1 LAITORINIK 7 - BUKUIT NE TILIIL Sireet ne Dutero Kanon

Kootap Solomon ne po laitornatet

¹ Ki teech Solomon koonnyi ne po laitornatet ak ki tar kenyiisyek taman ak somok si kogees.

² Amu ki teech kootap timdap Lebanon; koindonyi ko ki mitainik artam ak ang'wan ak kebeberyat, tebeesindanyi ko ki mitainik tiptem ak aeng' ak robo, ak koindo ne po tononennyi ko ki mitainik taman ak somok ak kebeberyat, kimi tolochik eng' ortinwek ang'wan, che po taragonik ak ki kimure paragutap tolochichooto pambanik che po taragonik.

³ Ki kisyebe parak taragonik eng' pambanichooto artam ak muut, che ki mi tolochik parak, che kiga kitet koek taman ak muut eng' ooreet agenge.

⁴ Ki mi tirisyok eng' ortinwek somok, che kiga tokyin eng' ortinwek somok, che kiga tebee age paragutap age.

⁵ Ak ki aechin komoswek tugul eng' kurgotik ak tugatugik, ak kiga tokyin tirisyosyek eng' ortinwek somok.

⁶ Ki yai keterut ne po tolochik; koindonyi ko ki mitainik tiptem ak aeng' ak robo, tebeesindanyi ko ki mitainik taman ak somok ak kebeberyat. Ak keterut ne ki mi tainnywa; ak tolochik ak pambanik che nyigiisen che ki kimur che ki mi tainnywa.

⁷ Ki teech koot ne uu keterut ole tebee ng'echereetap laitornatet ole ki irwoge, nooto ko kapkirwook. Kitetee taragonik kong'etee koot ng'wony agoi tabuut.

⁸ Ak koonnyi ne ki menyei, seremut ne ki mi keter oriit, ko ki po poisyet ne uu nooto. Kiteekyi koot agine cheptap Pharaoh, (ne kiga itun Solomon,) kogergeit ak keterunooto kiga teech.

⁹ Kitegee chuuto tugul koik che po kamanuutyet ne oo, koik che ki kiwai, ko uu karagendaet, che ki kitile musumenosyek, oriit ak saang', kobooch lumeiywot kot koit parak, ak ki uu nooto agine saang' kot koit seremut ne oo.

¹⁰ Ki koik che po kamanuutyet ne oo che kitonone kot, koik che eecheen, koindonyi ko ki mitainik somok ak nusu, ak tebeesindannyi ko ki mitainik ang'wan ak nusu.

¹¹ Ak kimi paragunnywa koik che po kamanuutyet ne oo, koik che ki kiwai, ko uu karagendoet, ak keetiigap taragonik.

¹² Ki tinyei seremut ne oo koik che ki king'ote che ki kiwai che ki sooniot somok, ak ooreet ne po pambanik che po taragonik; ko uu seremutap oriit ne po kootap Kamuktaindet ne Toroor, ak keterutap koot.

Hiram, yaindetap sugunonik

¹³ Ki iyookto Laitoryat Solomon kimut Hiram eng' Tyro.

¹⁴ Ki weeriitap mosoget ne po ooreetap Naphtali, ak kwandanyi ko ki chiitap Tyro, kitang'indetap sugononik; ak ki tinyei ng'omnateet ne oo, ak kaguiyet, ak naetap musoknateet, ne yaei poisyonik tugul che po sugunonik. Ak ki nyo kaplaitoryat Solomon, ak ki yai poisyennyi tugul.

Tolochigap sugunonik

¹⁵ Ki yai tolochik aeng' che po sugunonik ne ki tinyei age tugul mitainik ang'wan kwo parak ak ki mitainik muut ak kebeberyat nyigiisindap tolochichooto ngeyiem.

¹⁶ Ki yai metowek aeng' che po sugunonik che ki kibeel kochootyo, si konde walisyegap tolochichooto; kooindap tononetap metit age tugul ko ki mitainik aeng' ak robo.

¹⁷ Ki mi kariik che regerotiin, ak tuguuk che uu nyororosyek che ki king'walng'walat, che ki po metowek che ki mi paragutap tolochik; ki tisap che po metit age tugul.

¹⁸ Ki yai anyun tolochik, ak kimi ortinwek aeng' che kiyiem paragutap karichooto regerotiin, ketuge metowek che ki mi paragutap tolochik. Ki yachi metit age ko uu nooto.

¹⁹ Ak ki po mitait agenge ak robo somok metowek che ki miitei paragutap tolochik eng' keter, che ki kilelesanjine itoonwegap taaptook.

²⁰ Ki mi metowek paragutap tolochichooto aeng' ak icheek, ole neegitee mulwet, ne ki mi ole neegitee karichooto regerotiin. Ki mi ak itoonwegap logoek ko ki pogol aeng', che kiyiem metoto age eng' ortinwek.

²¹ Ak ki lumda tolochik eng' keterutap Hekaluut: ki lumda toloito ne po komostap tai, ak koguuree kainennyi Jakin, ak ki lumda toloita ne po komostap kaataam, ak koguuree kainennyi Boaz.

²² Ki mi itoonwegap taaptook paragutap tolochichooto. Ki igeskei anyun poisyetap tolochik.

Nyanjet ne kitanyi

²³ Ki yai nyanjet ne kitanyi, ne po mitainik ang'wan ak nusu kong'etee taban agoi taban, ne ki kitainganat, ak ki mitainik aeng' ak robo koindo ne po tononennyi: ak kimi mireiywot ne po mitainik taman ak somok ak nusu.

²⁴ Ki mi mulonok ng'wonyutap mireiywot che kiyiem kotuiyo, che po mitainik taman ak somok ak nusu, che kiyieme nyanjanooto: kisoniot aeng' mulonochooto, che ki kiyaei ye ki ngeyaei nyanjanooto.

²⁵ Kiga tonone nyanjanooto itoonwegap eiik taman ak aeng', kigeerei somogu murot kaataam, kogeerei somogu cherongo, kogeerei somogu murot tai, kogeerei somogu kong'asiis. Kitonone paragunnywa nyanjanooto ak ki keer sugulumwekwak oriit.

²⁶ Tebeesindanyi ak nyigiisindanyi ko ki sendi mitainik tisap ak nusu; ak ki kiyai mireiywondennyi kogergeit ak mireiywotap kigombet, ko uu taapteet ne kaiye. Kiyamegei ak peegap litaisyek eliphuusyek artam.

Karisyegap sugunonik

²⁷ Ki yai ng'echerok taman che po sugunonik che tebee; ki mitait agenge ak robo somok kooindap ng'echereet agenge, ak ki mitait agenge ak robo somok tebeesindanyi, ak ki mitait agenge ak robo somok kooindap tononennyi.

²⁸ Ki uu ni poisyetap ng'echerochooto: ki tinyei tegeleiywek, ak kimi tegeleiywek kwenutap tuguuk che uu marugut,

²⁹ ak eng' tegeleiywechooto kimi kwenutap tuguuchooto uu marugut ko ki mi itoonwegap ng'etuunyik, eiik, ak kerubisyek; ak eng' paragutap tuguuchooto uu marugut ko ki mi kiit ne uu ng'echereet paragunnyi. Eng' ng'wonyutap ng'etuunyik ak eiik kogimitei tuguuchooto ki king'walng'walat kosongininso.

³⁰ Ki tinyei ng'echereet age tugul keelyek ang'wan che uu tirook, ak kimurtoinigap sugunonik che namei tirook. Ki tinyei tiroochooto ang'wan kariik che tiyei: ak kimi karichooto kitiie, che ki kitany, kurereetap tereet, komi tabandap age tugul tuguuchooto ki king'walng'wal.

³¹ Ak ki kakwautyet agenge ne po eut kutinnyi eng' oriit ne po metit ak eng' parak. Ak kitainganak kutinnyi, ko uu ole ki kiyaita ng'echereet ne tebee, ki sendi mitainik tamanwogik tisap; ak kimi wautik paragutap kutinnyi agine, ak ki aechin komoswekwak tugul eng' koindo, ki ma ko tainganat.

³² Ki mi kurereetap tegeleiywechooto tiroochooto ang'wanu, ak kimi kimurtoinichooto namei keelyek ole po keel. Ak kooindap tononetap tireet ko ki mitainik tamanwogik tisap ak muut.

³³ Ak ki uu yaetap tiroochooto yaetap keelyegap chepkichutit: kimurtoinikwak, ak tirookwak icheeget, ak kariik che ituitos tireet ak kungit eng' kwenut, ak kungit ineendet eng' kwenut, ko ki kitanyi chooto tugul.

³⁴ Ki mi kariik ang'wanu che kitiiei eng' luukwek ang'wan che po ng'echereet age tugul. Kinamgei ak ng'echereet kariikyik che ki kitiye.

³⁵ Ki mi paragutap ng'echereet tegeleiywot ne ki kayiem kotuiyo, ne ki koindap tononennyi ko sendimita tamanwogik tisap ak muut. Ki kanamgei ko uu nooto tiyeiywekyik ak tegeleiywekyik eng' paragutap ng'echereet.

³⁶ Ki wai itoonwegap kerubisyek ak ng'etuunyik ak tiironigap sosik eng' sanisyegap tiyeiywekyik ak eng' tegeleiywekyik, ko uu poroindo ne po age tugul, kobooto kariik che ki king'walng'wal, che kiga yiem.

³⁷ Ki yai ko uu nooto ng'echerochooto taman: ki kiyai chooto tugul kogergeit ak ki aechin tugul eng' yaeet.

³⁸ Ki yai taabook taman che po sugononik, agenge eng' chepkichutit age tugul. Ki tebeesindap taabeet age tugul ko mitait agenge ak robo somok, kiyamei taabeet agenge peegap litaisyek pogol sisiit ak tamanwogik sisiit ak ki tebee taabeet age tugul ng'echereet.

³⁹ Ki itepto ng'echerok, kotebee muutu komostap tai ne po koot, kotebee muutu komostap kaataam ne po koot. Ki inde nyanjanooto komostap tai ne po koot kogeer kong'asiis, ne po murot tai.

Tuguugap Hekaluut

⁴⁰ Ki yai Hiram taabook, kechigosyek ak taabook che mengeechen. Ki iges anyun Hiram poisyet tugul ne ki yachi Laitoryat Solomon eng' kootap Kamuktaindet ne Toroor:

⁴¹ tolochik aeng', taabook aeng' che po metowek che ki mi paragutap tolochichooto; karichooto aeng' regerotiin kotuch tabochooto aeng' che ki mi paragutap tolochik;

⁴² itoonwegap logoek pogol ang'wan che po karichooto aeng' regerotiin; ortinwek aeng' che po logoek che po karnet age tugul ne ki kireger, kotuch pagulisyechooto aeng' po metowek che ki mi paragutap tolochik;

⁴³ ng'echerok taman, ak taabookwak taman che ki mi ng'echerochooto;

⁴⁴ ak nyanjanooto agenge ak itoonwegap eiik che ki mi kurereetap nyanjanooto;

⁴⁵ tereenik, kechigosyek che eecheen, ak taabook che mengech. Ak tuguuchooto tugul che ki yachi Hiram Laitoryat Solomon, eng' kootap Kamuktaindet ne Toroor, ko ki po sugunonik che sitatiin.

⁴⁶ Ki yai laitoryat tuguuchooto eng' atebweetap Jordan, eng' ole mi meneet eng' kwenutap Sukoth ak Zarethan.

⁴⁷ Ki pagaakta Solomon karichooto tugul, ama kipiman, amu ki chaang' miising' kot ak ma imuuch chii konai nyigiisindap sugunonik.

⁴⁸ Ki yai Solomon tuguuk tugul che ki mi kootap Kamuktaindet ne Toroor: kapkorosutap thahabu, meesetap thahabu ne ki tebee magatiinik che itabaanatiin,

⁴⁹ keelyegap taisyek, kimi muutu komostap tai, komi muutu komostap kaataam eng' taitap koot ne po oriit, ki po thahabu che tiliileen, ak taaptook, ak taisyek ak kanameiywek, ki po thahabu;

⁵⁰ kigombok, magasisyek che kitile ole lalei eng' taisyek, taabook che mengeechen, kechigosyek, tereenik che ki ibe maat, ki po thahabu che tiliileen; kobooto kariik che namei kereiywotap kurgeet, che po kereiywegap kurgotigap koot ne po oriit, ole-tiliil miising', ak che po kurgotigap koot, nooto ko Hekaluut, ki po thahabu.

⁵¹ Ki igeskei anyun poisyet tugul ne ki yai Laitoryat Solomon eng' kootap Kamuktaindet ne Toroor. Yeityo koip Solomon tuguuk che kiga kotabaan Daudi kwandanyi, kobwa ko, fedha, thahabu ak tuguuk che kiboisyee ak konde ole kindoi konoraik eng' kootap Kamuktaindet ne Toroor.