1 LAITORINIK 18 - BUKUIT NE TILIIL Sireet ne Dutero Kanon

Elijah ak Obadiah

¹ Kingo pata peetuusyek che chaang', konyonji ng'olyootap Kamuktaindet ne Toroor Elijah, eng' kenyiitap somok, koleenji, “Ui iboorchigei Ahab, si ayookyi ng'wony ropta.”

² Ara ki wo Elijah koboorchigei Ahab. Ki o rubeet miising' eng' Samaria.

³ Ak kiguur Ahab Obadiah, ne ki pou koonnyi. (Ki iywei Obadiah miising' Kamuktaindet ne Toroor.

⁴ Ye kiga par Jesebel maotigap Kamuktaindet ne Toroor, komut Obadiah maotik pogol, ak kouny kobeate konom eng' kebeneet, ak kobae icheek magatiinik ak peek.)

⁵ Ki leenji `Ahab Obadiah, “Ui pun emet, ui kondametusyek tugul che po peek, ak kereruusyek tugul. Tamangap kenyooru susweek ak kesaru paraisisyek ak nyumbusyek kosapcho, si ma pegunenech tuguuk tugul che kiyagi.”

⁶ Kopchechigei anyun emet si kobun kogeerot; kwo Ahab ooreet age ineegei, kwo Obadiah ooreet age ineegei.

⁷ Kingo mi ooreet Obadiah, kotuiye Elijah. Ki inyit ineendet ak kobutyi ng'wony ak kole, “Inyee niito, kiptaiyandennyu Elijah?”

⁸ Ki wolji koleenji, “Ee Anee! Ui mwachi kiptaiyandeng'ung', ileenji, ‘Keero, mi yu Elijah.’ ”

⁹ Ak ki le, “Nee tengek ne koayai, si imach inde otwogindeng'ung' eutap Ahab, kobaran?

¹⁰ Ko uu ye sabei Kamuktaindet ne Toroor Kamuktaindeng'ung', koma mi pororyet anan ko laitornatet, ne tomo koyookto piik kiptaiyandennyu koba kocheeng'in. Ak ngo mwa kole, ‘Ma mi oli’, koleenjin pororyonooto anan ko laitornatanooto koyasyo kole, ‘ma keerin.’

¹¹ Ak ileen nguno, Ui, mwachi kiptaiyandeng'ung' ileenji, ‘Keero, mi yu Elijah.’

¹² Ye awe eng' yu imi, komutin Kabuusetap Kamuktaindet ne Toroor ole mangen. Ye awe amwachi Ahab, amanyo konyoorun, kobara. Ago anee otwogindeng'ung', aiywei Kamuktaindet ne Toroor kobooch ko aa ming'in.

¹³ Tos ma kimwaun inyee kiptaiyandennyu kiit ne ki ayai ye kingo par Jesebel maotigap Kamuktaindet ne Toroor, keele ki auny piik pogol che po maotigap Kamuktaindet ne Toroor kobeate konom eng' kebeneet age tugul ak abai icheek eng' magatiinik ak peek?

¹⁴ Ak imwae nguno ile, Ui mwachi kiptaiyandeng'ung', ileenji, ‘Keero, mi yu Elijah si kobara.’ ”

¹⁵ Ki le Elijah, “Ko uu ye sabei Kamuktaindet ne Toroor ne po lugoosyek ne atonone tainnyi, aboorchinigei iman ineendet rani.”

¹⁶ Ara ki wo anyun Obadiah kotuiyo ak Ahab ak komwachi ineendet, ak ki wo Ahab kotuiyo ak Elijah.

¹⁷ Kingo keer `Ahab Elijah, koleenji `Ahab ineendet, “Inyee ni chiichi, ki inyaliil Israel?”

¹⁸ Ak ki wol Elijah kole, “Ma anyaliil Israel, inyee ne ki inyaliil, ak kootap kwandang'ung', amu ki omete ng'atuutigap Kamuktaindet ne Toroor, ak ki osup Baal.

¹⁹ Iyookte anyun nguno kiyumwa Israel tugul kobwa tulweetap Karmel, kobooto maotigap Baal pogol ang'wan ak konom, ak maotigap Asera pogol ang'wan, che amisye meesetap Jesebel.”

²⁰ Koguur anyun `Ahab piigap Israel tugul ak koyum maotik tugul koba tulweetap Karmel.

²¹ Ki nyo Elijah koriikyi piik tugul ak koleenji, “Otebee kabwaatutik aeng' kot kotyanit? Ngot ko Kamuktaindet ne Toroor ko Kamuktaindet, osup ineendet; ago ngot ko Baal, osup anyun ineendet.” Ak ma wolji `piik ineendet ng'olyoo.

²² Koleenji anyun Elijah piik, “Anee, aneege kityo, maotyotap Kamuktaindet ne Toroor ne aa ng'etunot; ago maotigap Baal ko pogol ang'wan ak konom.

²³ Ingogoonech anyun icheek kiruugik aeng'; ak ingolewenjigei kirgit agenge, ak kotonaton komengegitu, ak konde paragutap kweenik, amat konde maat kotobon ng'wony. Aeenye kirgit age ak ande paragutap kweenik, amandoi maat kotobon ng'wony.

²⁴ Yeityo oguur kainetap kanamweng'wong', ak aguur agine kainetap Kamuktaindet ne Toroor. Ak Kamuktaindet ne wolu eng' maat, koek nooto Kamuktaindet.” Ak ki wol piik tugul kole, “Kemwa ne myee.”

²⁵ Ki leenji `Elijah maotigap Baal, “Olewenjigei kirgit agenge ak osip oeny, amu oo chaang'; ak oguur kainetap kanamweng'wong', ago monde maat kotobon ng'wony.”

²⁶ Ara ki nam kirgit ne kiga kigoochi ak koeny, ak koguur kainetap Baal kong'etee karon kot koit peet kween, koleen, “Ee Baal, kaseech!” Ago ki ma piit tweguuno, anan kobiit waluuno age tugul. Ak ki toroombenso komuut kapkorosuut ne kiga kiyai.

²⁷ Ak ki eng' peet kween, kochot Elijah icheek, koleenji, “Owaach inne! Amu ineendet ko kamuktain! Abeere ibwaati tuguuk, anan ko kawo ui, anan komi rutoi, anan abeere inuuchi, ak kanyool king'eet.”

²⁸ Ara kiwaach eng' kutit ne oo ak kotilgei eng' rotonik ak ng'otwek, ko uu piteennywa, kot kochagirirta korotiik.

²⁹ Kingo week asiis komaotenso agoi sait ne kigoitoe kagoochinet; ago ki ma piit tweguuno, anan ko chii age tugul ne wolu, anan ko chii age tugul ne kasei.

³⁰ Ki leenji `Elijah piik tugul, “Oriigu ole ami.” Kiriikta anyun piik tugul ole mi ineendet. Yeityo koteech kogeny kaptisisyetap Kamuktaindet ne Toroor ne kiga kobutok.

³¹ Ki nam Elijah koik taman ak aeng', ko uu koitetap ortinwegap weeriigap Jakobo, ne ki nyoonji ng'olyootap Kamuktaindet ne Toroor, koleenji, “Egu kaineng'ung' Israel.”

³² Kiteege kaptisisyet koichooto eng' kainetap Kamuktaindet ne Toroor, ak ki pal keriinget koyieme kaptisisyet, ne yamegei ak keruutik aeng' che po kesweek.

³³ Ki inde kweenik kotet ak kotonaton kirgooto, ak konde paragutap kweenik. Ak ki le, “Onde peek tereenik ang'wan, ak oroong'ji kagoochinet ne kibeelei, ak kweenik.”

³⁴ Ak ki le, “Oroong'ji kogeny ne po aeng',” ak kiroong'ji kogeny ne po aeng'. Ak ki le, “Oroong'ji kogeny ne po somok,” ak kiroong'ji ne po somok.

³⁵ Ki itenden peek koyiem kaptisisyet, ak ki inde peek keriinget agine konyi.

³⁶ Ak eng' sait ne kigoitoe kagoochinet, konyo maotyot Elijah koriik, ak kosa kole, “Ee Kamuktaindet ne Toroor, Kamuktaindetap Abraham, Isak, ak Israel, ingonaak rani keele ii Kamuktaindet eng' Israel, ak aa otwogindeng'ung' ak konaak keele kayai tuguuchuuto tugul eng' ng'olyoondeng'ung'.

³⁷ Kasa, ee Kamuktaindet ne Toroor, kasa, si kobiit konai pichu kole, inyee Kamuktaindet ne Toroor, ko ii Kamuktaindet, ak koiweech mugulelwekwak koweekyinge kogeny.”

³⁸ Kochoorgei anyun maatap Kamuktaindet ne Toroor, ak kobeel kagoochinet ne kibeelei, kogees, ak kweenik, koik, ng'ung'unyek ak kobeel peek che ki mi keriinget kobek.

³⁹ Kingo keer piik tugul, kobutyi ng'wony ak kole, “Kamuktaindet ne Toroor ko Kamuktaindet; Kamuktaindet ne Toroor ko Kamuktaindet!”

⁴⁰ Ki leenji `Elijah icheek, “Onam maotigap Baal; amat ongochilil agot agenge!” Ki nam anyun icheek, ak komut `Elijah kochoorchigei kererutap Kison, ak kobarchi yooto.

Kogesugei kemeut

⁴¹ Ak ki leenji `Elijah Ahab, “Togoste, iamisye ak ieeise, amu agase tuleetap ropta ne oo.”

⁴² Ki togosta anyun Ahab kwo koamis ak koeeiso. Ki togosta Elijah kwo Karmel parak, ki ing'uruuk ak konde metinnyi kwenutap kutung'oikyik.

⁴³ Koleenji otwogindennyi, “Togoste nguno, igeer yuun po nyanjet.” Ak kitogosta, ak kogeer, ak kole, “Ma mi kiy.” Ak ki le, “Ui kogeny konyiil tisap.”

⁴⁴ Ak eng' panda ne po tisap, kole, “Keero, ng'eetei pooldet eng' nyanjet ne ming'in ne tee eutap chiito.” Ak ki le Elijah, “Togoste ileenji Ahab, ‘Chopkei, ak ichoortegei si ma kerin ropta.’ ”

⁴⁵ Ne matyanit, kotuuit kipsengwet eng' poolik, ak usoonet, ak ki roobon ropta ne oo. Ak ki laany chepkichutit Ahab, kwo Jezreel.

⁴⁶ Ki mi eutap Kamuktaindet ne Toroor kobooto Elijah, ak ki kermengei, ak kolabat kondoe Ahab kwo ole kimandoe kebendi Jezreel.