah komoswek che torooreen ak ole kibeeljine kanamonik kagoochinoik; ak ki tinyei kaalyeet laitornatet eng' tainnyi.

⁶ Ki teech nganasook che ng'ootaatiin eng' Judah. Ki mi kaalyeet emet ak ki ma kotinyei lugeet eng' kenyisyechooto, amu kiga kogoochi `Kamuktaindet ne Toroor ineendet kamuung'et.

⁷ Ki mwachi piigap Judah koleenji, “Ongeteech nganasochu, ak kiyieme irimoik ak teeksosyek che kooen, ormariichok ak temeleiywek; ta komi emet tainnyo amu kigecheeng' Kamuktaindet ne Toroor, Kamuktaindennyo; kigecheeng' ineendet ak ki kogoonech kamuung'et eng' komosta age tugul.” Ara kiteekso anyun ak koboor.

⁸ Ki tinyei Asa lugeet ne po piik eliphuusyek pogol somok che po Judah che ki tinyei long'onik ak ng'otwek, ak piik ki eliphuusyek pogol aeng' ak tamanwogik sisiit che po Benjamin, che ki tinyei long'onik ak kwangok. Ki piik che kiimeen che nyigoonen chuuto tugul.

⁹ Ki nyo kobargei ak icheek `Zerah Ethiopiaindet, kotinyei lugeet ne po piik millionit agenge ak kariisyek pogol somok; ak ki it Maresha.

¹⁰ Ki wo anyun Asa kotorookta ineendet ak kitet lugeet eng' atebweetap Sepata ne mi Maresha.

¹¹ Ki riirchi `Asa Kamuktaindet ne Toroor Kamuktaindennyi, kole, “Kamuktaindet ne Toroor, ma mi age kobatenen ne imuuchi kotoretis eng' kwenutap ne kiim ak ne ma tinyei kimnateet: toretech, ee Kamuktaindet ne Toroor, Kamuktaindennyo; amu kimang'un, ak kagibwa kebarge ak tuiyoni eng' kaineng'ung'. Ee Kamuktaindet ne Toroor, ii Kamuktaindennyo; amat koterteerin chii.”

¹² Kobar anyun `Kamuktaindet ne Toroor Ethiopik eng' taitap Asa ak eng' taitap Judah. Kimwei Ethiopik,

¹³ ak ki oon Asa ak piik che ki mi tugul agoi Gerar. Ki pek Ethiopik che chaang' ne mata komuuch kosargei; amu ki kibar eng' taitap Kamuktaindet ne Toroor, ak eng' taitap lugeennyi. Ki ip piigap Judah parunenik che chaang'.

¹⁴ Ki par nganasook tugul che ki mi ole neegitee Gerar, amu ki nyoonji icheek kamuisetap Kamuktaindet ne Toroor. Ki nam icheek tuguuk eng' nganasook tugul; amu kimi parunenik che chaang' nganasochooto.

¹⁵ Ki par kogeny kaptugusyek, ak kokweri keechiirek ng'iisyat ak tambeesik. Yeityo koweek koba Jerusalem.