1 SAMUEL 12 - BUKUIT NE TILIIL Sireet ne Dutero Kanon

Kosaisereti `Samuel piigap Israel

¹ Ki leenji `Samuel Israel tugul, “Ki agas ng'aleekwok eng' tuguuk tugul che ki omwaiwo, ak ki acheeng'wok laitoryat ne poiywok.

² Kobooch ra, ko egu laitoryat kandoindeng'wong'. Kaositu anee ak ko koabunji kalwal, ak nga no, komi weeriikyuk kobootok. Ki aegu kandoindeng'wong' kobooch ming'inatennyu agoi peetuuni.

³ Ang'ni anee! Obaoryanjo yaityo eng' taitap Kamuktaindet ne Toroor ak eng' taitap nenyi ne iilaat. Ki arebee ng'oo tennyi? Anan ki arebee ng'oo sigiryennyi? Anan ki aberber ng'oo? Ki aus ng'oo? Anan ki anam eng' eutap ng'oo tugun che po asoya si atuge konyekyuk? Ngo mi aweekwok.”

⁴ Kowol piik kole, “Ma iberberech anan iuseech, ak tomo inam eng' eutap chii kiy age tugul.”

⁵ Kowolji Samuel kole, “Paoryat Kamuktaindet ne Toroor agobo okweek, ak paoryat nenyi ne ki kiil eng' peetuuni, keele ma onyooru kiy eng' eunnyu.” Kowol piik kole, “Paoryat ineendet.”

⁶ Komwachi `Samuel piik koleenji, “Kamuktaindet ne Toroor ineendet ne ki leweni Musa ak Aron, ak komut kwanisyekwok kotogos eng' emetap Misiri.

⁷ Otononie anyun nguno si kobiit ateiywok eng' taitap Kamuktaindet ne Toroor agobo poisyonik tugul che po imanda che po Kamuktaindet ne Toroor che kiyaiywok ak kwanisyekwok.

⁸ “Ye kingo nyo Jakobo Misiri, ak koriirchi `kwanisyekwok Kamuktaindet ne Toroor, koyook `Kamuktaindet ne Toroor Musa ak Aron che ki imong' kwanisyekwok eng' Misiri ak kogoochi komeny olito.

⁹ Ago kiutye `icheek Kamuktaindet ne Toroor Kamuktaindennywa, ne ki aldochi icheek eutap Sisera kiptaiyatap lugeetap Hasor, ak koaldochi kora eutap Philistiik, ak eutap laitoryatap Moab si kobargei ak icheek.

¹⁰ Ki riirchi `icheek Kamuktaindet ne Toroor koleenji, ‘Ki kiplelutiin, amu kigebagaakte Kamuktaindet ne Toroor ak keoot Baalik ak Astarot. Sarwech anyun nguno eng' eutap puunikyok si keotin.’

¹¹ Ki iyook `Kamuktaindet ne Toroor Jeru-baal, Bedan, Jephta ak Samuel ak kosarwok eng' eunegap puunikwok eng' komosta age tugul ak ki omeng'iisye eng' kaalyeet.

¹² Ago ye kingo keer `Nahas laitoryatap lagogap Ammon konyonjook obargei, oleenjo, ‘Achicha, agoi kenyooru laitoryat ne poiywech nga Kamuktaindet ne Toroor Kamuktaindeng'wong' ko laitoryandeng'wong'.’

¹³ Wei, kagolewen Kamuktaindet ne Toroor anyun laitoryat koboiywok! Ang'ni anyun laitoryat ne kaolewen, nooto ne kaosoom.

¹⁴ Ngot oiywei Kamuktaindet ne Toroor ak oot ineendet, ogas iit kutinnyi, amobistoe ng'atuutyennyi, ak ngot oegu okweek ak laitoryat ne poiywok kasubiigap Kamuktaindet ne Toroor Kamuktaindeng'wong', komyeeitu anyun eng' okweek.

¹⁵ Ago ngot ko mogas iit kutitap Kamuktaindet ne Toroor, ak obistoe ng'atuutyennyi, konyalilok anyun eutap Kamuktaindet ne Toroor ko uu ye ki inyaliil kwanisyekwok.

¹⁶ Ara anyun otononse si ogeer kitap kwang'utyet ne machei koyai Kamuktaindet ne Toroor ogeere.

¹⁷ Kasarta ne po kesisyetap nganuuk ni. Aguure Kamuktaindet ne Toroor si koyook tuleet ak ropta, si onai ak ogeer ole oo tengektong'wong' ne ki oyai eng' taitap Kamuktaindet ne Toroor amu ki osoomjigei laitoryat.”

¹⁸ Ki kuur anyun `Samuel Kamuktaindet ne Toroor, ak ki iyook `Kamuktaindet ne Toroor peetuunooto tuleet ak ropta. Ki iywei piik tugul Kamuktaindet ne Toroor ak Samuel miising'.

¹⁹ Koleenji `piik tugul Samuel, “Saa igaigai Kamuktaindet ne Toroor Kamuktaindeng'ung' agobo otwogiguk si ma kibegu, amu kogetesyi tengekwogikyok tugul yaityoni, kesoomjigei laitoryat.”

²⁰ Kowolji `Samuel piik koleenji, “Amoiywei, ki oyai iman yaityoni tugul, ago amomaste obagaach Kamuktaindet ne Toroor. Ago oot Kamuktaindet ne Toroor eng' mugulelwekwok tugul.

²¹ Momaste osup tuguugap puch che ma imuuchi kotoret kiy anan kosar amu puch.

²² Kosupkei ak kainennyi ne oo, koma pagaaktoi `Kamuktaindet ne Toroor piikyik amu ki cham ineendet koyaak oegu piikyik.

²³ Eng' anee, ko ingolooit ayachi tengek Kamuktaindet ne Toroor, ak abagaakte asaiywok; atesetai aneetook eng' ooreet ne myee ak ne nyolu.

²⁴ Ne siirei tugul, ko oiywei Kamuktaindet ne Toroor kityo ak oot ineendet eng' imanit, eng' mugulelwekwok tugul, ak obwaat olete tuguuk che eecheen che ki koyaiywok.

²⁵ Amu ngot otestai eng' yaityenng'wong', kigeswok okweek ak laitoryandeng'wong'.”