1 SAMUEL 23 - BUKUIT NE TILIIL Sireet ne Dutero Kanon

Komwee `Daudi Saulo

¹ ki ngemwachi Daudi keleenji, “Paregei Philistiik ak Keila ak kochoorei tuguuk eng' rwanyut ne kiboorsee,”

² koteebe anyun Daudi Kamuktaindet ne Toroor koleenji, “Tos myee awo abar Philistichuuto?” Ak ki leenji `Kamuktaindet ne Toroor Daudi, “Ui ak ibar Philistiik ak isaru Keila.”

³ Ago ki leenji `piikyik Daudi, “Ngot kiyweisyei eng' olito po Judah, ko siirei ne tya anyun ngot keebe Keila kebarge ak lugosyegap Philistiik?”

⁴ koteebee anyun Daudi Kamuktaindet ne Toroor kogeny, ak ki wolji `Kamuktaindet ne Toroor ineendet koleenji, “Ng'eet, choortegei Keila, amu andoi Philistiik euneguk.”

⁵ Ki wo `Daudi Keila kobooto piikyik kobargei ak Philistiik. Kiluul tuukwak ak kobar piik eng' pareet ne oo. Ki sar anyun `Daudi piigap Keila.

⁶ Kingo mwechi Abiathar weeriitap Ahimelek Daudi eng' Keila, kochoorgei kotinyei ephod eng' eunnyi.

⁷ ki ngemwachi Saulo keleenji, “Kogonyo `Daudi Keila,” kole, “Kagonde Kamuktaindet ineendet eunnyu, amu kagegerchi oriit, amu ki wo nganaseet ne tinyei ormariichok ak temeleiywek.”

⁸ Ki kuur anyun `Saulo piik tugul kochoortagei koba lugeet eng' Keila, koba koyiem Daudi ak piikyik.

⁹ Ago ki nai Daudi kole chobei `Saulo yaityet agobo ineendet. Ki leenji Abiathar tisiindet, “Ibu ephod konyo yu.”

¹⁰ Yeityo komwa Daudi kole, “Ee Kamuktaindet ne Toroor, Kamuktaindetap Israel kagogas iman otwogindeng'ung' kole, machei konyo `Saulo Keila, konyo kobar nganaseet agobo anee.

¹¹ Tos indea piigap Keila eunnyi? Chorugei Saulo, ko uu ye kagogas otwogindeng'ung'? Ee, Kamuktaindet ne Toroor, Kamuktaindetap Israel, asoomin miising' ale, mwachi otwogindeng'ung'.” Kowol Kamuktaindet ne Toroor kole, “Chorugei.”

¹² Kotep `Daudi anyun kole, “Tos indea anee ak piikyuk eutap Saulo piigap Keila?” Ak ki le Kamuktaindet ne Toroor, “Indein.”

¹³ Ki ng'eet anyun Daudi kobooto piikyik che ki olo po pogol lo ak koba eng' Keila, koba oldo tugul ole ki imuuch koba. ki ngemwachi Saulo keleenji ki komwei Daudi eng' Keila, ko mata kwo.

Komi Daudi emetap tuloonook

¹⁴ Ki tebee `Daudi irimoik eng' surkwen ak ki tebee emetap tuloonook eng' surkwen ne po Ziph. Ki cheeng'ei `Saulo ineendet eng' peetuut age tugul, ago ma inde `Kamuktaindet ineendet eunnyi.

¹⁵ Kingo mi Daudi surkwen ne po Ziph eng' timiin, konai anyun kole kagonyo saang' Saulo kocheeng' saboondanyi.

¹⁶ Ki ng'eet Jonathan weeriitap Saulo ak kwo ole mi Daudi eng' timiin kogimit ineendet eng' Kamuktaindet.

¹⁷ Ki leenji ineendet, “Meiywei, amu ma nyoorun eutap kwandanyu Saulo, ak iegu laitoryat eng' Israel, ak aegu ne rubin. Agot Saulo kwandanyu kongen nooto agine.”

¹⁸ Ki iyomiskei tuwai eng' taitap Kamuktaindet ne Toroor. Ki tebee Daudi timiin ak ko ki wo Jonathan koonnyi.

¹⁹ Ki pa anyun `Sipik kotogosta ole mi Saulo eng' Gibea koba koleenji, “Tos ma unyegei Daudi eng' olinnyo eng' irimoik che mi timiin eng' tulweetap Hakila, ne mi murot tai ne po surkwen?

²⁰ Ara anyun, ee laitoryandani nyoo choorugei ko uu mageet tugul ne po saboondang'ung', poisyennyo koginde ineendet eutap laitoryat.”

²¹ Kowol `Saulo kole, “Ingoberuurok Kamuktaindet ne Toroor, amu kaorireena.

²² Asoomok anyun ale oba ocheeng' komyee si ogeer ak onai ole mi, onai ineendet ne keerei ineendet eng' olooto, amu ki kimwaiwo keele poisyee ng'aalseet.

²³ Ogeer anyun ak onai komoswek tugul ole ung'egei yeityo obwa kogeny yu ami oibu ng'aleek che po iman, si keebe tugul. Ngot komi emoni, acheeng'oti eng' eliphuusyek tugul che po Judah.”

²⁴ Ki ng'eetyo koba Ziph kondoe Saulo, ago kimi Daudi ak piikyik surkwen ne po Maon eng' Arabah murot tai ne po surkwen.

²⁵ Ki pa Saulo ak piikyik koba kocheeng' ineendet. Ak ki ngemwachi Daudi, kochoortagei anyun kwo ole mi rwandet, ak ki tebee surkwen ne po Maon. Kingo kas Saulo, kwo koosup Daudi eng' surkwen ne po Maon.

²⁶ Ak ki pun Saulo tulweet komosi, ak ki pun Daudi ak piikyik tulweet komosin. Kichaakta Daudi komwei amu ki iywei Saulo, amu kiyiem `Saulo ak piikyik Daudi kobooto piikyik kole konam.

²⁷ Ago ki nyo chii komwachi Saulo koleenji, “Nyoo chogu, amu kagopookyi emet Philistiik.”

²⁸ Ki week anyun `Saulo mata koosup Daudi ak ki wo kobargei ak Philistiik. Kiguure yooto anyun Sela-hamalekot.

²⁹ Ak kitogosta Daudi eng' yooto kwo komeny irimoigap En-gedi.