1 SAMUEL 7 - BUKUIT NE TILIIL Sireet ne Dutero Kanon

¹ Ki pwa anyun piigap Kiriath-Jearim ak koip moingetap Kamuktaindet ne Toroor kotogosta. Ki ip kwo kootap Abinadab eng' tulweet ak kotabaan `Eleazar weeriinnyi si koriip moingetap Kamuktaindet ne Toroor.

Korwoochi Samuel eng' Israel

² Kichaang'it peetuusyek kobooch ngo tebee moinget Kiriath-Jearim; ki ek kenyiisyek tiptem, ak ki riirchi koot tugul ne po Israel Kamuktaindet ne Toroor.

³ Ki leenji `Samuel koot tugul ne po Israel, “Ngot oweekyinigei Kamuktaindet ne Toroor eng' mugulelwekwok tugul, ko nyolu oiste kamuktaik che pororyosyek alak ak Astarot eng' kwenung'wong' ak otokyi mugulelwekwok Kamuktaindet ne Toroor ak oot ineendet ineegei, si kosarwok eng' eunegap Philistiik.”

⁴ Ki isto anyun `piigap Israel Baalik ak Astarot ak koot Kamuktaindet ne Toroor ineegei.

⁵ Ki le Samuel, “Oyumji Israel tugul Mispa, si kobiit asaiywok Kamuktaindet ne Toroor.”

⁶ Ki iyumjigei tugul Mispa ak kiram peek ak kotumda eng' taitap Kamuktaindet ne Toroor. Ki irugutkei peetuunooto ak komwa eng' yooto kole, kigeyachi Kamuktaindet ne Toroor tengekto. Ki irwookyi anyun `Samuel piigap Israel eng' Mispa.

⁷ Kingo kas Philistiik kole koiyumgei piigap Israel eng' Mispa, koba kiptainigap Philistiik kotogosta kobargei ak Israel. Ak kingo kas piigap Israel, koywei Philistiik.

⁸ Ki leenji `piigap Israel Samuel, “Amebagaakte iriirchi Kamuktaindet ne Toroor, Kamuktaindennyo agobo acheek, si kosarwech eng' eunegap Philistiik.”

⁹ Ki nam Samuel aarwetap keechiir ne reryei ak kogoito komugul koek kagoochinet ne kibeeljin Kamuktaindet ne Toroor. Ak ki riirchi `Samuel Kamuktaindet ne Toroor agobo Israel ak ki wolji `Kamuktaindet ne Toroor ineendet.

¹⁰ Ye kingo ta kogoitoi Samuel kagoochinet ne kibeelei, koriik Philistiik kobwa kobargei ak Israel. Ago kitulji `Kamuktaindet ne Toroor Philistiik eng' tuleet ne oo peetuunooto ak konyaliil icheek ak ki kibar eng' taitap Israel.

¹¹ Ki manda piigap Israel eng' Mispa koba koon Philistiik ak kobarat agoi koit Beth-ka keel.

¹² Ki nam `Samuel koita konde kwenutap Mispa ak Sen, ak koguuree kainennyi Eben-haezer kole, “Agoi nguno ko ki kotoretech Kamuktaindet ne Toroor.”

¹³ Ki kiterteer anyun Philistiik, ak matagai kobwa kogeny kosiir kiwotetap Israel. Ki kirinda `Kamuktaindet ne Toroor Philistiik eng' peetuusyek tugul che po Samuel.

¹⁴ Ki kiweekyi Israel nganasook che kiga koibe Philistiik, kobooch Ekron kot koit Gath, ak ki iweek Israel kiwotennyi eng' eutap Philistiik. Ki piit kaalyeet eng' kwenutap Israel ak Amorik.

¹⁵ Ki irwookyi `Samuel Israel eng' peetuusyek tugul che po sabeennyi.

¹⁶ Kiwendi eng' kenyiit age tugul komuutoti Bethel, Gilgal ak Mispa, ak ki irwookyi Israel eng' komoswechooto tugul.

¹⁷ Kiweekyingei Ramah, amu kimi koonnyi yooto ak ki irwookyi Israel eng' olooto, ak kiteekyi Kamuktaindet ne Toroor kaptisisyet eng' yooto.