1 LAITORINIK 8 - BUKUIT NE TILIIL Sireet ne Dutero Kanon

Keibu moingetap arorutyet konyo Hekaluut

¹ Ki iyum anyun `Solomon poisyek che po Israel, kandoik tugul che po ortinwek ak pounigap kwanisyegap piigap Israel kobwa ole mi Laitoryat Solomon eng' Jerusalem, koip moingetap arorutyetap Kamuktaindet ne Toroor kotogos eng' nganaseetap Daudi, ne nooto ko Zion.

² Ki iyumgei piik tugul che po Israel eng' ole kimi Laitoryat Solomon eng' igoorto, eng' arawetap Etanim, ne arawetap tisap.

³ Ki pwa poisyek tugul che po Israel ak kiganop tisiik moinget.

⁴ Ki ip Tisiik ak Lawiik moingetap Kamuktaindet ne Toroor, emait ne kituiyechin, ak tereenik tugul che tiliileen che ki mi Emait Lawiik.

⁵ Ki pwa koyumgei eng' taitap moinget, Laitoryat Solomon ak tuiyet tugul ne po Israel ak koeny keechiirek ak eiik, che chaang' che ma ki ma kimuuchi kiit.

⁶ Ki ip tisiik moingetap arorutyet ne po Kamuktaindet ne Toroor, konyo ole tebee eng' koot oriit ole-tiliil eng' ye Tiliil Miising', kurereetap kebebaigap kerubisyek.

⁷ Amu kiga iito kerubisyek kebebaikwak kouur ole mi moinget, ak ki tuch kerubisyek moinget ak keetiikyik che ki ibe.

⁸ Kigooen keetichooto miising'; ak kitaagu walisyekwak eng' ole-tiliil eng' taitap koot ne po oriit; ago ki ma ko taagu eng' saang'. Mi yooto agoi ra.

⁹ Ki ma komi kiy moingonooto oriit kobatee koik aeng' che lebeleen che ki indoi Musa eng' Horeb, ye kingo yai Kamuktaindet ne Toroor arorutyet ak piigap Israel, ye ki mong'u eng' emetap Misiri.

¹⁰ Kingo mong' tisiik eng' ole-tiliil, konyi pooldet kootap Kamuktaindet ne Toroor,

¹¹ kotko mata komuuch tisiik kobois amu pooldet; amu ki nyi kootap Kamuktaindet ne Toroor liilindap toroornatennyi.

¹² Kong'alaal anyun Solomon kole, “Ki le Kamuktaindet ne Toroor, menyei ineendet mesundeito ne oo.

¹³ Kaateegun iman koot ne imenye, komostang'ung' ne imenye koigeny.”

Kong'alaaljin `Solomon piik

¹⁴ Kiwelelgei laitoryat, ak koberuur tuiyet tugul ne po Israel, ak kitononso tuiyet tugul ne po Israel.

¹⁵ Ak ki le, “Iberuurot Kamuktaindet ne Toroor, Kamuktaindetap Israel, ne ki ng'alaalji eng' kutinnyi Daudi abba, ak kagosulda eng' eunekyik kole,

¹⁶ ‘Kobooch peetuut ne ki amutu piikyuk Israel komong' eng' Misiri, koma alewen nganas eng' ortinwek tugul che po Israel ateech koot, si kobiit kotebee yooto kainennyu; ago ki alewen Daudi koboi piikyuk Israel.’

¹⁷ Ki mi muguleldap abba Daudi kole koteekyi koot kainetap Kamuktaindet ne Toroor, Kamuktaindetap Israel.

¹⁸ Ago ki leenji Kamuktaindet ne Toroor kwandanyu Daudi, ‘Amu kimi muguleldang'ung' iteekyi koot kainennyu, ko ki iyai kiit ne myee ibwaat ko uu nooto eng' muguleldang'ung'.

¹⁹ Ago ma inyee ne teechei koyooto; ago weeriing'ung' ne mang'une poortang'ung', ineendet ne teekyin kainennyu koot.’

²⁰ Ak kagogimiit Kamuktaindet ne Toroor ng'olyoondennyi ne ki mwa; amu ki abiitu ageer kwandanyu Daudi, ak atebee ng'echereetap laitornatet ne po Israel, ko uu ye ki iyomis Kamuktaindet ne Toroor, ak koateekyi koot kainetap Kamuktaindet ne Toroor, Kamuktaindetap Israel.

²¹ Koachop eng' yooto ole tebee moinget, ne mi arorutyetap Kamuktaindet ne Toroor oriit, ne ki yai ak kwanisyekyok, ye ki imutu komong' eng' emetap Misiri.”

Saaetap Solomon

²² Ki tonon Solomon eng' taitap kaptisisyetap Kamuktaindet ne Toroor eng' taitap tuiyet tugul ne po Israel, ak kochuul eunekyik kotokyi kipsengwet,

²³ ak ki le, “Ee Kamuktaindet ne Toroor, Kamuktaindetap Israel, ma mi Kamuktaindet ne Toroor age ne uu inyee, eng' parak kipsengwet, anan eng' ng'wony oriit; ne riibei kayomiset ak rireenet eng' otwogiguk, che pendote taing'ung' eng' mugulelwekwak tugul.

²⁴ Ki isuldochi otwogindeng'ung' abba Daudi kiit ne kigeyomisyi ineendet; ee, ki imwa eng' kuting'ung', ak kaiyai eng' eung'ung' kosulda, ko uu kiit ne uu rani.

²⁵ Ara anyun, ee Kamuktaindet ne Toroor, Kamuktaindetap Israel, isuldochi otwogindeng'ung' abba Daudi kiit ne ki iyomisyi, ileenji, ‘Ma petenen chiito ne tebee ng'echereetap laitornatet ne po Israel eng' tainnyu; ngot koriip lagoguk ortinwekwak, kobendatee tainnyu ko uu ye ki iwendote tainnyu.’

²⁶ Ara anyun, ee Kiptaiyat Kamuktaindetap Israel, asaain ale ingogimiit ng'olyoondeng'ung', ne ki imwachi otwogindeng'ung' abba Daudi.

²⁷ “Ago tos meny Kamuktaindet ng'wony iman? Keero, ma yamin kipsengwet itebee, anan kipsengwet ne po parak miising', ko ming'in ne tya anyun kooi koateech!

²⁸ Ago konyit saaetap otwogindeng'ung' ak soomennyi, kas, ee Kamuktaindet ne Toroor, Kamuktaindennyu, riirek ak saaet ne saaei otwogindeng'ung' eng' taing'ung' rani.

²⁹ Ingogeer konyeguk kooi kemoi ak peet, kogeer komosta ne ki imwa ile, ‘Tebee yooto kainennyu’; si igas saaet ne saaei otwogindeng'ung' kotokyingei komosita.

³⁰ Kas soometap otwogindeng'ung', ak piiguk Israel, ye saaei kotokyingei yuto. Kas anyun eng' kipsengwet oldang'ung' ole imenye; ak ye igas, inyochigaat.

³¹ “Ngot koleelji chii chiitap kokwennyi, ak kebirchi ineendet koyasyo, konyo koyasyo eng' taitap kaptisisyeng'ung' eng' kooi,

³² igas anyun eng' kipsengwet, ak iyai, irwooksechi otwogiguk, igikyi ineendet ne kalel, si inde kotebee metinnyi ortinwekyik. Iityi imanda ineendet ne po iman, igoochi ineendet ko uu imandanyi.

³³ “Ye kibar piiguk Israel eng' taitap puunik, amu ki koyaun tengekto; ngot koweekyingei kogeny, ak kong'aany kaineng'ung', ak kosa, ak koriirchin eng' kooi,

³⁴ igas anyun eng' kipsengwet, ak inyochi kaat piiguk Israel eng' tengektonywa, ak imutu icheek kogeny kobwa emet ne ki igoochi kwanisyekwak.

³⁵ “Ye kerak kipsengwet, ak kobet ropta, amu ki koyaun tengekto, ko ngot kosa kotokyigei komosi, kong'aany kaineng'ung' ak koweek eng' tengektonywa, ye inyaliil icheek,

³⁶ igas anyun eng' kipsengwet, ak inyochi kaat otwogiguk, eng' tengektonywa ak ne po piiguk Israel, ye ineeti icheek ooreet ne myee ne nyolu kobendatee; iyookyi ropta emeng'ung', ne ki igoochi piiguk koek porotennywa.

³⁷ “Ngot kobiit rubeet eng' emet, anan ko koroito, ngot kobiit chelalityet anan ko uchatet, chereng'endet anan ko kutyet; ngot koyiem icheek puunikwak eng' emetap nganasookwak; koroito age tugul anan komi myando age tugul ne piitu,

³⁸ ngo ip saaet anan ko soomet age tugul ne kasoom chii age tugul, anan ko ne kasoom piiguk tugul che po Israel, ne naei chii age tugul myandap muguleldanyi, ak kochuul eunekyik kotokyi kooi,

³⁹ igas anyun eng' kipsengwet oldang'ung' ole imenye, ak inyochi kaat, iyai ak iyaakyi chii age tugul ko uu ortinwekyik tugul, ne ineegei muguleldanyi (amu inyee inyegei ne ingen mugulelwegap weeriigap piik);

⁴⁰ si kobiit koiywein peetuusyek tugul komenyei emet ne ki igoochi kwanisyekyok.

⁴¹ “Ko uu nooto chiito ne po pororyosyek, ne ma po piiguk Israel, ngo nyo eng' emet ne loo agobo kaineng'ung',

⁴² (amu tuun kasei icheek agobo kaineng'ung' ne oo, ak agobo eung'ung' ne kiim, eung'ung' ne chuulaat;) ye nyo ak kosa kotokyigei kooi,

⁴³ igas eng' kipsengwet oldang'ung' ole imenye, ak iyai ko uu tuguuk tugul che kaguurchin chiichooto po pororyosyek; si kobiit konai kaineng'ung' piik tugul che po ng'wony, koiywein, ko uu ye iywein piiguk Israel, ak si kobiit konai kole kooi ki ateech kemwaitoe kaineng'ung'.

⁴⁴ “Ngot koba piiguk kobargei ak puunikwak, eng' ooreet age tugul ne keyooktoe, ak kosa Kamuktaindet ne Toroor kotokyigei nganasani ki ilewen, kotokyigei kooi koateekyi kaineng'ung',

⁴⁵ igas anyun eng' kipsengwet saaennywa ak soomennywa, ak iyachi icheek kiit ne machei.

⁴⁶ “Ngot koyaun tengek, (amu ma mi chii ne ma yaei tengek,) ak inereekyi, igoochi icheek eunegap puunikwak, koluul icheek komut koba emetap puunik, ngot ko loo anan ko neegit,

⁴⁷ ago ngot kobwaatkei eng' emet ne ki kimut koek luulenik, ak kosik, koriirchin eng' emetap piik che ki imut icheek koluul, kole, ‘Kigeyai tengekto, ki keyai kiit ne imaasat, ki keyai kiit ne ya kot’;

⁴⁸ ngot koweegiyigei eng' mugulelwekwak tugul ak eng' saboonwekwak tugul, eng' emetap puunikwak che kiluul icheek, ak kosaain kotokyigei emennywa, ne ki igoochi kwanisyekwak, nganaseet ne ki ilewen, ak koot ne ki ateekyi kaineng'ung',

⁴⁹ igas anyun saaennywa ak soomennywa eng' kipsengwet oldang'ung' ole imenye ak iyachi icheek kiit ne machei.

⁵⁰ Nyochi kaat piiguk che ki koyaun tengekto, ak pistaosyekwak tugul che ki kobistaenen; ak iriiree icheek eng' taitap piik che ki imut icheek koluul,

⁵¹ amu icheek ko piiguk, poroteng'ung', che ki imutu komong' eng' Misiri, eng' kwenutap maatap karnet.

⁵² Ingogeer konyeguk soometap otwogindeng'ung', ak soometap piiguk Israel, igasyi icheek eng' sait age tugul ne kariirchin.

⁵³ Amu ki itabaan icheek eng' piik tugul che po ng'wony, koek poroteng'ung', ko uu ye ki imwa eng' Musa otwogindeng'ung', ye ki imutu kwanisyekyok komong' eng' Misiri, ee Kiptaiyat Kamuktaindet ne Toroor.”

Saaet ne po let

⁵⁴ Kingo kagogees Solomon saaet eng' saaoni ak soomet ne ki saaei Kamuktaindet ne Toroor, kong'eet eng' taitap kaptisisyetap Kamuktaindet ne Toroor, eng' ole kigutung'e kotokyin eunekyik kipsengwet.

⁵⁵ Ki tonon ak koberuur tuiyet tugul ne po Israel eng' kutit ne oo kole,

⁵⁶ “Iberuurot Kamuktaindet ne Toroor, ne Ki kogoochi kamuung'et piikyik Israel, ko uu tuguuk tugul che kiga koaror. Ma pet ng'olyoot agot agenge eng' arorutyennyi tugul ne myee, ne ki iaror eng' otwogindennyi Musa.

⁵⁷ Ingotep Kamuktaindet ne Toroor, Kamuktaindennyo kobootech ko uu ye kimi ak kwanisyekyok; amat kobagaaktech anan kometech.

⁵⁸ Ingoyai mugulelwekyok kotokyigei ineendet, kebendatee ortinwekyik tugul, keriip ng'atuutikyik, etanutikyik ak kirwoogutikyik, che ki ng'at kwanisyekyok.

⁵⁹ Ak ingoriikyi ng'aleechuchuk Kamuktaindet ne Toroor, Kamuktaindennyo, peet ak kemoi, chu kasoome eng' taitap Kamuktaindet ne Toroor, si kobiit koyachi otwogindennyi kiit ne machei, ak kiit ne machei piikyik Israel, ko uu ye machei eng' peetuut age tugul,

⁶⁰ si kobiit konai piik tugul che po ng'wony kole, Kamuktaindet ne Toroor ko Kamuktaindet; ma mi age.

⁶¹ Ingoek anyun mugulelwekwok che ititaatiin eng' Kamuktaindet ne Toroor, Kamuktaindennyo, obendate ng'atuutikyik, ak oriip etanutikyik, ko uu rani.”

Kitabaani Hekaluut

⁶² Ki igoito laitoryat kobooto Israel tugul tiseiywek eng' taitap Kamuktaindet ne Toroor.

⁶³ Ki igoito Solomon tiseiywek koek kagoochinoigap kaalyeet, che ki igoochi Kamuktaindet ne Toroor, tuuga eliphuusyek tiptem ak aeng', ak keechiirek eliphuusyek pogol ak tiptem. Kotabaan anyun laitoryat kobooto lagok tugul che po Israel, kootap Kamuktaindet ne Toroor.

⁶⁴ Ki itiliil peetuunooto laitoryat kwenutap seremut ne ki mi taitap kootap Kamuktaindet ne Toroor; amu yooto ole ki igoitoe ineendet kagoochinet ne kibeelei, ak kagoochinet ne po peek, ak mwanik che po kagoochinoigap kaalyeet: amu ki ming'in kaptisisyetap sugunwet ne ki mi taitap Kamuktaindet ne Toroor, ma yam kagoochinet ne kibeelei, ak kagoochinetap peek, ak mwanigap kagoochinoigap kaalyeet.

⁶⁵ Ki yai anyun Solomon igoorto eng' peetuusyechooto, kobooto Israel tugul, tuiyet ne oo, kong'etee ye kibunei kebendi Lebo-hamath agoi aineetap Misiri, eng' taitap Kamuktaindet ne Toroor, Kamuktaindennyo, peetuusyek tisap konyil aeng', tugul ko peetuusyek taman ak ang'wan.

⁶⁶ Ki mwachi piik koba eng' peetuutap sisiit, ak ki iberuur icheek laitoryat, ak koba emaisyekwak koboiboen, kogasategei eng' mugulelwekwak amu myeeindo tugul ne ki yachi `Kamuktaindet ne Toroor Daudi otwogindennyi ak Israel piikyik.