2 ATEPTAP PEETUUSYEK 12 - BUKUIT NE TILIIL Sireet ne Dutero Kanon

Kopookyin Sisak laitoryatap Misiri, Judah

¹ Kingo kagigimit pounatetap Rehoboam ak kogimit agine, kometo ng'atuutigap Kamuktaindet ne Toroor, ineendet ak Israel tugul.

² Ak amu kiga kongelelji Kamuktaindet ne Toroor ko ki togos Sisak laitoryatap Misiri konyo kobar Jerusalem eng' kenyiit ne po muut ne po Laitoryat Rehoboam.

³ Ki tinyei ineendet kariisyek eliphuut agenge ak pogol aeng' ak piik eliphuusyek tamanwogik lo che ketei paraisisyek. Ki ma ko iitoksei piik che kigabwa kobooto ineendet eng' Misiri: piigap Libya, Sukik ak Ethiopik.

⁴ Ki nam nganasook che ng'ootaatiin che ki po Judah ak kobwa Jerusalem.

⁵ Ki nyo `maotyot Semaiah kap Reoboam, ak pounigap Judah, che kiga koyumjigei Jerusalem, komwee Sisak, ak koleenji icheek, “Kamwa Kamuktaindet ne Toroor ko uu ni, kole, ‘Ki ometa, eng' nooto ko kabagakyok anyun agane eutap Sisak.’ ”

⁶ Ki iming'ingei anyun pounigap Israel kobooto laitoryat, ak ki le, “Po iman Kamuktaindet ne Toroor.”

⁷ Kingo keer Kamuktaindet ne Toroor kole kagoming'ingei, konyonji `ng'olyootap Kamuktaindet ne Toroor Semaiah, koleenji: “Kagoming'ingei icheek, ma abare, ago asaru kitigin, ak ma keroong'jin Jerusalem nereegekyuk eng' eutap Sisak.

⁸ Ago egu icheek otwogikyik, si kobiit konai poisyennyu ak poisyetap laitornatosyek emotinwek.”

⁹ Ki togos anyun Sisak laitoryatap Misiri kobar Jerusalem, ak koip konoraigap kootap Kamuktaindet ne Toroor ak konoraigap kootap laitoryat: ki ip tugul, ki ip kogeny long'onik che po thahabu che kiga yai Solomon.

¹⁰ Ki yai Laitoryat Rehoboam long'onik che po sugunonik kogeere chooto, ak kogoochi kiptainigap riibiik koriip, che ki riibei kurgeetap kootap laitoryat.

¹¹ Ak eng' peetuut age tugul ne kanyo laitoryat kootap Kamuktaindet ne Toroor, kobwa riibiik koip, yeityo koweekta koba kootap riibiik.

¹² Kingo ming'ingei, koistoegei nereegegap Kamuktaindet ne Toroor ineendet, si ma par ineendet kowong'. Ak kogeny, ki miitei Judah tuguuk che myach.

Laitornatetap Rehoboam eng' nwagindo

¹³ Ki igimitkei anyun Laitoryat Rehoboam eng' Jerusalem ak kolaitoran. Ki po kenyiisyek artam ak agenge Rehoboam ye ki tau kolaitorani, ak ki laitoran kenyiisyek taman ak tisap eng' Jerusalem, nganasanooto kiga kolewen Kamuktaindet ne Toroor eng' ortinwek tugul che po Israel, konde kainennyi olooto. Ki kiguure kamet Naamah Jebamonindet.

¹⁴ Ki yai yaityet, amu ma igiilgei kocheeng' Kamuktaindet ne Toroor eng' muguleldanyi.

¹⁵ Ak poisyonigap Rehoboam, che po tai ak che po let, tos ma kisir eng' ng'aleegap Semaiah maotyot ak che po Ido keerindet, kobee tetuutigap ibinwek che ki kosiirto? Ki mi lugoosyek kwenutap Rehoboam ak Jeroboam kotugul.

¹⁶ Ki ru Rehoboam kobooto kwanisyekyik ak ki kitupchi nganaseetap Daudi. Ak ki laitoran Abijah weeriinnyi kogeer ineendet.