1 SAMUEL 5 - BUKUIT NE TILIIL Sireet ne Dutero Kanon

Komi moinget Ashdod ak Ekron

¹ Kingo luul Philistiik moingetap Kamuktaindet, koip eng' Eben-haezer kwo Ashdod.

² Ki ip Philistiik moingonooto po Kamuktaindet ak konde kootap Dagon, ole neegitee Dagon.

³ Ye kingo ng'eetyo piigap Ashdod karon miising' eng' peetuutap aeng' ko kiga koluul Dagon kosyep moo eng' taitap moingetap Kamuktaindet ne Toroor. Ki ing'eet Dagon ak konde komostanyi kogeny.

⁴ Ago ye kingo ng'eetyo karon miising' eng' peetuutap somok, ko kogoluul Dagon kogeny kosyep moo eng' taitap moingetap Kamuktaindet ne Toroor. Kiga kong'et metitap Dagon kobooto eunekyik tuwai, ak ki ruei eng' kurgat. Ki ng'eet ineegei poorto komugul.

⁵ Nooto anyun amu nee si agoi ra ko matyechei kurgeetap Dagon eng' Ashdod tisiigap Dagon ak tugul che chutei hekaluutap Dagon.

⁶ Kinyigiisyi `eutap Kamuktaindet ne Toroor piigap Ashdod ak kogoochi icheek koaragenso ak kobire myando ne ibwansei Ashdod komugul ak kiwotosyekyik.

⁷ Kingo keer piigap Ashdod tuguuk che ki yaagiis, kole, “Ma kotebyei moingetap Kamuktaindetap Israel kobootech amu kagong'wanit eunnyi eng' acheek ak eng' Dagon kamuktaindennyo.”

⁸ Ki iyookto che kiyooktoi kole kiyum kiptainik tugul che po Philistiik kobwa ole mi icheek ak koleenji, “Kilyonjini moingetap Kamuktaindetap Israel?” Kowol kole, “Ngeip moingetap Kamuktaindetap Israel kot koit Gath.” Ki ip anyun moingetap Kamuktaindetap Israel.

⁹ Ago ye kingo kagoip, konyaliil `Kamuktaindet ne Toroor nganasanooto eng' kanyaliilet ne oo miising'. Ki pir piik che mengech ak che eecheen che po nganaseet ak ki mang'une icheek myando ne ibwansei.

¹⁰ Ki iyookto moingetap Kamuktaindet kwo Ekron. Kingo it moingetap Kamuktaindet Ekron, kowaach Ekronik kole, “Kagoibwech moingetap Kamuktaindetap Israel konyo kobarech ak piikyok.”

¹¹ Ki iyookto ak icheek che kiyooktoi ak koyum kiptainik tugul che po Philistiik kotuiyo ak kole, “Oiste moingetap Kamuktaindetap Israel kwo si ma parech ak piikyok.” Amu ki piit kanyaliilet ne po meet eng' nganaseet komugul ak konyigiisyi miising' eutap Kamuktaindet olooto.

¹² Piik che ma pek ko ki kibiree myando ne ibwansei; kitogosta kipsengwet riiregap nganaseet.