1 LAITORINIK 3 - BUKUIT NE TILIIL Sireet ne Dutero Kanon

Koleweni Solomon utaatyet

¹ Ki yaigei Solomon koek tilyonut ak Pharaoh laitoryatap Misiri, ki itun cheptap Pharaoh ak komut konyo nganaseetap Daudi, kot kogees teekseetap koonnyi, kootap Kamuktaindet ne Toroor ak irimeet ne kiyiem Jerusalem.

² Ago kienyei piik tiseiywek eng' komoswek che torooreen, amu ki ma komi ko ne kiga kiteekyi kainetap Kamuktaindet ne Toroor agoi peetuusyechooto.

³ Ki cham `Solomon Kamuktaindet ne Toroor, kowendote ng'atuutigap Daudi kwandanyi; ago kienyei tiseiywek ak kobeelei nyamdutik eng' komoswek che torooreen.

⁴ Ki wo `laitoryat Gibeon kwo koeny tiseiywek eng' olooto, amu kitoroor yooto, ole oo; ki igoito Solomon kagoochinoik eliphuut che kibeelei eng' kaptisisyonooto.

⁵ Kimong'ji `Kamuktaindet ne Toroor Solomon eng' Gibeon eng' karwotitoet kemoi. Ki le Kamuktaindet, “Soom kiit ne imache agoonin.”

⁶ Ak ki le Solomon, “Ki iyachi otwogindeng'ung' Daudi abba myeeindo ne oo, ko uu ye kiwendote taing'ung' eng' imanit, ak eng' imanda, ak eng' lititindap muguleldo eng' inyee; ak ki igonorchi ineendet myeini oo, amu ki igoochi ineendet weeriit kotebee ng'echerennyi ne po laitornatet, ko uu ra.

⁷ Ak nguno anyun, ee Kamuktaindet ne Toroor Kamuktaindennyu, ki iyai otwogindeng'ung' koek laitoryat kogeer Daudi abba, ago anee, kota ko aa lakweet ne ming'in; mangen ole amandoitoi ak ole among'undoi.

⁸ Ak mi otwogindeng'ung' kwenutap piiguk che ki ilewen, piik che chaang', che ma kimuuchi kiit anan ko kerar amu chaang'indo.

⁹ Igoochi anyun otwogindeng'ung' muguleldo ne tinyei kaguiyet si korwookyi piiguk, si kobiit abesyo ne myee ak ne ya; amu ng'oo anyun ne imuuchi korwookyi pororyoning'ung'et tagunoot?”

¹⁰ Ki ibaibai Kiptaiyat ng'olyoondonooto, amu ki soom Solomon kiito.

¹¹ Ki leenji `Kamuktaindet ineendet, “Amu kaisoom kii, ama isoomjigei isap keny anan mogornatosyek, ama isoom kebar puuniguk, ago kesoomjigei kaguiyet ibesye kirwooget,

¹² nguno anyun ko kaayai ko uu ng'olyoondeng'ung'. Kaagoonin muguleldo ne utaat ak kotinyei kaguiyet; ne ki tomo kobiitu age ne ogerge, ama kobiitu age ne ogerge eng' let.

¹³ Kaagoonin agine kiit ne ma isoom, mogornatosyek ak teegisto, ne ma piitu eng' laitorinik ne ogergeitu, eng' peetuusyeguk tugul.

¹⁴ Ngot iwendotee ortinwekyuk, iriip kayomisutikyuk ak ng'atuutikyuk, ko uu ye kiwendotee Daudi kwandang'ung', atesun anyun kochang'a peetuusyeguk.”

¹⁵ Kigos anyun Solomon, ak konai kole kaagaa karwotitoet. Ki nyo Jerusalem, ak kotonon eng' taitap moinget ne po arorutyetap Kamuktaindet ne Toroor. Ki igoito kagoochinoik che kibeelei ak kagoochinoigap kaalyeet, ak koyachi igoorto otwogikyik tugul.

¹⁶ Ki pwa anyun ole mi laitoryat `kwonyiik aeng' che ki chepkugonik, kotononio eng' tainnyi.

¹⁷ Ki le kwondo age, “Ee kiptaiyandennyu, ki menye ak kwonyi koot agenge; ki asich lakweet kemi tuwai koyooto.

¹⁸ Ak eng' peetuutap somok ko kaasigisye, kosigiis kwonyi agine. Ki kimi tuwai; ki ma kemi ak too eng' ko, kobatee acheegei aeng' kityo.

¹⁹ Kime lakweetap kwonyi kemoi, amu kisyep.

²⁰ Ki ng'eet kemoi kween ak komut weeriinnyu eng' ye koami kota konuuchi otwogindeng'ung' ne chepto, ak komogonji tegeennyi, yeityo konde lakweennyi ne kagome tegeennyu.

²¹ Ye kanga ng'eet karon ale agoochi lakweet kochuchun, ageer ale kaagaa kagome; ago kanga keer komyee karon, koma weeriinnyu ne kigasich.”

²² Ago ki le ne po aeng', “Achicha! Ni kogome ko weeriing'ung' ak ni sabei ko weeriinnyu.” Kitiiyo ko uu nooto anyun eng' taitap laitoryat.

²³ Ki le anyun laitoryat: Mwaei ni kole, “Weeriinnyu ni sabei, ak weeriing'ung' ni kogome; koleen age, ‘Achicha! Kogome weeriing'ung', weeriinnyu ni sabei.’ ”

²⁴ Ki le anyun laitoryat, “Oibwa rotwetap chok!” Ak ki kiipchi laitoryat rotwetap chok.

²⁵ Yeityo kole laitoryat, “Opcheune aeng' lakweet ne sabei, si ogoochi kebeber kwondo age, ogoochi kebeber kwondo age.”

²⁶ Ki ng'alaalji kwondo ne ki nenyi lakweet ne sabei, laitoryat, amu ki riir moo agobo weeriinnyi, kole, “Ee kiptaiyandennyu, igoochi ineendet lakwani sabei, amat ibar!” Ago ki le age, “Mabunjino, ama punjinin; pchei.”

²⁷ Ki wol anyun laitoryat kole, “Ogoochi ne po tai lakwani sabei, matobar, amu ineendet ko kamennyi.”

²⁸ Ki kas Israel tugul kirwooget ne ki irwooch laitoryat; ak ki iywei laitoryat, amu ki keer kole mi utaatyetap Kamuktaindet eng' ineendet, si kobiit korwooch.