1 TIMOTEO 2 - BUKUIT NE TILIIL Sireet ne Dutero Kanon

Saaet ak kalasunet

¹ Ne po tai anyun abooru ale ingoyaak soomutik, ak saautik, ak saisaet, ak mwaet ne po kongoi agobo piik tugul;

² agobo laitorinik ak tugul che tinyei pounateet; si kobiit ketebee kaalyeet ak mutyonet eng' kayweet ne kiywei Kamuktaindet ak teegisto.

³ Myee niito ak ko taagaksei eng' taitap Kamuktaindet Yetindennyo;

⁴ ne machei kole kesar piik tugul, ak konyoor naet ne po imanit.

⁵ Amu miitei Kamuktaindet agenge, katuiyoindet agenge agine kwenutap Kamuktaindet ak piik, nooto chiito, Kristo Jeso,

⁶ ne ki igoitogei koek ne kityage tugul; ne tuun kibaoryanjin eng' peetuusyekyik;

⁷ ki kindea anyun agobo nooto aek amdoindet ak kayooktoindet (amwae imanit, ma mwaei lembech), kaneetindetap Pororyosyek eng' kayaneet ak imanit.

⁸ Amache anyun ale kosaaei murenik eng' komosta age tugul, konamjin parak eunekwak che tiliileen, koma mi nereegek ak tiyet.

⁹ Ko uu nooto kobogorisyek ingolaachkei eng' kalaakset ne nyolu, eng' teegisto ak riibetapkei; ma eng' laetap suumeek, ak thahabu anan sonoek che korooron anan ngoroik che po kamanuutyet ne oo;

¹⁰ ago (ko uu ye nyoljin kobogorisyek che ibortogei kole piigap Kamuktaindet icheeget) eng' poisyonik che myach.

¹¹ Ingoneetkei kobogoryot eng' mutyonet kobooto kasetap iit.

¹² Ago ma chamjini kobogoryot koneetis, anan koboi muren, ago kotebi eng' mutyonet.

¹³ Amu ki kiyai Adam korook, si keyae Hawa;

¹⁴ ak ki ma king'al Adam, ago kingo kageng'al kobogoryot kobutyi pistoet;

¹⁵ ago kisaru eng' sigisyet, ngo tebyei icheek eng' kayaneet ak chamyet ak katabaanet kobooto riibetapkei.