1 LAITORINIK 22 - BUKUIT NE TILIIL Sireet ne Dutero Kanon

Ng'aleegap maotyot Mikaia agobo Ahab

¹ Ki tebi Syria ak Israel koma mi lugeet kwenunnywa eng' kasartap kenyiisyek somok.

² Ak eng' kenyiitap somok, kochoorgei Jehoshaphat laitoryatap Judah konyo kaplaitoryatap Israel.

³ Ki leenji `laitoryatap Israel otwogikyik, “Ongen ole nenyo Ramot-Gilead, kitebye, ama kibendi kerebe eng' eunegap laitoryatap Syria?”

⁴ ki teebee `ineendet Jehoshaphat koleenji, “Ichame keebe tuwai kebarge ak Ramot-Gilead?” Ki wolji `Jehoshaphat laitoryatap Israel kole, “Auu kiit ne iuu, uu piikyuk piiguk ak uu paraisisyekyuk paraisisyeguk.”

⁵ Ki leenji `Jehoshaphat laitoryatap Israel, “Asoomin ale teep eng' ng'olyootap Kamuktaindet ne Toroor rani.”

⁶ Koyum anyun laitoryatap Israel maotik, olo po piik pogol ang'wan, ak koteebe koleenji icheek, “Awe kebarge ak Ramot-Gilead, anan atebi?” Ki leenji, “Togoste! Amu indoi Kiptaiyat eutap laitoryat.”

⁷ Ago ki le Jehoshaphat, “Tos ma mi maotyotap Kamuktaindet ne Toroor age yu si keteepse ineendet?”

⁸ Ki leenji laitoryatap Israel Jehoshaphat, “Ta komi chiito agenge ne kimuuchi keteepse eng' Kamuktaindet ne Toroor, Mikaia weeriitap Imla. Ago aweche ineendet, amu ma maoteni tuguuk che myachen agobo anee, kobatee yaityet.” Ak ki le Jehoshaphat, “Amat komwa laitoryat ko uu no.”

⁹ Ki kuur anyun laitoryatap Israel kiptaiyat age ak koleenji, “Ui imutu Mikaia weeriitap Imla ichogune!”

¹⁰ Kiga tebee laitoryatap Israel ak Jehoshaphat laitoryatap Judah ng'echerokwak che po laitornatet, kolaachi ngoroikwak che po laitornatet, eng' ole paraa eng' ormariichetap Samaria; ak ki maoteni maotik tugul eng' tainnywa.

¹¹ Kiyachigei Zedekiah weeriitap Kenaana kuinoigap kariik, ak kole, “Kamwa Kamuktaindet ne Toroor ko uu ni, kole: ‘Itoortae chuuto piigap Syria, kot kogeskei.’ ”

¹² Kimaotenso maotik tugul ko uu nooto ak icheek, kole, “Togoste Ramot-Gilead, ak iboor! Amu indoi Kamuktaindet ne Toroor nganasanooto eutap laitoryat.”

¹³ Ki ng'alaalji ineendet, chiito ne kiga kiyookto koguur Mikaia, koleenji, “Keero, kamwachi maotik ng'aleek che myach laitoryat eng' kutit agenge. Asoomin ale, ingoigei ng'olyoondeng'ung' ng'olyootap age eng' icheek, ak ing'alaal ng'aleek che myach.”

¹⁴ Ago ki le Mikaia, “Ko uu ye sabei Kamuktaindet ne Toroor, ko ki it ne mwaiwo Kamuktaindet ne Toroor, amwae nooto.”

¹⁵ Kingo it ineendet ole mi laitoryat, koleenji `laitoryat ineendet, “Mikaia, kibe Ramot-Gilead kebarge, anan ki tebi?” Ak ki wolji ineendet koleenji, “Togoste ak iboor, ak indoi Kamuktaindet ne Toroor nganasanooto eutap laitoryat!”

¹⁶ Ki leenji laitoryat, “Ayosyeun konyil ata ale, amat imwaiwo kiy age kobatee imanit eng' kainetap Kamuktaindet ne Toroor?”

¹⁷ Ki le Mikaia, “Ki ageer Israel tugul ko kaiyesta eng' tuloonook ko uu keechiirek che ma tinyei mestowot. Ak ki mwa Kamuktaindet ne Toroor kole, ‘Ma tinyei chuuto kiptaiyat; ingoweek chii tugul kwo koonnyi eng' kaalyeet.’ ”

¹⁸ Ki leenji `laitoryatap Israel Jehoshaphat, “Kamamwaun ale, ma maoteni tuguuk che myach agobo anee, kobatee yaityet?”

¹⁹ Ki testai Mikaia kole, “Kas anyun ng'olyootap Kamuktaindet ne Toroor: ki ageer Kamuktaindet ne Toroor kotebyei eng' ng'echerennyi ne po laitornatet, ak kitononi lugeet tugul ne po kipsengwet eng' eunnyi ne po tai ak ne po kaataam.

²⁰ Ak ki le Kamuktaindet ne Toroor, ‘Ng'oo ne iberberi Ahab, si kwo kotogosta ak kome eng' Ramot-gilead?’ Ki mwa age ko uu ni, komwa age ko uu ni.

²¹ Yeityo komong' tamirmiryo age ak kotonon eng' taitap Kamuktaindet ne Toroor, ak kole, ‘Anee ne aberberi.’

²² Ki mwachi `Kamuktaindet ne Toroor ineendet koleenji, ‘Iberbertoi ano?’ Ak ki le, ‘Awendi ak aegu tamirmir ne kenisyei eng' kutusweegap maotikyik tugul.’ Ak ki mwa ineendet kole, ‘Iberberi ineendet ak iterteer; ui anyun ak iyai ko uu nooto.’

²³ Ara anyun, keero, kainde Kamuktaindet ne Toroor tamirmir ne kenisyei kutusweegap maotichuguk tugul. Kagomwa anyun Kamuktaindet ne Toroor yaityet agobo inyee.”

²⁴ Koriik anyun Zedekiah weeriitap Kenaana, ak korabach Mikaia matanda, ak koleenji, “Kabun ano Kabuusetap Kamuktaindet ne Toroor ak konyo kong'alaalun?”

²⁵ Ki le Mikaia, “Keero, igeere eng' peetuunooto, tuun iwendi koot ne po oriit iunyegei.”

²⁶ Ki mwa laitoryatap Israel kole, “Onam Mikaia ak oweekte omutyi Ammon pounindetap nganaseet ak Joash weeriitap laitoryat,”

²⁷ ak koleenji, “ ‘Kamwa laitoryat ko uu ni, kole: Onde chiichi korgoreet, obae ineendet amitwogigap nyalilda ak peegap nyalilda agoi aweigei eng' kaalyeet.’ ”

²⁸ Ki leenji Mikaia, “Ngot iweigei iman eng' kaalyeet, ko kaagaa ma ng'alaalena Kamuktaindet ne Toroor.” Ak kites kole, “Ogas okweek piik tugul.”

Kebare Ahab eng' Ramoth-gilead

²⁹ Ki togosta anyun laitoryatap Israel ak Jehoshaphat laitoryatap Judah koba Ramot-gilead.

³⁰ Ki leenji laitoryatap Israel Jehoshaphat, “Awalegei aegu age, ak awe lugeet, ago ilaach inyee ngoroiguk che po laitornatet.” Kowalgei anyun laitoryatap Israel koek age, ak kwo lugeet.

³¹ Kiga ng'at laitoryatap Syria kiptainik sosom ak aeng' che po kariisyekyik, koleenji, “Amat obargei ak ne ming'in anan ko ne oo, kobatee laitoryatap Israel ineegei.”

³² Kingo keer kiptainichooto po kariisyek Jehoshaphat, kole, “Iman, niito laitoryatap Israel.” Ko uu nooto kogiwelelgei kobargei ak ineendet; ak kiwaach anyun Jehoshaphat.

³³ Ago kingo keer kiptainigap kariisyek kole ma laitoryatap Israel ni, koweek, mata koosup ineendet.

³⁴ King'i chiito age kwangennyi kosapsapchi, ak kityech laitoryatap Israel ole tuiyechin kariikyik che ki ilaachi. Ki leenji anyun chiito ne kweryei chepkichutinnyi, “Imuta amanda eng' ole mi lugeet; amu kagiguotena miising'.”

³⁵ Kitesak lugeet peetuunooto, ak ki kiti laitoryat eng' chepkichutinnyi kotokyigei piigap Syria. Ki itenden korotiik eng' mook koba kobun kelutap chepkichutit, ak kime ineendet koskoleny.

³⁶ Ki piit waagaat eng' lugeet komugul komachei kororokto asiista, keele, “Ingwo chii tugul nganasennyi, ak kwo chii tugul emennyi!”

³⁷ Kingo me anyun laitoryat ko ki kisut konyo Samaria, ak ki tup icheek ineendet eng' olooto.

³⁸ Ki iuun piik chepkichutit eng' tamboiyotap Samaria; ak ki meel sesenik korotiikyik, ak ki iuunegei yooto chepkugonik, ko uu ng'olyootap Kamuktaindet ne Toroor ne ki mwa.

³⁹ Poisyonik che ng'etunotiin che po Ahab ak tuguuk tugul che ki yai, kootap kelegap peeleek ne ki teech, ak nganasook tugul che ki teech, ko tos ma siraatiin eng' kitabuutap ateptap peetuusyek ne po laitorinigap Israel?

⁴⁰ Koru anyun Ahab ak kwanisyekyik. Ki laitoran Ahasia weeriinnyi kogeer ineendet.

Koegu Jehoshaphat laitoryatap Judah

⁴¹ Ki toi kolaitoran Jehoshaphat weeriitap Asa eng' Judah eng' kenyiitap ang'wan ne po Ahab laitoryatap Israel.

⁴² Ki po Jehoshaphat kenyiisyek sosom ak muut ye ki tau kolaitorani. Ki laitoran kenyiisyek tiptem ak muut eng' Jerusalem. Ki kiguure kamennyi Hasubah cheptap Sili.

⁴³ Kiwendote ortinwek tugul che po Asa kwandanyi; ma masta eng' ortinwechooto, ki yai ne myee eng' taitap Kamuktaindet ne Toroor. Nganda ki ma kiisto komoswek che torooreen, ak kita koenyei piik tiseiywek ak kobeelei nyamdutik eng' komoswechooto torooreen.

⁴⁴ Ki yai kaalyeet Jehoshaphat ak laitoryatap Israel.

⁴⁵ Poisyonik che ng'etunotiin che po Jehoshaphat, ak kimnateennyi ne ki iboor, ak ole kiyaita lugoosyek, ko tos ma siraatiin eng' kitabuutap ateptap peetuusyek ne po laitorinigap Judah?

⁴⁶ Ki isto eng' emet sodomik che kiga ng'et eng' peetuusyegap kwandanyi Asa.

⁴⁷ Ki ma komi laitoryanda Edom; ki pou emet chiito ne kirubei laitoryat.

⁴⁸ Ki yai Jehoshaphat melisyegap Taris si koba Opir koip thahabu, ago ma pa; amu kibutok melisyechooto eng' Esion-geber.

⁴⁹ Koleenji anyun `Ahasia weeriitap Ahab Jehoshaphat, “Chamji otwogikyuk koba ak otwogiguk eng' melisyek.” Ago ma cham Jehoshaphat.

⁵⁰ Ki ru Jehoshaphat ak kwanisyekyik ak ki kitupchi ole ki kitupchi kwanisyekyik eng' nganaseetap Daudi kwandanyi. Ki laitoran Jehoram weeriinnyi kogeer ineendet.

⁵¹ Ki toi kolaitoran Ahasia weeriitap Ahab eng' Israel eng' Samaria, eng' kenyiitap taman ak tisap ne po Jehoshaphat laitoryatap Judah, ak ki laitoran kenyiisyek aeng' eng' Israel.

Koegu Ahasia laitoryat eng' Israel

⁵² Ki yai ineendet yaityet eng' taitap Kamuktaindet ne Toroor, ak kowendote ortinwegap kwandanyi, ak ortinwegap kamennyi ak ortinwegap Jeroboam weeriitap Nebat, ne ki ibeete Israel si koyai tengekto.

⁵³ Ki oot ak kogutung'ji Baal, ak kotach Kamuktaindet ne Toroor, Kamuktaindetap Israel, konereech, ko uu tuguuk tugul che kiga yai kwandanyi.