1 SAMUEL 19 - BUKUIT NE TILIIL Sireet ne Dutero Kanon

Kowechei `Saulo Daudi

¹ Ki ng'alaalji `Saulo Jonathan weeriinnyi kobooto otwogikyik tugul koleenji kobar Daudi.

² Ago ki paibai miising' Jonathan weeriitap Saulo agobo Daudi. Ara ki mwachi `Jonathan Daudi koleenji, “Cheeng'ei abbannyu Saulo kobarin. Nooto anyun asaain miising' ale, riipkei karon ak itebi eng' ung'oot iunyge.

³ Amandai ak awe atonon eng' ye neegitee abba eng' keeweet eng' ole imi ak keng'alaal ak ineendet agobo inyee. Ngot ageer kiy amwaun.”

⁴ Ki ng'alaalji `Jonathan Saulo kwandanyi ak kochoi Daudi koleenji, “Amat koyachi tengek laitoryat otwogindennyi Daudi, amu ma yaun tengek ak amu kagomyagitu miising' poisyonikyik che kogoyaun.

⁵ Ma iit saboondanyi ak kogobar Philistindet ak ki yai Kamuktaindet ne Toroor yetunet ne oo agobo Israel tugul. Ki igeer kioto aginye ak ki ibaibaitu, amu nee anyun si iyachi tengek korotiik che ma tinyei tengek, ibar Daudi puch?”

⁶ Ki kas `Saulo ng'olyootap Jonathan, ak koyasyo Saulo kole, “Ko uu ye sabei Kamuktaindet ne Toroor, koma ki parei ineendet.”

⁷ Ki kuur anyun `Jonathan Daudi ak komwachi ineendet tuguuchooto tugul. Ki imut `Jonathan Daudi kwo ole mi Saulo ak ki tebee tainnyi ko uu eng' tai.

⁸ Ki piit lugeet kogeny, ak kimanda Daudi kwo kobargei ak Philistiik. Ki par icheek eng' pareet ne oo kot komweiso eng' tainnyi.

⁹ Ago ki nyoonji Saulo `tamirmiryet ne ya ne ki punu Kamuktaindet ne Toroor ye kitebyei eng' koonnyi kotinyei ng'otit eng' eunnyi. Kibutei Daudi kibugandet eng' eunnyi.

¹⁰ Kileen Saulo kotoor Daudi eng' ng'otit kosoree inaat, ago kichilil eng' taitap Saulo, ak kitoor inaatut eng' ng'otit. Kochilil Daudi ak komwei kemounooto.

¹¹ Ki iyookto `Saulo piik koba kootap Daudi koriip ineendet kole si kobar ineendet karon. Ki mwachi Daudi `Mikal osotyonnyi koleenji, “Ngot ko mesaru saboondang'ung' kemouni kebarin mutai.”

¹² Ki choorta anyun `Mikal Daudi kwo ng'wony kobun tirisyet, ak ki mwei kochilil.

¹³ Ki nam `Mikal kanamwet ak komogon eng' itoogut ak kotichine metit mutoit ne po koroorigap ng'oroorek yeityo kotuge ngoroik.

¹⁴ Ye kingo yookto `Saulo piik koba konam Daudi, komwa kwondonyi kole, “Myani.”

¹⁵ Ki iyookto `Saulo pichooto koba kogeer Daudi ak koleenji, “Omutwaa konyo eng' itogunnyi si abar.”

¹⁶ Kingo pwa ko pichooto, konyoor komi kanamwet itook ak komi metinnyi mutoinotap koroorigap ng'oroorek.

¹⁷ Ki leenji `Saulo Mikal, “Amu nee si igena ko uu ni ak ichuunde punyondennyu kwo kot ko nguno ko kagochilil?” Kowolji `Mikal Saulo koleenji “Ki leenjo, pagaakta awo. Kalya si imach abariin?”

¹⁸ Kimwei anyun Daudi, kochilil ak kwo ole mi Samuel eng' Ramah. Ki wo komwachi tuguuk tugul che ki yachi ineendet Saulo. Yeityo koba tuwai ak Samuel koba komeny Naiot.

¹⁹ Ki kimwachi Saulo keleenji, “Keero, miitei Daudi Naiot eng' Ramah.”

²⁰ Ara anyun ki iyookto `Saulo piik koba konam Daudi, ak kingo keer tuiyetap maotik komaotendos ng'aleek, kotononi Samuel kondochin icheek, konyonji `Kabuusetap Kamuktaindet piigap Saulo ak komaotenso ak icheek.

²¹ ki ngemwachi Saulo ng'aleechooto, koyookto piik alak ago ki maotenso ak icheek. Ki iyookto `Saulo piik ne po somok ak ki maotenso ak icheek.

²² Ki wo ineendet agine Ramah kot koit ole mi keriinget ne oo ne po peek ne miitei Seku. Kiteep kole, “Mi ano Samuel ak Daudi?” Ak ki le chiito age, “Mi Naiot eng' Ramah.”

²³ Ki wo olooto po Naiot eng' Ramah, ak ki nyoonji ineendet agine Kabuusetap Kamuktaindet, ak ki wo komaotenot kot koit Naiot eng' Ramah.

²⁴ Ki ireek ngoroikyik ak komaoten agine eng' taitap Samuel. Ki ru aach ngor peetuunooto tugul ak kemounooto tugul. Nooto anyun kimwaei keleen, “Tos age Saulo agine eng' maotik?”