1 THESSALONIKEK 5 - BUKUIT NE TILIIL Sireet ne Dutero Kanon

Nyonunetap Kiptaiyat ak riibetapkei

¹ Ma nyolu anyun kesirwak, che kitupche, agobo peetuusyek ak kenyiisyek.

² Amu ongen okweeget komyee ole nyoonei peetuutap Kiptaiyat ko uu choriin ne nyoonei kemoi.

³ Ye mwaei icheek koleen, Kaalyeet ak chametapkei, koche anyun icheek ng'emisyet, ko uu ye ityin ng'wanindo kobogoryot ne machei kosigiis; ago ma koi chililso.

⁴ Ago okweek, tupchosyechu, koma mi eng' mesundeito, kot konyonjok peetuunooto ko uu choriin:

⁵ amu okweek tugul ko oo weeriitap lapkeiyet, ak weeriitap peet: ma ki po kemoi, anan mesundeito;

⁶ nooto anyun among' keruiye ko uu piik alak, ago ongeriipse ak keegu che riibegei.

⁷ Amu icheeget che ruitos koruitos kemoi; ak icheeget che pogitos kobogitos kemoi.

⁸ Ago ongeegu che kiriibegei, acheek che ke po peet, kilaachi karnetap tegeet ne po kayaneet ak chamyet; ak kuutweet, nooto ko kamang'unet ne po yetunet.

⁹ Amu ki ma lewenjech Kamuktaindet nereeknateet, ago nyoorunetap yetunet eng' Kiptaiyandennyo Jeso Kristo,

¹⁰ ne kimechech, si ngegosu anan ngeruitosi, kesaptosi kobooto ineendet.

¹¹ Nooto anyun ogaigaige okweegei eng' okweegei, oteechkei okweegei eng' okweegei, agot ko uu ye oyae ak okweek.

Katigonutik che terotin ak ng'aleek che po let

¹² Ago kisoomok, che kitupche, keele onai icheek che tinyei poisyet ne oo eng' kwenung'wong', ak che poiywok eng' Kiptaiyat, ak kotigoonok;

¹³ ak ogonyit icheek miising' inne eng' chamyet agobo poisyennywa. Otebi eng' kaalyeet okweegei eng' okweegei.

¹⁴ Ak kitigoonok, che kitupche, keele oteechi che ma riibei che ki king'at, ocher che nyogooren, otoret che nyalulyotin, omuite ak piik tugul.

¹⁵ Ogeer si ma yaakyi chii age tugul chiito age yaityo eng' yaityo; ago osup nooto myee kotugul, chii age eng' age, ak eng' piik tugul.

¹⁶ Oboiboitu peetuusyek tugul;

¹⁷ osaae kotugul;

¹⁸ omwae kongoi eng' tuguuk tugul: amu niito mageetap Kamuktaindet eng' Kristo Jeso eng' okweek.

¹⁹ Amogirinde Kabuuset ne Tiliil;

²⁰ amosas maonatosyek;

²¹ otyem tuguuk tugul; onam miising' nooto myee;

²² oistoegei kiy age tugul ne ya.

²³ Ak ingotabaanak eng' katabaanet ne nyiitaat Kamuktaindet ne po kaalyeet; ak ingoriiboogis komyee mugulelwekwok ak saboonwekwok ak poorwekwok, ko motinye kiy ne kimuuchi kirwoogunenok eng' nyonunetap Kiptaiyandennyo Jeso Kristo.

²⁴ Ineendet ne kuurok ko ineendet ne kiyani, ne yaei nooto agine kosulda.

²⁵ Tupchosyechu, osaiywech.

²⁶ Ogat tupchosyek tugul eng' ng'ututet ne tiliil.

²⁷ Ayosyewok eng' Kiptaiyat ale kesomanji parwaani che kitupche tugul.

²⁸ Ingotebi myeeindap Kiptaiyandennyo Jeso Kristo kobootok.