1 SAMUEL 18 - BUKUIT NE TILIIL Sireet ne Dutero Kanon

Chorwanditap Jonathan ak Daudi

¹ Ye kingo kagogees Daudi kong'alaaljindos ak Saulo, konamgei saboondap Jonathan ak saboondap Daudi. Ki cham `Jonathan ineendet ko uu saboondanyi.

² Kong'eetee peetuunooto, komut ineendet `Saulo, mata kochamji kwo kaa, kootap kwandanyi kogeny.

³ Ki iyomiskei anyun Jonathan ak Daudi, amu ki cham Jonathan ineendet ko uu saboondanyi.

⁴ Ki ireek Jonathan ngoryennyi ne po parak ne ki ilaachi ak kogoochi Daudi kobooto ngoryennyi ne kooi, rotwennyi ne po chok, kwangennyi ak pirenennyi.

⁵ Ki wo Daudi oldo age tugul ole ki iyookto Saulo, ak ki tebi eng' ng'omnateet. Ki inde `Saulo ineendet koboi murenigap lugeet ak ki myeeit kioto eng' taitap piik tugul, ak eng' taitap otwogigap Saulo ak icheek.

Ng'etkondap Saulo agobo Daudi

⁶ Ye kingo pwanei icheek koweeksei Daudi kobunu pareetap Philistindet, komong' kwonyiik eng' nganasook tugul che po Israel kotyenonu ak kourereni kotorogu Laitoryat Saulo ak kobirei sugutisyek che mengeechen kobooto tuguuk che kibutei eng' poiboiyet.

⁷ Kityendos kwonyichooto kourerendos koleen, “Ki par Saulo eliphusyekyik, kobar Daudi tamanusyegap eliphusyekyik.”

⁸ Ki nereech Saulo kot. Ma ibaibai ineendet mwaonooto ak ki mwa kole, “Kagoiityi Daudi tamanusyegap eliphuusyek ak koiitya eliphuusyek kityo. Nee age ne kang'et ne nyooru kobatee laitornatet?”

⁹ Kobooch peetuunooto agoi, ko kigeerote kong' ne ya `Saulo Daudi.

¹⁰ Eng' peetuut ne ki isubi peetuunooto, konyonji Saulo `tamirmiryet ne ya eng' kimnateet ne ki punu Kamuktaindet. Ki ng'alaal eng' ko ko uu chii ne amei iywek, ak kibut Daudi ketubet eng' eunnyi ko uu ye ki cham koyaei peetuut age tugul. Ki tinyei Saulo ng'otit eng' eunnyi.

¹¹ Ki toorta ng'otinooto Saulo kotokyi Daudi, amu ki le, “Atoore Daudi kosore koit inaat.” Ago kichilil Daudi eng' tainnyi konyil aeng'.

¹² Ki iywei `Saulo Daudi, amu ki mi Kamuktaindet ne Toroor kobooto ineendet, ak kiga kobagaakta Saulo.

¹³ Ki isto Saulo anyun ineendet eng' ole mi, ak ki inde ineendet koek kiptaiyatap eliphuut. Ago ki indochi icheek Daudi ye kimandoi ak koweeksei.

¹⁴ Ki tebi Daudi eng' ng'omnateet eng' ortinwekyik tugul ak ki mi Kamuktaindet ne Toroor kobooto ineendet.

¹⁵ Kingo keer Saulo kotebyei Daudi eng' ng'omnateet ne oo, koywei ineendet.

¹⁶ Ago ki cham `Israel tugul ak `Judah Daudi, amu ki indochi icheeget ye kimandoi ak koweeksei.

Kotuni `Daudi cheptap Saulo

¹⁷ Ki leenji `Saulo Daudi, “Oroni cheptonyu ne oo Merap, agoonin ineendet itun. Egu kityo nyiganennyu, ak iyai lugosyegap Kamuktaindet ne Toroor.” Amu ki le Saulo, “Ma mache kotwa eunekyuk ineendet, ago ingobar ineendet eunegap Philistiik.”

¹⁸ Ak ki leenji `Daudi Saulo, “Aa ng'oo ak nee saboondanyu, anan ko ooreetap abba eng' Israel kot aegu saani eng' kaplaitoryat?”

¹⁹ Ago eng' peetuut ne kita kigoochin Daudi Merap cheptap Saulo, kigoochi Adriel Meolatindet kotun.

²⁰ Ago ki cham `Mikal cheptap Saulo Daudi. ki ngemwachi Saulo ko ki ibaibai ng'olyoondonooto ineendet.

²¹ Ki ibwaat anyun Saulo kole, “Agoochini ineendet Mikal si kobiit koek mesteet eng' Daudi, ak si kobiit kobar ineendet eutap Philistiik.” Ki mwachi anyun `Saulo Daudi koleenji ne po aeng', “Itinye kasartap aeng' iegu sandanaa eng' anee.”

²² Ki ng'at `Saulo otwogikyik koleenji, “Ong'alaal ak Daudi eng' ung'oot oleenji, ‘Keero, paibai laitoryat eng' inyee ak kochamin otwogikyik tugul,’ nooto anyun ko myee iegu saania eng' kaplaitoryat.”

²³ Ki mwachi anyun `otwogigap Saulo Daudi ng'aleechooto kogas. Ago ki mwa Daudi kole, “Ogeere ko kiit ne ming'in eng' okweek koek chii sandetap kaplaitoryat ago anee ko aa chii ne panan ne sasaat?”

²⁴ Ki mwachi anyun otwogikyik `Saulo koleenji, “Kang'alaal Daudi ko uu ni.”

²⁵ Kole Saulo, “Omwachini Daudi ko uu ni oleenjini, ‘Ma machei laitoryat kanyiok alak tugul, ago machei irirenik pogol che po Philistiik, si kobiit keyaaktoochi mugetuut puunigap laitoryat.’ ” Ki kabwaatutyetap Saulo kome Daudi eng' eunegap Philistiik.

²⁶ Kingo mwachi `otwogikyik Daudi ng'aleechuuto, kobaibait komyee Daudi koek sandanaa eng' kaplaitoryat. Kotom kogeskei peetuusyechooto,

²⁷ kong'eet `Daudi kwo kobooto piikyik kobar Philistiik piik pogol aeng'. Ki ip Daudi irirenikwak ak kogoochi laitoryat irirenichooto tugul si koek saania eng' kaplaitoryat. Ko uu nooto anyun, ko ki igoochi Saulo ineendet Mikal cheptonyi kotun.

²⁸ Kingo keer ak konai Saulo kole mi Kamuktaindet ne Toroor kobooto Daudi, ak ki cham ineendet Mikal cheptonyi,

²⁹ kotes koiywei Daudi. Ki ek Saulo puunyootap Daudi peetuut age tugul.

³⁰ Ki manda anyun pounigap Philistiik, ak ye ki cham komandoi, kotebi Daudi eng' ng'omnateet kosiir otwogik tugul che po Saulo, ak ki kigonyit kainennyi miising'.