1 THESSALONIKEK 3 - BUKUIT NE TILIIL Sireet ne Dutero Kanon

Poisyet ne ki kiyooktoe Timoteo

¹ Nooto anyun ye kingo mata kimuuch kemuite, kibwaat keele myee kebagaaktech acheegei eng' Athens;

² ak kiyogu Timoteo, tupchennyo ak ko kiboityotap Kamuktaindet eng' logoiywek che myach che po Kristo, kogimitok, ak kogaigaak agobo kayaneng'wong';

³ si ma ing'eak chii age tugul eng' nyalilwogichuuto; amu ongen okweeget ole ki kilewenwech chooto.

⁴ Amu iman, ki ngemi kobootok, kogisip kemwaiwok keele kinyooru usiisyet; ko uu ye ki kobiit, ak ongen ak okweek.

⁵ Amu ng'olyoondoniito ye ki mata amuuch amuita, ayoogu kuut si kobiit anai kayaneng'wong', ale tama kogoyomak yoomindet, ak koek puch poisyennyo ne uui.

⁶ Ago, ye kingo nyo Timoteo kobunu olong'wong', ak koibwech logoiywek che po poiboiyet che po kayaneng'wong' ak chamyet, ak otinye kabwaatet ne myee ne obwaatech kotugul, oting'enech emosto omache ogeerech, ko uu ye kimache agacheek kegeerok;

⁷ amu ng'olyoondoniito anyun, tupchosyechu, ki kigaigaech eng' okweek eng' pichiindanyo tugul ak nyalildanyo amu kayaneng'wong':

⁸ amu kisoptosi nguno, ngot olumdegei eng' Kiptaiyat.

⁹ Amu kongoi nee ne kimuuchi kigoochi Kamuktaindet kogeny agobo okweek, amu poiboiyet tugul ne kiboiboitune ko amu okweek eng' taitap Kamuktaindet nenyo;

¹⁰ kisaae miising' kemoi ak peet si kobiit kegeer togoochikwok, ak kigeesu nooto ne rartaat eng' kayaneng'wong'?

¹¹ Ingondochi anyun pandanyo kebwa oldang'wong', Kamuktaindet nenyo ak ko Kwanda ineendet ak Kiptaiyandennyo Jeso;

¹² ingogoonok Kiptaiyat otesage ak obaraitu eng' chamyet okweegei eng' okweegei, ak eng' piik tugul, agot ko uu acheek eng' okweek;

¹³ si kobiit kogimit mugulelwekwok ko motinye kiy ne kimuuchi kirwoogunenok eng' tiliilindo eng' taitap Kamuktaindet nenyo ak ko Kwandanyo, eng' nyonunetap Kiptaiyandennyo Jeso kobooto chechiik che tiliileen tugul.