1 SAMUEL 28 - BUKUIT NE TILIIL Sireet ne Dutero Kanon

Saulo ak kwony kobun Endor

¹ Ki iyum Philistiik lugosyekwak eng' peetuusyechooto koba lugeet kobargei ak Israel. Ki leenji `Akis Daudi, “Nai komyee ile kibendi tuwai lugeet kobooto mureniguk.”

² Kowolji `Daudi Akis koleenji, “Nooto anyun, inae kiit ne yaei otwogindeng'ung'.” Koleenji `Akis Daudi, “Nooto anyun, ayain iegu ne iriibwa metinnyu agoi.”

³ Eng' kasarata, ko kiga kome Samuel ak kiga koriirchi Israel tugul ineendet ak kotupchi ineendet Ramah, nganasennyi. Kiga koon `Saulo che kiboisyee oik ak chepsogeinik eng' emet.

⁴ Ki iyumgei `Philistiik ak koba koteech Sunem, ak ki iyum `Saulo Israel tugul ak koteech Gilboa.

⁵ Kingo keer `Saulo lugeetap Philistiik, koywei ak ki rukrugen muguleldanyi miising'.

⁶ Ye kingo leen koteebe `Saulo Kamuktaindet ne Toroor, koma kowolji `Kamuktaindet ne Toroor eng' karwotitaosyek anan eng' Urim, anan eng' maotik.

⁷ Koleenji anyun `Saulo otwogikyik, “Ocheeng'wo kwondo ne poisyee oik, si awo ole mi ineendet ak ateepse.” Ak ki wolji `otwogikyik ineendet, “Mi kwony agenge En-dor ne ng'oorsei.”

⁸ Kiwalgei `Saulo kolaach ngoroik alak yeityo kwo ineendet kobooto piik aeng' ak ki it kemoi ole ki mi kwonyooto. Ki leenji `Saulo kwonyooto, “Asoomin ale ng'oorsewa eng' oindet ak imutwaa kotogos chii age tugul ne amwaun kainennyi.”

⁹ Koleenji `kwonyooto ineendet, “Ingen inyee kiit ne ki koyai `Saulo koisto eng' emet icheeget che poisyee oik, ak chepsogeinik. Amu nee si iriich saboondanyu, igoono ame?”

¹⁰ Ki iyasyechi `Saulo ineendet eng' Kamuktaindet ne Toroor koleenji, “Ko uu ye sabei Kamuktaindet ne Toroor, koma mi pireet ne inyooru agobo kiito.”

¹¹ Ki le anyun `kwonyooto, “Ng'oo ne imache amutun kotogos?” Ak ki le, “Imutwaa Samuel kotogos.”

¹² Kingo keer `kwonyooto Samuel, kowaach eng' kutit ne oo ak komwachi Saulo koleenji, “Amu nee si igena? Ii Saulo inyee.”

¹³ Koleenji `laitoryat ineendet, “Meiywei, igeere nee?” Ak ki leenji `kwonyooto Saulo, “Ageere kamuktain ne togosu eng' ng'wony.”

¹⁴ Koteebe `Saulo ineendet koleenji, “Tinyei itoondo nee?” Kowol kole, “Poiyot ne togosu ne ilaachi ngoryeet.” Konai Saulo kole Samuel nooto, ak ki ing'uruuk kot kotiiny togeennyi ng'wony kogutung'ji.

¹⁵ Ki mwachi `Samuel Saulo koleenji, “Amu nee si iima imutwaa atogos?” Kowolji `Saulo koleenji, “Atinye nyalilda ne ng'waan amu kabwa Philistiik kebarge ak ki kometa Kamuktaindet, ama kowolwo kiy eng' maotik anan eng' karwotitaosyek. Nooto anyun kaguurin si kobiit iboorwo kiit ne ayae.”

¹⁶ Koleenji `Samuel, “Amu nee si iteebena ago ki kometen Kamuktaindet ne Toroor ak koek punyondeng'ung'?

¹⁷ Kigoboisyechigei Kamuktaindet ne Toroor ko uu ye ki mwa eng' anee. Ki kobetenen Kamuktaindet ne Toroor laitornatet ak kogoochi chiitap kokweng'ung' Daudi.

¹⁸ Amu ma igas iit kutitap Kamuktaindet ne Toroor ama isuldochi nereegekyik che koroomen eng' Amelek, ko kayaun anyun Kamuktaindet ne Toroor kii rani amu nooto.

¹⁹ Kogeny, kondai `Kamuktaindet ne Toroor Israel eunegap Philistiik kobooten aginye. Omite mutai kobooto, inyee ak weeriiguk; ak kogeny kondoi `Kamuktaindet ne Toroor lugeetap Israel eunegap Philistiik.”

²⁰ Ki ibutyi ng'wony Saulo anyun kogutuny, ak ki aragen miising' amu ng'aleegap Samuel. Ki ma kota kotinyei kimnateet, amu ki ma amis eng' peetuut komugul anan kemout komugul.

²¹ Kingo nyo `kwonyooto ole mi Saulo ak kogeer kole tinyei arageneet ne oo, koleenji ineendet, “Kagas cheptong'ung' ne otwogindet ng'aleeguk ak kaande saboondanyu eunnyu, ak kaayai ng'aleek che kemwaiwo.

²² Asoomin anyun ale, igas ng'aleegap cheptong'ung' ne otwoget, ak chamwo aibun amitwogik tutigin ande taing'ung', iam, si kobiit isich kimnateet eng' pandang'ung'.”

²³ Ago ki eesyo Saulo ak kole, “Ma ame.” Ago kingo pirchi ineendet otwogikyik ak kwonyooto, kogas ng'aleekwak. Ki ng'eet eng' ng'wony ak kotebee itoogut.

²⁴ Ki tinyei kwonyooto eng' ko moita ne neraat. Ara kichaakta kwo koeny. Ki inem peek ak kokwany ak kobeel magatiinik che ma kinde mermereek.

²⁵ Yeityo koip amitwogichooto ak kogoochi Saulo ak otwogikyik koam. Ki am icheek yeityo kong'eetyo ak koba pandanywa kemounooto.