1 SAMUEL 21 - BUKUIT NE TILIIL Sireet ne Dutero Kanon

Komwechin Daudi Nob ak Gath

¹ Ki wo anyun Daudi Nob kap Ahimelek tisiindet. Ki nyo Ahimelek kotorook Daudi kobotanonu ak koleenji, “Amu nee si imi inyegei? Amu nee si ma mi chii kobooten?”

² Kowolji `Daudi Ahimelek tisiindet koleenji, “Kang'ata laitoryat komwaiwo ng'olyoo kole, Mat igany konai chii agobo ng'olyoondoniito kayooktochin, anan agobo kiit ne kang'atiin. Agobo murenik che cham kemi tugul, ko kang'at icheek koba uiya.

³ Ara itinye nee anyun nguno eng' eung'ung'? Koono magatiinik muut anan ko kiit age tugul ne itinye.”

⁴ Ago ki wolji `tisiindonooto Daudi koleenji, “Ma mi magatiinik che ma itabaanatiin, kobatee magatiinik che tiliileen. Agoonin ngot ko koitabaangei murenjoto eng' kwonyiik.”

⁵ Kowolji `Daudi tisiindonooto koleenji, “Eng' iman, ko kitabaanenech kwonyiik eng' peetuusyechu somok, ko uu uitugul ye cham awendi lugeet. Ngot kocham kotabaanotiin tuguugap murenik agot eng' pandap peetuusyek tugul, ko tos anyun itabaanatiin tuguukwak ne tya ra?”

⁶ Kogoochi anyun `tisiindet ineendet magatiinik che itabaanatiin, amu ki ma komi magatiinik alage kobatee magatiinik che itabaanatiin, che ki kinemu eng' taitap Kamuktaindet ne Toroor. Ki kinemu si kinde magatiinik che kabunu ma eng' peetuut ne kagiisto che kami.

⁷ Ki mi yooto chiito age ne po otwogigap Saulo eng' peetuunooto ne ki kiraany kotebi eng' taitap Kamuktaindet ne Toroor. Kainennyi ko ki Doeg, Edomindet. Ineendet ko ki ne oo eng' mestowegap Saulo.

⁸ Ki teebe `Daudi Ahimelek koleenji, “Metinye eng' yu ng'otit anan ko rotwetap chok eng' eung'ung'? Ma aibu rotwennyu anan ko kariikyuk, amu komachei poisyetap laitoryat kechokyi.”

⁹ Kowol tisiindonooto kole, “Mi yu rotwetap chok ne po Goliat Philistindoni ki ibare eng' atebweetap Elah. Ki kitaae angeet ak miitei eng' patetap ephod. Ngot imache iip nooto, iip, amu ma mi age yu kobatee nooto.” Kole `Daudi, “Ma mi age ne kergei, koono nooto.”

¹⁰ Ki ng'eet anyun `Daudi komwei peetuunooto amu ki iywei Saulo ak kwo kap Akis laitoryatap Gath.

¹¹ Ago ki leenji `otwogikyik Akis, Tos ma Daudi niito laitoryatap emet? Tos ki ma tyenjigei icheek agobo ineendet eng' ureryosyek kole, “Ki par `Saulo eliphusyekyik, Kobar `Daudi tamanusyegap eliphuusyek?”

¹² Kigonor `Daudi ng'aleechuuto eng' muguleldanyi; ak ki iywei `Akis laitoryatap Gath Daudi miising'.

¹³ Ara ki wal atebeennyi eng' tainnywa ak ki yaigei koigei kibiywet eng' eunekwak, ak kisirasir kurgotigap ormariichet ak kobagaakta meninek kochoortaegei tamnennyi.

¹⁴ Ki leenji anyun `Akis otwogikyik, “Ogeero, ogeere ole kibiywo chiichi! Amu nee anyun si omutwaa?

¹⁵ Tos korerwo kibionik kot omutwaa chiichi konyo koiiywen eng' tainnyu? Tos nyolu konyo chiichi koonnyu?”