1 LAITORINIK 17 - BUKUIT NE TILIIL Sireet ne Dutero Kanon

Kobaei `chepkuginik Elijah

¹ Ki leenji `Elijah Tisbinindet ne ki po piik che ki menyei Gilead Ahab, “Ko uu ye sabei Kamuktaindet ne Toroor, Kamuktaindetap Israel, ne atonone tainnyi, koma piitu rewoot anan ko ropta kenyisyechu, kobatee ko uu ng'olyoondennyu.”

² Ki nyoonji ineendet ng'olyootap Kamuktaindet ne Toroor, koleenji,

³ “Ui eng' yu, itokyigei komostap kong'asiis ak iunyge eng' kererutap Kerit, ne tokyingei Jordan.

⁴ Si iee peegap kererunooto, ak kaang'at chepkuginik kobain eng' yooto.”

⁵ Kwo anyun ak koyai ko uu ng'olyootap Kamuktaindet ne Toroor: ki wo ak komeny ye neegitee kererutap Kerit, ne tokyingei Jordan.

⁶ Ki ipchi ineendet magatiinik ak panyeek chepkuginik karon ak koipchi magatiinik ak panyeek koskoleny, ak kiee peegap kererunooto.

⁷ Ak ki eng' peetuusyek che matya koteeny kererunooto, amu ki mata koroobon emet.

Elijah ak mosogetap Sarepat

⁸ Ki nyoonji ineendet ng'olyootap Kamuktaindet ne Toroor koleenji,

⁹ “Ng'eet ak iwe Sarepat ne po Sidon ak imeny olooto. Kaang'at mosoget eng' olooto kobain.”

¹⁰ Kong'eet anyun ak kwo Sarepat. Kingo it ormariichetap nganaseet, ko ki mi yooto kwondo koyumi kweenik. Ki kuur ineendet ak koleenji, “Asoomin ale ibwo peek eng' tereet ne ming'in, aee.”

¹¹ Ak ye kita kowendi koibu, koguur ineendet, koleenji, “Asoomin ale, ibwo magatyat kitigin eng' eung'ung'.”

¹² Ki leenji, “Ko uu ye sabei Kamuktaindet ne Toroor Kamuktaindeng'ung', koma tinye magatyat, kobatee peek che ng'ootiin che po euut che mi tereet, ak mwaita kitigin ne mi soteet ne ming'in. Abute kweenik aeng', si kekwang'jinegei ak weeriinnyu, si keam, ak kebegu.”

¹³ Ki leenji `Elijah ineendet, “Meiywei. Ui ak iyai ko uu ye kaimwa. Ago kwang'wa korook magatyat kitigin ak iibwa komong', yeityo okwang'jigei ak weeriing'ung'.

¹⁴ Amu kamwa Kamuktaindet ne Toroor, Kamuktaindetap Israel ko uu ni, kole: ‘Ma igeesugei peek che ng'ootiin eng' teronooto anan kobek mwaita eng' sotonooto ming'in, kot koit peetuut ne iyookyin `Kamuktaindet ne Toroor ropta ng'wony.’ ”

¹⁵ Ki wo koyai ko uu mwaetap Elijah. Ki am amitwogik kwonyooto ak piikyik kobooto Elijah eng' peetuusyek che chaang'.

¹⁶ Ma igeskei peek che ng'ootiin eng' tereet anan kobek mwaita eng' soteet ne ming'in, ko uu ng'olyootap Kamuktaindet ne Toroor ne ki mwa eng' Elijah.

Kong'eeti eng' meet `Elijah lakweetap mosoget

¹⁷ Kingo pata tuguuchu, komyan lakweetap kwonyooto, ne ineendet ko chebyoset ne po koot; ak ki koromit myanooto, kot koma kobusi.

¹⁸ Ki leenji `ineendet Elijah, “Kiting'egei nee ak inyee, chiitap Kamuktaindet? Koinyo oli ami si kong'ang'ak tengektonyu, ak ibar weeriinnyu?”

¹⁹ Ak ki mwachi koleenji, “Koono weeriing'ung'.” Ak kitaach `Elijah lakweet eng' tegetap mosogonooto, ak koganap, ak komut kwo koot age ne mi parak, ole ki menyei, ak komogonji itogunnyi.

²⁰ Ki riirchi Kamuktaindet ne Toroor kole, “Ee Kamuktaindet ne Toroor, Kamuktaindennyu, keipchi kogeny yaityet mosogani ami koonnyi, ibare weeriinnyi?”

²¹ Ak ki iitoegei lakweet konyil somok, ak koriirchi Kamuktaindet ne Toroor koleenji, “Ee Kamuktaindet ne Toroor, Kamuktaindennyu, asaain ale, ingoweekyigei lakwani saboondanyi kogeny!”

²² Ki kas Kamuktaindet ne Toroor kutitap Elijah, ak kiweekyigei lakweet saboondanyi kogeny, ak kisop.

²³ Kiganap Elijah lakweet, ak komut kochoorgei eng' koyooto konyo koot ne po ng'wony, ak kogoochi kamet. Ki le Elijah, “Keero, sabei weeriing'ung'!”

²⁴ Ki leenji `kwonyooto Elijah, “Kaanai nguno ale ii chiitap Kamuktaindet ne Toroor ak ko po iman ng'olyootap Kamuktaindet ne Toroor ne mi kuting'ung'.”