1 LAITORINIK 10 - BUKUIT NE TILIIL Sireet ne Dutero Kanon

Korutochin `laitoryatap Sheba Solomon

¹ Kingo kas laitoryatap Sheba ne ki kwony, kalasunetap Solomon agobo kainetap Kamuktaindet ne Toroor, konyo kotyem ineendet eng' teebutik che uueen.

² Ki it Jerusalem kobooto piikyik che chaang', ak tambeesik che ibei tuguuk che ng'uu ne anyiny, thahabu che chaang' ak koik che po kamanuutyet ne oo. Kingo it ole mi Solomon kong'alaal ak ineendet agobo tuguuk tugul che ki mi muguleldanyi.

³ Ki wolji Solomon ineendet teebutikyik tugul; ki ma piit kiy age tugul ne ung'aat eng' laitoryat ne ma mwachi ineendet.

⁴ Kingo kagogeer laitoryandanooto po Sheba utaatyet tugul ne po Solomon ak koot ne kiga koteech,

⁵ ak amitwogikyik, ole teptoi otwogikyik, tononet ne tononjin poisyet kiboitiinikyik, ngoroikwak, piikyik che ipchin tuguuk che eei ak kagoochinoikyik che ki igoitoi eng' kootap Kamuktaindet ne Toroor, ko kitemeneen ak konam kuut kityo.

⁶ Ki leenji `kwonyooto laitoryat, “Po iman ng'aleechu ki agase eng' emennyu agobo poisyoniguk ak utaatyeng'ung'.

⁷ Ago ki ma yan ng'aleechooto kot koten anyo ageerchigei eng' konyekyuk. Keero, ki ma iit agot kebeber che kiga kimwaiwo, siirei utaatyeng'ung' ak perurtang'ung' kalasunet ne kigagas.

⁸ Poiboi piiguk! Poiboi otwogichuguk, chu tonondos eng' taing'ung' kotugul ak kogasei utaatyeng'ung'!

⁹ Iberuurot Kamuktaindet ne Toroor Kamuktaindeng'ung', ne ki paibait eng' inyee ak kondein ng'echereetap laitornatetap Israel. Amu ki cham `Kamuktaindet ne Toroor Israel koigeny, koyain anyun iegu laitoryat, si iyai kirwooget ak imanda.”

¹⁰ Ki igoochi anyun `kwonyooto Solomon keruutik eliphuusyek ang'wan che po thahabu, nyamdutik che ng'uu ne anyiny che chaang' miising' ak koik che po kamanuutyet ne oo: ki mata keip kogeny nyamdutik che ng'uu ne anyiny ng'iisyat che tee chooto che ki igoochi laitoryatap Sheba Laitoryat Solomon.

¹¹ Ki ip melisyegap Hiram ak icheek thahabu eng' emetap Opir, eng' olooto ko ki kiip kora keetiigap almug che chaang' kot ak koik che po kamanuutyet ne oo.

¹² Kiyae laitoryat keetichooto po almug, tolochigap kootap Kamuktaindet ne Toroor ak kootap laitoryat, kiyae kogeny keetichooto ketubosyek ak kibugandinik che po piik che tyeni. Ara mata keip keetiigap almug che uu chooto kogeny, amata kegeer agoi rani.

¹³ Ki igoochi `laitoryat Solomon laitoryatap Sheba kiy age tugul ne kimach, kiy age tugul ne ki soom, koma pooto chooto che ki igoochi Solomon kwonyooto eng' aiyebindap laitornatennyi. Kiweektagei anyun, kwo emennyi kobooto otwogikyik.

Mogornatosyegap Solomon

¹⁴ Ki kiipchi Solomon eng' kenyiit agenge thahabu che po nyigiisindanyi keruutik eliphuusyek tiptem ak aeng',

¹⁵ ama pooto che ki aldooti piik, ak che kiyae mung'aaret chemung'arainik, ak che po laitorinik tugul che po emetap Arabia ak che po pounigap emet.

¹⁶ Ki yai Laitoryat Solomon long'onik che eecheen pogol aeng' che po thahabu che ki kitany; ki kiyae long'eet agenge ne oo keruutik tisap che po thahabu.

¹⁷ Ki yai long'onik che mengeechen pogol somok che po thahabu che ki kitany, ki kiyae long'eet agenge kiloit agenge ak nusu che po thahabu; kigonoree laitoryat long'onichooto kootap timdap Lebanon.

¹⁸ Ak koyai kogeny laitoryat ng'echereet ne oo ne po laitornatet eng' kelegap peeleek, ak koliige thahabu che korooron miising'.

¹⁹ Ki mi tuguuk lang'eiywot ne ki tinyei tuguuk lo che ki kityegoti ketogosyin ng'echereetap laitornatet, ak ki kitainganat ng'echeronooto komostap patai: ak kimi keetiik komosi ak komosi che tiegei eunek, kobooto itoonwek aeng' che po ng'etuunyik eng' komosi ak komosi, eng' olooto kitiie eunek.

²⁰ Ki tonondos itoonwek tamanu ak aeng' che po ng'etuunyik eng' komoswek tuwai eng' lang'eiywondonooto ki tinyei tuguuk lo che kityegoti ketogostoi. Ki ma komi age ne kergei ak nooto ne ki kiyai eng' laitornatet age tugul.

²¹ Ki po thahabu tuguuk tugul che keeise che po Laitoryat Solomon, ak tuguuk tugul che ki kiboisyee eng' kootap timdap Lebanon ko ki po thahabu che tiliileen. Ki ma komi agot agenge ne po fedha; ki ma ko kiy fedha eng' peetuusyegap Solomon.

²² Amu ki tinyei laitoryat eng' nyanjet melisyek che po Tarsis kobooto melisyek che po Hiram, ko ki cham koibu melisyek che po Tarsis konyil agenge eng' kenyiisyek somok thahabu, fedha, kelegap peeleek, tisook ak toriitik che kiguure tausi.

²³ Ki siir anyun `Laitoryat Solomon laitorinik tugul che po ng'wony eng' mogornateet ak utaatyet.

²⁴ Ki cheeng' ng'wony komugul kogeer Solomon, kogas utotyennyi, ne kigainde Kamuktaindet muguleldanyi.

²⁵ Ki ip chii tugul kagochinennyi, tuguugap fedha, tuguugap thahabu, ngoroik, kariigap lugeet, nyamdutik ak paraisisyek ak nyumbusyek, koitet ne ki kigoonu eng' kenyiit age tugul.

²⁶ Ki iyum Solomon kariisyegap lugeet ak piik che ketei paraisisyek. Ki tinyei kariisyek eliphuut ak pogol ang'wan ak piik che ketei paraisisyek eliphuusyek taman ak aeng' che ki inde nganasoogap kariisyek, ak che ki mi ole mi laitoryat eng' Jerusalem.

²⁷ Ki yai laitoryat fedha eng' Jerusalem koigei koik, ak ki yai taragonik koigei mogoonik che mi emet ne soi, eng' chaang'indo.

²⁸ Ki kigetune Misiri paraisisyechooto che ki tinyei Solomon, ak kitaach chemung'arainigap laitoryat eng' akwotisyek, kitaach akweet age tugul eng' alyennyi.

²⁹ Kimong'u chepkichutit eng' Misiri eng' alyetap keruutik tisap che po fedha, ak paraisiit ko ki keruutik aeng'. Ki kigetyi uu nooto laitorinik tugul che po Hitik ak laitorinik che po Syria, kogetu icheeget.