1 LAITORINIK 14 - BUKUIT NE TILIIL Sireet ne Dutero Kanon

Kirwoogyin kootap Jeroboam

¹ Kimyan eng' peetuusyechooto Abijah weeriitap Jeroboam.

² Ki leenji `Jeroboam osotyonnyi, “Asoomin ale, ng'eet ak iwalgei si ma kinain keele ii osotyotap Jeroboam, yeityo iwe Shiloh. Mi olooto maotyot Ahija, ne ki mwa agobo anee kole aegu laitoryat abou pichu.

³ Iip magatiinik taman, magatiinik che mengeechen ak chuboit ne mi kumyat, ak iwe oldanyi. Si komwaun ineendet kiit ne piitu eng' lakwani.”

⁴ Ki yai ko uu nooto osotyotap Jeroboam, king'eet, kwo Shiloh, ak ki it kootap Ahija. Ki mata kogeerei kiy Ahija; amu kiga kogor eng' osindanyi.

⁵ Ki leenji Kamuktaindet ne Toroor Ahija, “Keero, nyoonei osotyotap Jeroboam konyo koteebenen agobo weeriinnyi; amu myani. Imwachini ko uu ni ak ko uu ni. Ye iit ko ineendet, koyaegei koigei kwondo age.”

⁶ Ara kingo kas Ahija cheetap keelyekyik, ko kait kurgat, koleenji, “Nyoo ko, osotyotap Jeroboam. Amu nee si iyaigei iigei age? Kagiyokwo aibun ng'aleek che pichiien.

⁷ Ui, ileenji Jeroboam, ‘Kamwa ko uu ni Kamuktaindet ne Toroor, Kamuktaindetap Israel: ki aeetin eng' pichu ak ayain iegu pounindetap piikyuk Israel;

⁸ ak arep laitornatet eng' kootap Daudi, ak agoonin. Ago ma iigei otwogindennyu Daudi, ne ki riip ng'atuutikyuk, kosuba eng' muguleldanyi komugul, koyai ne myee eng' tainnyu.

⁹ Ago koiyai yaityet kosiir piik tugul che ki indounenen. Koiyachigei kanamonik alak, che kitanyi, itacha anereech, ki isasa ak ituktocha patai.

¹⁰ Ara anyun aipchini yaityet kootap Jeroboam amu nooto. Aistoe Jeroboam lakweet age tugul ne weeriit, ne ki kigerchi ko anan ne wendoti eng' Israel. Abuuktoi kogestagei kootap Jeroboam, ko uu ye peleei chiito pusagaryek, kot kogestagei.

¹¹ Chiito age tugul ne po Jeroboam ne meei eng' nganaseet, koamei sesenik ak ne meechin timiin, koamei toriitik che po parak. Amu kagomwa Kamuktaindet ne Toroor.’ ”

¹² Koleenji `Ahija osotyotap Jeroboam, “Ng'eet ui koong'ung'. Ye tyech keelyeguk nganaseet, komee lakweet.

¹³ Rirchi Israel tugul ineendet ak kotup. Ineendet ineegei ne po kap Jeroboam ne wendi kererit, amu koginyoorchi ineendet kiit ne myee eng' Kamuktaindet ne Toroor, Kamuktaindetap Israel, eng' kootap Jeroboam.

¹⁴ Tuun lewenjingei `Kamuktaindet ne Toroor laitoryat ne pou Israel, ne tuun parei kootap Jeroboam kogeskei eng' peetuunooto. Au? Agot nguno.

¹⁵ Kong'eete nguno kobarei Kamuktaindet ne Toroor Israel, ko uu ye kitumdumi morong'yot eng' peek. Itutu `ineendet Israel eng' emoni karaaran, ne ki igoochi kwanisyekwak, ak koseer kosiir aineet pitoniin; amu kiyachigei Aserik ak kotaach Kamuktaindet ne Toroor.

¹⁶ Metoi ineendet Israel amu tengekwogigap Jeroboam, che ki yai ineendet, che ki ibeete Israel si koyai tengekto.”

¹⁷ Ki ng'eet anyun osotyotap Jeroboam ak kwo agoi koit Tirzah. Kingo it ye po tugatukyetap kurgeetap koot, kome lakweet.

¹⁸ Kitup Israel tugul ineendet ak koriiryo icheek agobo ineendet, ko uu ng'olyootap Kamuktaindet ne Toroor, ne ki mwa eng' otwogindennyi Ahija maotyot.

Meetap Jeroboam

¹⁹ Poisyonik che ng'etunotiin che po Jeroboam, ole kiyaita lugeet ak ole ki laitoranda, ko ki kisirchi kitabuutap ateptap peetuusyek ne po laitorinigap Israel.

²⁰ Ki laitoran Jeroboam kenyiisyek tiptem ak aeng', yeityo koru kobooto kwanisyekyik. Ki laitoran Nadap weeriinnyi kogeer ineendet.

Koegu Rehoboam laitoryatap Judah

²¹ Ki laitoran Rehoboam weeriitap Solomon eng' Judah. Ki po Rehoboam kenyiisyek artam ak agenge ye ki tau kolaitorani, ak ki laitoran kenyiisyek taman ak tisap eng' Jerusalem, nganaseet ne ki lewen Kamuktaindet ne Toroor eng' ortinwek tugul che po Israel, si konde kainennyi yooto. Ki kiguure kametap Rehoboam Naamah che po Amonik.

²² Ki yai piigap Judah ne ya eng' taitap Kamuktaindet ne Toroor. Ki igoochi ineendet ng'etkonda eng' tengekwogikwak kosiir tugul che kiga koyai kwanisyekwak.

²³ Amu kiteekyigei ak icheek komoswek che torooreen, tolochik ak Aserik eng' tulweet age tugul ne kooi ak eng' keetit keel eng' keetit age tugul ne tuon.

²⁴ Ki mi sodomik ak icheek, ak ki yai tuguuk tugul che kiwechei che po pororyosyek che kiga koon Kamuktaindet ne Toroor eng' taitap piigap Israel.

²⁵ Eng' kenyiitap muut ne po Laitoryat Rehoboam, ko ki togos Sisak laitoryatap Misiri konyo kobookyi Jerusalem.

²⁶ Ki ip konoraigap kootap Kamuktaindet ne Toroor kobooto konoraigap kootap laitoryat. Ki ip tugul, kobooto long'onik tugul che po thahabu che ki yai Solomon.

²⁷ Ki yai Rehoboam long'onik che po sugunonik kogeere chooto, ak kogoochi kiptainigap riibiik che ki riibei kurgeetap kootap laitoryat.

²⁸ Ye kiwendi laitoryat kootap Kamuktaindet ne Toroor, ko ki ibei riibindet long'onichooto, yeityo koweech kobwa kootap riibiik.

²⁹ Poisyonik che ng'etunotiin che po Rehoboam, ak tuguuk tugul che ki yai, ko tos ma ki sirchi kitabuutap ateptap peetuusyek ne po laitorinigap Judah?

³⁰ Ki cham komi lugeet eng' kwenutap Rehoboam ak Jeroboam kotugul.

³¹ Ki ru anyun Rehoboam kobooto kwanisyekyik, ak ki kitupchi nganaseetap Daudi kobooto kwanisyekyik. Ki kiguure kamet Naamah cheptap Amonik. Ak ki laitoran Abijam weeriinnyi kogeer ineendet.