1 LAITORINIK 1 - BUKUIT NE TILIIL Sireet ne Dutero Kanon

Peetuusyegap let che po Laitoryat Daudi

¹ Kiga koosit anyun Laitoryat Daudi; kiga kotar kenyiisyek che chaang', ak nganda ki tuch `icheek ineendet eng' ngoroik, koma kas lalang'yo.

² Ki leenji `otwogikyik ineendet, “Ingecheeng'ji pergeiya laitoryat kiptaiyandennyu neta ko ming'in, si koriip ak kobois eng' taitap laitoryat, ak ingorue tegeng'ung', si kogas laitoryat kiptaiyandennyu lalang'yo.”

³ Kocheeng' anyun chepto ne karaaran eng' komoswek tugul che po Israel, ak kinyoor ak komutyi `laitoryat Chepsunamindet ne ki kiguure Abishag.

⁴ Ki karaaran chebooto miising' ak ki riip laitoryat ak koboisyechi ineendet. Agot ingano, koma ituiyogei laitoryat ak ineendet.

Komakyingei Adonijah koek laitoryat

⁵ Ki ietkei Adonijah weeriitap Haggith kole, “Aegu laitoryat!” Ko uu nooto ko ki chopchigei kariisyek ak paraisisyek che laanyei, ak piik konom che rwaei kondoe ineendet.

⁶ Ago ma polji `ineendet kwandanyi eng' peetuut age tugul anan koteebe kole, “Amu nee si iyai ko uu niito?” Ki muren ne karaaran kot agine ak kirubu Absalom.

⁷ Ki ng'alaal ineendet ak Joab weeriitap Zeruiah kobooto Abiathar tisiindet, ak ki igongei icheek kotoret ineendet.

⁸ Ago ki ma iyan kotoret Zadok tisiindet, Benaiah weeriitap Jehoiada, maotyot Nathan, Shimei, Rei ak piigap Daudi che kinyigoonen.

⁹ Ki eny Adonijah keechiirek, tuuga ak che akwaen eng' ole neegitee koitap Zoheleth, ne mi ole neegitee En-rogel. Ki kuur tupchosyekyik tugul, weeriigap laitoryat ak piik tugul che po Judah che otwogigap laitoryat.

¹⁰ Maguur ineendet maotyot Nathan anan Benaiah, anan piik che nyigoonen agot Solomon ng'eetap kamet.

Kitoroori Solomon koek laitoryat

¹¹ Komwachi anyun `Nathan Bathsheba kametap Solomon koleenji, “Tom igas keele laitorani Adonijah weeriitap Haggith, amaingen Daudi kiptaiyandennyi?

¹² Nyoo anyun, asoomin ale aneetiin kiy, si kobiit isaru saboondang'ung' ak saboondap weeriing'ung' Solomon.

¹³ Ui ko ole mi Daudi ak ileenji ineendet, Tos ki ma iyasyechi inyee kiptaiyandennyu, ee laitoryat, otwogindeng'ung' ne chepto, ileenji, ‘Laitorani iman Solomon weeriing'ung' ko kaamei ak tebee ng'echerennyu ne po laitornatet? Amu nee anyun si kolaitoran Adonijah?’

¹⁴ Ak ye ta ong'alaali ak laitoryat, asubun anyo ko agane ak agimiit ng'aleeguk.”

¹⁵ Ki wo anyun Bathsheba agoi ko oriit ole mi laitoryat; kiga koosit laitoryat miising' ak kiboisyechin ineendet Abishag Chepsunamindet.

¹⁶ Ki ing'uruuk Bathsheba kogutung'ji laitoryat. Ak kiteebe laitoryat koleenji, “Imache nee?”

¹⁷ Ak ki wolji laitoryat koleenji, “Ki iyasye inyee kiptaiyandennyu eng' Kamuktaindet ne Toroor Kamuktaindeng'ung', iyasyechi otwogindeng'ung' ne chepto ileenji, ‘Laitorani iman Solomon weeriing'ung' ko kaameei ak tebee ng'echerennyu ne po laitornatet.’

¹⁸ Ago nguno ko laitorani Adonijah, amengen inyee kiptaiyandennyu laitoryat.

¹⁹ Kagoeeny ineendet tuuga, che akwaen ak keechiirek ng'iisyat, ak koguur weeriik tugul che po laitoryat, Abiathar tisiindet kobooto Joab kiptaiyatap lugeet, ago ma kuur Solomon otwogindeng'ung'.

²⁰ Keerin konyegap Israel tugul inyee laitoryat kiptaiyandennyu, imwachi ne namei ng'echereetap laitornatet ne po kiptaiyandennyu laitoryat.

²¹ Anan ngot koma uu nooto, ko ye kagoru kiptaiyandennyu laitoryat kobooto kwanisyekyik, kiitech anee ak weeriinnyu Solomon keegu ngelelik.”

²² Ye kita kong'alaali ak laitoryat, konyo ko maotyot Nathan

²³ ak ki kimwachi laitoryat keleenji, “Keero, mi yu maotyot Nathan.” Ak kingo nyo ineendet taitap laitoryat, kong'uruuk eng' taitap laitoryat kot kotiing'e togeennyi ng'wony ak kole,

²⁴ “Kiptaiyandennyu ee laitoryat, ki imwa ile tuun laitorani Adonijah ko keemee ak kotebee ng'echereeng'ung' ne po laitornatet?

²⁵ Kachoortagei rani ak koeny tuuga ak che akwaen ak keechiirek ng'iisyat, ak kagoguur weeriik tugul che po laitoryat, kiptainigap lugeet ak Abiathar tisiindet. Keero, amisyei ak koeisei eng' tainnyi, ak koleen, ‘Iwe keny Laitoryat Adonijah!’

²⁶ Ago, ma kuuro agot anee otwogindeng'ung', Zadok tisiindet, Benaiah weeriitap Jehoiada ak otwogindeng'ung' Solomon.

²⁷ Tos ki yai kii kiptaiyandennyu laitoryat, ama ibooru ineendet ne tebee ng'echeretap kiptaiyandennyu laitoryat ko kagome?”

²⁸ Kowol anyun Laitoryat Daudi kole, “Oguurwa Bathsheba.” Ak ki nyo ineendet taitap laitoryat ak kotonon eng' tainnyi.

²⁹ Ki iyasyo laitoryat kole, “Ko uu ye sabei Kamuktaindet ne Toroor, ne ki kotyach saboondanyu komang'une ng'oiyondit tugul,

³⁰ ko uu ye ki ayosyeun iman eng' taitap Kamuktaindet ne Toroor, Kamuktaindetap Israel ale laitorani iman Solomon weeriing'ung' ko kaamee, ak kotebee ng'echerennyu ne po laitornatet kogeero; ayae ko uu nooto kora rani.”

³¹ Ki ing'uruuk anyun Bathsheba kotiing'e togeet ng'wony kogutung'ji laitoryat ak kole, “Ingwo keny laitoryat kiptaiyandennyu Daudi!”

³² Kole Laitoryat Daudi, “Oguurwa Zadok tisiindet, maotyot Nathan ak Benaiah weeriitap Jehoiada.” Ki pwa taitap laitoryat ak

³³ ki leenji `laitoryat icheek, “Omut otwogigap kiptaiyandeng'wong' ak ogoochi Solomon weeriinnyu kolaany nyumbunnyu, ak omutu kochoorgei konyo Gihon.

³⁴ Ingoiil ineendet eng' olooto Zadok tisiindet ak maotyot Nathan koek laitoryat ne pou Israel. Oguut iryageet ak oleen, ‘Ingwo keny Laitoryat Solomon!’

³⁵ Yeityo otogosu osubu ineendet inyoo kotebee ng'echerennyu ne po laitornatet, amu egu laitoryat kogeera. Kaatoroor ineendet koek pounindet ne pou Israel ak Judah.”

³⁶ Ki wolji Benaiah weeriitap Jehoiada laitoryat koleenji, “Sere! Ingomwa agine Kamuktaindet ne Toroor, Kamuktaindetap kiptaiyandennyu laitoryat, ko uu nooto.

³⁷ Ko uu ye ki mi Kamuktaindet ne Toroor kobooto kiptaiyandennyu laitoryat, ko ingotep kobooto Solomon agine, ak koyai ng'echerennyi ne po laitornatet koeet kosiir ne po kiptaiyandennyu Laitoryat Daudi.”

³⁸ Ki choortagei anyun Zadok tisiindet, ak Nathan maotyot, ak Benaiah weeriitap Jehoiada, kobooto Keretik ak Peletik, ak kolaany Solomon nyumbutap Laitoryat Daudi, ak yeityo komut ineendet kwo Gihon.

³⁹ Ki inem Zadok tisiindet laletap mwaita eng' Emait ak koiil Solomon. Ki kuut icheek iryageet ak kuguurso piik tugul koleen, “Ingwo keny Laitoryat Solomon!”

⁴⁰ Ki pwa piik tugul komutu ineendet ak kogutonu ndurerusyek. Ak kiboiboitu eng' poiboiyet ne oo kot ko regregen emet amu cheennywa.

⁴¹ Ki kas Adonijah ak toekyik tugul che ki mi ak ineendet ye kingo kagogees amisyet. Kingo kas Joab cheetap iryageet koteep kole, “Po nee polatoni kawo parak eng' nganaseet?”

⁴² Ye kita kong'alaali, koit Jonathan weeriitap Abiathar tisiindet, ak koleenji `Adonijah ineendet, “Nyoo ko, amu ii chii ne nyigan ak iibu logoiywek che myach.”

⁴³ Ak ki wolji `Jonathan Adonijah koleenji, “Achicha ma uu nooto! Kagoyai `kiptaiyandennyo Laitoryat Daudi Solomon koek laitoryat.

⁴⁴ Kagoyookto `laitoryat Zadok tisiindet, ak maotyot Nathan, ak Benaiah weeriitap Jehoiada, kobooto Keretik ak Peletik koba ak ineendet, ak kagoochi ineendet kolaany nyumbutap laitoryat.

⁴⁵ Kagoiil Zadok tisiindet ak maotyot Nathan Solomon koek laitoryat eng' Gihon. Togosu eng' olooto kogasanugei kot ko kagululen nganaseet kogeny. Nooto polateet ne kogase.

⁴⁶ Ne siirei nooto, ko tebee Solomon ng'echereetap laitornatetap pounateet.

⁴⁷ Ak kogeny-i, ko kabwa otwogigap laitoryat koberuur laitoryat kiptaiyandennyo Daudi, koleen, ‘Ingoyai kamuktaindeng'ung' kainetap Solomon kogararanit kosiir neng'ung', ak koyai ng'echerennyi ne po laitornatet koeet kosiir neng'ung!’ Ak ki ing'uruuk laitoryat eng' ng'echerennyi.

⁴⁸ Ak kogeny, ko kamwa laitoryat kole, ‘Iberuurot Kamuktaindet ne Toroor, Kamuktaindetap Israel, ne kagonde chiito kotebee ng'echerennyu ne po laitornatet eng' peetuuni kogeerei konyekyuk.’ ”

⁴⁹ Ki aragenso toegap Adonijah tugul ak kong'eetyo koba; ki wo chii tugul ooreennyi.

⁵⁰ Eng' kayweisyet ne ki iywei `Adonijah Solomon, koging'eet ak kwo konam kuinoigap kaptisisyet.

⁵¹ Ki kimwachi Solomon keleenji, “Keero! Iywei `Adonijah Laitoryat Solomon ak kagonam kuinoigap kaptisisyet ak koleen, ‘Ingoyosyeiwo Laitoryat Solomon rani kole ma parei otwogindennyi eng' rotwetap chok.’ ”

⁵² Kole Solomon, “Ngot koboorgei koek chiito ne myee, koma ibutyin ng'wony agot agenge eng' suumeekyik ng'wony. Ago ngot kenyoorchi ineendet yaityet, komeei.”

⁵³ Ki iyookto anyun Laitoryat Solomon keemut ineendet konyo kochoorgei eng' kaptisisyet. Ak ki nyo ak kogutung'ji Laitoryat Solomon. Ki leenji `Solomon ineendet, “Ui koong'ung'.”