1 THESSALONIKEK 2 - BUKUIT NE TILIIL Sireet ne Dutero Kanon

Amdaetap Paulo eng' Thesalonika

¹ Amu ongen okweek, tupchosyechu, itunennyo ne ki kiitu olong'wong', ole ki ma ek puch:

² ago kingo kaginyalilech eng' tai ak kiteweerech eng' Philippi, ko uu ye ongen, ko ki kinyiganitu eng' Kamuktaindet nenyo kemwaiwok logoiywek che myach che po Kamuktaindet eng' pooryeet ne oo.

³ Amu ma po kateunennyo leluut, anan simdo, anan eng' ng'aalseet:

⁴ ago ko uu ye ki koyanwech Kamuktaindet keegu che tononjin logoiywek che myach, keng'alaali ko uu nooto; ma ko uu che iboiboiti piik, ago Kamuktaindet ne tyemei mugulelwekyok.

⁵ Amu ki ma kinyoorwech eng' sait age tugul keboisyee ng'aleegap kachaunetapkei, ko uu ye ongen, anan ng'aleegap ung'oot che po keiyandit, paoryat Kamuktaindet;

⁶ ama kicheeng'e teegisto eng' piik, anan eng' okweek, anan eng' alak, ye kita ki egu nyigiisin eng' okweek ko uu che kiyooktoi che po Kristo.

⁷ Ago ki kitalaen eng' kwenung'wong', ko uu paindet ne paei lagokyik:

⁸ ko uu nooto, ki kiting'enok emosto ne po chamyet ne oo, ki kimache miising' keele kegoonok, ma logoiywek che myach che po Kamuktaindet kityo, ago saboonwekyok ak icheek, amu ki oegu che chamaatiin miising' eng' acheek.

⁹ Amu obwaati, tupchosyechu, poisyennyo ne uui ak pichiindo, keboisye kemoi ak peet, si ma kigoochi mileet chii age tugul eng' okweek. Ki kiamwok logoiywek che myach che po Kamuktaindet.

¹⁰ Oo paorinik okweek, kobooto Kamuktaindet, agobo ole ki kitepte acheeget eng' kwenung'wong' okweek che oyani, eng' tiliilindo ak eng' imanda koma ki tinyei kiy ne kirwoogunenech:

¹¹ ko uu ye ongen ole ki kiteechindoite chii age tugul eng' okweek, ko uu kwanda ak lagokyik, kiteeiywok ak ki kiilok, ak kebaoryani,

¹² si kobiit obendate ko uu ye nyolu eng' Kamuktaindet, ne kuurchinok laitornatet ak toroornatennyi.

¹³ Kimwachini anyun Kamuktaindet kongoi, amu ng'olyoondoniito, ama kisistosi keele, ye kingo taach ng'olyoot ne ki ogasenech, nooto ng'olyootap Kamuktaindet, ki otaach, ma ko uu ng'olyootap piik, ago ko uu ye mi eng' imanit, ng'olyootap Kamuktaindet, nooto agine ne poisyei eng' okweek che oyani.

¹⁴ Amu okweek anyun, tupchosyechu, ko ki oegu yaigap tuguuk che yaei kanisosyegap Kamuktaindet che miitei Judea eng' Kristo Jeso: amu ki onyooru ak okweek, nyalilwogik che uu chooto eng' piigap emeng'wong', agot ko uu ye kinyoor icheek eng' Yahudik;

¹⁵ che ki par Kiptaiyat Jeso ak maotik, ak ki oonech, ama ibaibai Kamuktaindet, ama namegei ak piik tugul;

¹⁶ etenech keng'alaalji Pororyosyek si kobiit kesar; inyiiti kotugul tengekwogikwak: ago nyoonjin icheek nereeknateet agoi let.

Kotinyei Paulo emosto kogeer kayanigap Thesalonika

¹⁷ Ago, acheek anyun, tupchosyechu, nga mata kegeerge ak okweek togoch eng' peetuusyek che ng'ering', ma eng' muguleldo, ko ki kityem miising' inne keele kegeerok togoch amu emosto ne oo:

¹⁸ amu ki kimache kebwa olong'wong', agot anee Paulo, ko ki amache ak kota amache; ago kiraanyech Setani.

¹⁹ Amu tos nee kamang'unennyo, anan poiboiyennyo, anan kuutweet ne po toroornatet? Tos ma okweek, eng' taitap Kiptaiyandennyo Jeso eng' nyonunennyi?

²⁰ Amu okweek toroornatennyo ak poiboiyennyo.