1 SAMUEL 29 - BUKUIT NE TILIIL Sireet ne Dutero Kanon

Keonei Daudi eng' lugeetap Philistiik

¹ Ki iyumji anyun `Philistiik lugosyekwak tugul Apek: ak ki teech Israel ye neegitee kondap peek ne mi Jezreel.

² Kingo pendi kiptainigap Philistiik, kobee pogolwogik ak eliphuusyek, kogiletu Daudi ak piikyik kobooto Akis.

³ Kiteep `pounigap Philistiik kole, “Yaei nee Hebranichu?” Ak ki wolji `Akis pounigap Philistiik koleenji, “Niito ko Daudi niito otwogindetap Saulo laitoryatap Israel, ne mi kobooto eng' peetuusyechu anan eng' kenyisyechu, ak tomo anyooru leluut eng' ineendet.”

⁴ Ago ki nereekyi `ineendet pounigap Philistiik. Ki leenji pounigap Philistiik ineendet, “Ileenji chiichi koweek, koweektagei oldanyi ole ki iboorchi amat kochoortagei kwo lugeet kobootech si ma ek punyondennyo eng' ole mi lugeet, Nee ne igoochin konamgei ak kiptaiyandennyi? Tos ma eng' metowegap pichu?

⁵ Tos ma Daudi niito, ne kityenjingei icheek agobo ineendet eng' ureryosyek kole, ‘Ki par `Saulo eliphuusyek, kobar `Daudi tamanusyegap eliphuusyek.’ ”

⁶ Ara ki kuur anyun `Akis Daudi ak koleenji, “Ko uu ye sabei Kamuktaindet ne Toroor, ko ki itebi eng' imanda ak myee eng' tainnyu mandaeng'ung' ak nyonuneng'ung' kobooto eng' lugeet. Amu tomo anyoorchin yaityet kobooch inyoo ole ami agoi rani, agot nganda uu nooto, koma chamin kiptainik.

⁷ Ara anyun weektegei, ui eng' kaalyeet si megoochi kiptainigap Philistiik konereekso.”

⁸ Ago ki leenji `Daudi Akis, “Koayai nee? Ak koinyoorchi nee otwogindeng'ung' kobooch ye ki ami taing'ung' agoi rani, si ma we kebarge ak puunigap kiptaiyandennyu laitoryat?”

⁹ Kowolji `Akis Daudi koleenji, “Angen ale ii myee eng' tainnyu ko uu malaikaiyatap Kamuktaindet, ago kagomwa pounigap Philistiik kole, ‘Ma kibendi tugul lugeet kobooto ineendet.’

¹⁰ Nooto anyun, muste karon kobooto otwogigap kiptaiyandeng'ung' che koobwane tugul: ak ye ong'eetyee karon ko kaeech ko kalapkeit, obe.”

¹¹ Ki ng'eet anyun `Daudi karon miising' ak piikyik, si koba karon koweektagei emetap Philistiik, ak kitogosta Philistiik koba Jezreel.