1 LAITORINIK 21 - BUKUIT NE TILIIL Sireet ne Dutero Kanon

Mbareetap sabibuk ne po Nabot

¹ Kingobata tuguuchooto, ko ki tinyei Nabot Jesreelindet mbareetap sabibuk, ne ki mi Jezreel, ne riikyin kootap Ahab laitoryatap Samaria.

² Ki mwachi `Ahab Nabot, koleenji, “Koono mbareeng'ung' ne po sabibuk, ayai koek kabungut, amu neegitee koonnyu. Ageerunenen mbareet age ne po sabibuk ne karaaran kosiir niito, anan ngot igeere komyee eng' inyee, agoonin kamanuutyennyi eng' silingisyek.”

³ Ago ki leenji `Nabot Ahab, “Ma chamwo Kamuktaindet ne Toroor agoonin poroteetap kwanisyekyuk.”

⁴ Ki nyo Ahab koonnyi eng' muguleldo ne nyigiis, ak konereechi amu ng'olyoot ne kamwachi Nabot Jesreelindet, amu kiga leenji, “Ma koonin poroteetap kwanisyekyuk.” Ki ru eng' itogunnyi, kolit oliin ak koeesyo koamis.

⁵ Ki nyo Jesebel kwondonyi ole mi ineendet ak koleenji, “Amu nee si koma paibai saboondang'ung' ko uu ni, kot ko memache iamisye?”

⁶ Ki leenji ineendet, “Amu kamwachi Nabot Jesreelindet aleenji, ‘Koono mbareeng'ung' ne po sabibuk aal eng' silingisyek, anan ngot igeere ko myee eng' inyee, agoonin mbareet age ne po sabibuk kewale.’ Ago kawol kole, ‘Ma koonin mbareennyu ne po sabibuk.’ ”

⁷ Ki leenji `Jesebel osotyonnyi ineendet, “Tos ibou nguno pororyetap Israel? Ng'eet ak iamisye! Ingobaibait muguleldang'ung'. Agoonin mbareetap sabibuk ne po Nabot Jesreelindet.”

⁸ Kosir anyun paronok eng' kainetap Ahab, ak kong'ooch eng' ng'ooksetap Ahab, ak koyookyi paronochooto poisyek ak piik che taagunotiin che ki mi nganasennyi che kimeng'jindos ak Nabot.

⁹ Ki sir eng' paronochooto kole, “Omwaite karugutetapkei ak onde Nabot taitap piik.

¹⁰ Onde piik aeng' tainnyi, weeriigap Belial, ak ongobaoryan kotaam ineendet, kole, ‘Kechup inyee Kamuktaindet ak laitoryat.’ Yeityo omut ineendet kwo saang', ak olach eng' koik, kome.”

¹¹ Ki yai piigap nganasennyi kobooto poisyek ak piik che taagunotiin che ki menyei nganasennyi, ko uu ye kiga iyookyi parweet Jesebel, ko uu ye kiga sir eng' paronok che kiga iyookyi icheek.

¹² Kimwaita karugutetapkei ak konde Nabot taitap piik.

¹³ Ki pwa ko piik aeng'u, weeriigap Belial, ak kotebi ng'wony eng' tainnyi. Kibaoryan kotaam ineendet, pichooto po Belial, kogen agobo Nabot eng' taitap piik, kole, “Kachup Nabot Kamuktaindet ak laitoryat.” Komut anyun ineendet komaanda eng' nganaseet ak kolach ineendet eng' koik, kome.

¹⁴ Ki kiyookto anyun kemwachi Jesebel keleenji, “Kagelach Nabot eng' koik, ak kagome.”

¹⁵ Kingo kas Jesebel kole, kagelach Nabot eng' koik ak kagome, koleenji `Jesebel Ahab, “Ng'eet, nam mbareetap sabibuk ne po Nabot Jesreelindet kobunjiin, ni kietei kogoonin ial eng' silingisyek. Ma kosabei ineendet, ago kagome.”

¹⁶ Kingo kas Ahab kole kagome Nabot, kong'eet ak korekto kwo mbareetap sabibuk ne po Nabot Jesreelindet, kwo konam kobunji.

Elijah ak ng'olyoot ne punu Kamuktaindet ne Toroor agobo Ahab

¹⁷ Ki nyoonji `ng'olyootap Kamuktaindet ne Toroor Elijah Tisbindet, koleenji:

¹⁸ “Ng'eet choortegei otuiye ak Ahab laitoryatap Israel, ne menyei Samaria. Mi ineendet mbareetap sabibuk ne po Nabot ole kachoorchigei kwo konam kobunji.

¹⁹ Ing'alaalji ineendet ileenji, ‘Kamwa Kamuktaindet ne Toroor ko uu ni, kole: Kaibar ak kenam kobunjiin?’ Ak imwachi ileenji, ‘Kamwa Kamuktaindet ne Toroor ko uu ni, kole: Ole kimele sesenik korotiigap Nabot, komele yooto sesenik korotiguk ak icheek.’ ”

²⁰ Ki leenji `Ahab Elijah, “Kainyoorwo, punyondennyu?” Ki wol kole, “Ee, kaanyoorun! Amu kaialdegei iyai yaityet eng' taitap Kamuktaindet ne Toroor.

²¹ ‘Aibun yaityet, ak abukten ibet, ak aiste eng' kap Ahab lakweet age tugul ne weeriit, ak ineendet ne kerat kobooto ne ityagat eng' Israel.

²² Ayae koong'ung' kogergeit ak kootap Jeroboam weeriitap Nebat, ak kogergeit ak kootap Baasha weeriitap Ahija, amu taget ne kiitacha anereech ak igoochi Israel koyai tengekto.’

²³ Mwaei Kamuktaindet ne Toroor agobo Jesebel agine, kole: ‘Amei sesenik Jesebel eng' ye neegitee irimeetap Jezreel.

²⁴ Amei sesenik ineendet ne po kap Ahab ne meei eng' nganaseet ak ne meei eng' timiin koamei toriitik che po parak.’ ”

²⁵ (Ago kitom kobiit age ne ki igei Ahab ne ki aldagei koyai yaityet eng' taitap Kamuktaindet ne Toroor, ne ki ing'eetyin Jesebel osotyonnyi.

²⁶ Ki yai tuguuk che kiwechei miising' eng' kasubetap kanamonik, ko uu tuguuk tugul che kiyaei Amorik, che ki oon Kamuktaindet ne Toroor eng' taitap piigap Israel.)

²⁷ Kingo kas Ahab ng'aleechooto, kogereer ngoroikyik, kolaach kuniet ak korugutkei. Kisyep kuniet ak koming'ingei.

²⁸ Ki nyoonji `ng'olyootap Kamuktaindet ne Toroor Elijah Tisbindet, koleenji:

²⁹ “Igeere ole iming'indogei Ahab eng' tainnyu? Amu iming'inegei eng' tainnyu, koma ibu yaityet eng' peetuusyekyik; ago aipchini yaityet koonnyi eng' peetuusyegap weeriinnyi.”