1 TIMOTEO 4 - BUKUIT NE TILIIL Sireet ne Dutero Kanon

Katigonet agobo peetuusyek che pwoonei

¹ Ago mwaei Kabuuset ne Tiliil kotook, kole tuun eng' peetuusyek che pwoonei koistoegei alak kayaneet, koepchin iit tamirmirik che ibeeti piich ak kaneetisyosyek che po oik,

² eng' chombilisyetap piik che ng'alaali lembech, che ki koigei kabwaatutikwak che ki kibeelee karnet ne peelei piich;

³ che etei kitunis, ak koistoegei amitwogik alak, che ki yai Kamuktaindet kole kotaach eng' kongoi icheek che iyani ak kongen imanit.

⁴ Amu myee yautyet age tugul ne po Kamuktaindet, ama mi kiy ne nyolu keesyo, ngetaach eng' kongoi:

⁵ amu kitiliili eng' ng'olyootap Kamuktaindet ak saaet.

Kiboityot ne myee ne po Jeso Kristo

⁶ Ngot ibwaatyi che kitupche tuguuchu, iegu anyun kiboityot ne myee ne po Kristo Jeso, ne paat komyee eng' ng'aleek che po kayaneet, ak eng' kaneetisyet ne myee ne ki isup inyee:

⁷ ago eesye atindonik che po tangoita che ma namegei ak ooreetap Kamuktaindet, che mwaei chebyosok. Ak igiilgei eng' kayweet ne kiywei Kamuktaindet:

⁸ amu porot ne matya kagiiletapkei ne po poorto; ago poroteet eng' tuguuk tugul kayweet ne kiywei Kamuktaindet, amu tinyei arorutyet ne po saboondo ne mi nguno, ak ne nyoonei.

⁹ Po iman ng'olyoondoni, ak konyolu koyanak inne.

¹⁰ Kiyae anyun poisyet ne oo amu niito ak ki kiiligei, amu miitei kamang'unennyo Kamuktaindet ne sabei, ineendet Yetindetap piik tugul, ago ne siirei ko po piik che iyani.

¹¹ Ng'at tuguuchu ak ineet.

¹² Amat kosas chii ming'inateng'ung'; ago egu kaboorunet eng' icheek che iyani, eng' ng'olyoot, eng' atepto, eng' chamyet, eng' kayaneet, eng' tiliilindo.

¹³ Agoi anyo, chuuljige somaneet, ak kateitaet, ak kaneetisyet.

¹⁴ Amebagaakte iboisyee konunet ne itinye, ne ki kigoonin eng' ooreet ne po amdaet, kobooto kagonooretap eunek che po poisyegap kaniset.

¹⁵ Igiiljige tuguuchuuto; igoochigei miising'; si kotook eng' piik tugul pandang'ung' ne po tai.

¹⁶ Riipkei, ak iriip kaneetisyeng'ung'. Teptee tuguuchuuto; amu ngiyae niito isaruge kobooto icheeget che kasin.