1 TIMOTEO 5 - BUKUIT NE TILIIL Sireet ne Dutero Kanon

Katigonutik che teer teer agobo kayanik

¹ Amerasyi poiyo, ago ng'alaalji ko uu kwanda; murenik ko uu che otupche,

² chebyosok ko uu kametisyek, kwonyiik che mengeechen ko uu tiibiik che otupche, eng' tiliilindo tugul.

³ Teech mosoogik che mosoogik iman.

⁴ Ago ngo tinyei mosoget age tugul lagok anan mochogoronik, koneetkei korook kobarta kayweet ne kiywei Kamuktaindet eng' piigap koonnywa, ak koyaakyi sigiikwak toreteet: amu taagaksei niito eng' taitap Kamuktaindet.

⁵ Ak ineendet ne mosoget iman, ne tebyei ineegei, kotinyei kamang'unennyi eng' Kamuktaindet, ak kotepto soomutik ak saautik kemoi ak peet.

⁶ Ago ineendet ne suegei ko kagome agot ngo sabei.

⁷ Ng'at tuguuchuuto, si kotebi icheek koma tinyei teweernat.

⁸ Ago ngo ma riibei chii piikyik, ak che siirei ko che po koonnyi, ko kagoesyo kayaneet, ak ko ya kosiir chiito ne ma iyan.

⁹ Amat kesirchi ole kisirchin mosoogik kotom koit kenyiisyek tamanwogik lo, ne ki osotyotap chiito agenge,

¹⁰ ne kimwaitae ineendet poisyonik che myach; ngo kigo pai lagok, ngo ki kotaach toek, ngo kigoun keelyegap che tiliileen, ngo ki kotoret che nyalildos, ngo kigogiilgei eng' poisyet age tugul ne myee.

¹¹ Ago eesye mosoogik che mengeechen; amu ye kagongelelji Kristo, komach kitun;

¹² tinyei kirwooget anyun, amu kagometo kayanennywa ne po tai.

¹³ Kobooto nooto anyun koneetkei koek chorirenik, ak koiitoti kooriik; ago ma chorirenik kityo, ago chaamik ak che ibooti chemererosyek, kong'alaalote tuguuk che ma nyooljin.

¹⁴ Nooto anyun achame ale kitun mosoogik che ta ko mengeechen, si kosich lagok, ak koriip koot, amat kogoochi poroindo puunyoot kochuris eng' ui tugul;

¹⁵ amu agot nguno ko kagomasta alak koosup Setani.

¹⁶ Ngo tinyei kobogoryot ne iyanaat mosoogik, ingotoret anyun icheek, si ma nyoor nyigiisindo kaniset; si kotoret che mosoogik iman.

¹⁷ Ingiityi poisyek che pou komyee, teegisto konyil aeng', ne siirei ko icheek che yaei poisyet ne nyigiis ne po ng'olyoot ak kaneetisyet.

¹⁸ Amu mwaei siruutyet kole, “Amerat kutitap eito ne tyechei peek koboorei.” Ak, “Nyoljin kiboityot melektanyi.”

¹⁹ Ametaach kataamset agobo poiyo, kobatee eng' kutusweegap paorinik aeng' anan ko somok.

²⁰ Kergong' eng' taitap piik tugul icheeget che yaei tengekwogik, si kobiit koywei chuun alage ak icheek.

²¹ Kang'atiin anyun eng' taitap Kamuktaindet, ak Kristo Jeso, ak malaikaisyek che lewenotin, ale iriip tuguuchuuto amesip itil kirwooget, ameyae kiy age tugul eng' tiytiyet.

²² Amegonoor chii age tugul eunek eng' sartaet, anan iyai yamdaet ak tengekwogigap piik alak: riipkei eng' tiliilindo.

²³ Kobooch nguno ko mata iee peek kityo, ago poisyee divaik tutigin amu moeng'ung', ak amu myanweguk che po atkai tugul.

²⁴ Taagunotiin tengekwogigap piik alak, indoe kobendi kirwooget; ak che po piik alak ak icheek kosubi icheek.

²⁵ Ko uu nooto agine miitei poisyonik che myach che taagunotiin; ak che ma uu chooto koma imugaksei koung'ogis.