2 ATEPTAP PEETUUSYEK 10 - BUKUIT NE TILIIL Sireet ne Dutero Kanon

Koesyoi pororyosyegap murot kaataam Rehoboam

¹ Ki wo Rehoboam Shekem, amu kigabwa Israel tugul Shekem, konde ineendet koek laitoryat.

² Kingo kas Jeroboam weeriitap Nebat agobo nooto, (amu kimi Misiri, ole kiga mwechi komwee Laitoryat Solomon,) koweek Jeroboam eng' Misiri.

³ Ki iyookto keguur ineendet; ak ki nyo Jeroboam kobooto Israel tugul, ak kong'alaalji Rehoboam, koleenji,

⁴ “Ki yai kwandang'ung' choginnyo kouiit. Ara anyun, yai kowisisiit otisyet ne uui ne ki po kwandang'ung', ak iyai kowisisiit choginnyi ne nyigiis ne ki indeech, si kobiit keotin.”

⁵ Ki leenji icheek, “Obwa kogeny ole ami koga ibata peetuusyek somogu.” Koba anyun piik.

⁶ Kong'alaal Laitoryat Rehoboam ak poisyek, che ki cham kotonondos eng' taitap Solomon kwandanyi, ye kita kosabei, koleenji, “Nee ng'olyoot ne omwaiwo ne awoljini pichu?”

⁷ Ki mwachi koleenji, “Ngot iegu chii ne myee eng' pichu ak ibaibai icheek, ak imwachi ng'aleek che myach, koegu anyun icheek otwogiguk koigeny.”

⁸ Ago ki pagaakta ng'aleegap poisyek, che ki mwachi ineendet ak kong'alaal ak neranik che kinerchindos tugul che kitonondos eng' tainnyi.

⁹ Ki leenji icheek, “Nee ng'olyoot ne omwae okweek, si kobiit kewolji pichu kong'alaalwo koleenjo, yai kowisisiit chogit, ne ki indeech kwandang'ung?”

¹⁰ Ki wolji neranik che kinerchindos ak ineendet koleenji, “Imwachini ko uu ni pichu kong'alaalun, koleenjinin, ‘Ki yai kwandang'ung' choginnyo konyigiisit, ago yaiywech kowisisiit’; imwachini ko uu ni, ileenjini, ‘Nyigiis mornennyu ne ming'in ne po euut kosiir suetap abba.

¹¹ Nguno anyun, ko uu ye ki koonok abba chogit ne nyigiis, atese choging'wong'. Ki itigonenok abba kipcharitisyek, ago atigoonenok melmelwek.’ ”

¹² Kobwa anyun Jeroboam ak piik tugul ole mi Rehoboam eng' peetuutap somok, ko uu ye kiga ng'at laitoryat, kole, “Obwa eng' peetuutap somok.”

¹³ Ki wolji laitoryat icheek eng' koroomnateet. Ki meto Laitoryat Rehoboam ng'aleegap poisyek,

¹⁴ ak kong'alaalji icheek ko uu ye ki kamwachi neranik, koleenji, “Ki yai abba choging'wong' konyigiisit, ago atese; ki itigonenok abba kipcharitisyek, ago atigoonenok melmelwek.”

¹⁵ Ara ki ma kasyi anyun laitoryat pichooto, amu ki kiit ne ki punu Kamuktaindet, si kobiit kogimit Kamuktaindet ne Toroor ng'olyoondennyi, ne ki mwa eng' Ahija Silonindet komwachi Jeroboam weeriitap Nebat.

¹⁶ Kingo keer Israel tugul kole mata kogasyi laitoryat icheek, kowolji piik laitoryat, koleenji, “Nee kebeberta ne ketinye eng' Daudi? Ama ki tinyei poroteet eng' weeriitap Jesse. Ingwo chii tugul emainnyi, ee Israel! Riip koong'ung' anyun, Daudi.” Ki pa Israel tugul anyun emaisyekwak.

¹⁷ Ago ki laitoran Rehoboam eng' piigap Israel che ki menyei nganasoogap Judah.

¹⁸ Ki iyookto anyun `Rehoboam Hadoram, ne ki pou aisuruut; ak kilach piigap Israel ineendet eng' koik, kome. Kichaakta anyun Laitoryat Rehoboam kolaany chepkichutinnyi komwei kwo Jerusalem.

¹⁹ Ara ki ingelelji anyun Israel kootap Daudi agoi ra.