1 KORINTOEK 9 - BUKUIT NE TILIIL Sireet ne Dutero Kanon

Imandap kayooktoindet

¹ Tos ma atyagat? Ma aa kayooktoindet? Tos ki ma ageer Jeso Kiptaiyandennyo? Tos ma oo poisyennyu okweek eng' Kiptaiyat?

² Ak ngot koma aa kayooktoindet eng' alak, ko aa kayooktoindet eng' okweek: amu ng'ooksetap kayooktoinatennyu ko okweek eng' Kiptaiyat.

³ Niito anyun ne asaruunegei eng' icheeget che kina.

⁴ Tos ma ki tinyei kimnateet keam ak kee?

⁵ Tos ma ki tinyei kimnateet kimutate osotyot ne iyanaat, ko uu alak che kiyooktoi, ak tupchosyek che po Kiptaiyat, ak Kepha?

⁶ Anan aneege kityo ak Barnaba, che ma ki tinyei kimnateet kebagaakte poisyet?

⁷ Tos ng'oo asigarindet ne poisyee tuguukyik? Ng'oo ne minei logoek, ne ma amei logoekyik? Anan ng'oo ne iyagi akweet, ama luei cheego che po akweet?

⁸ Tos amwae tuguuchu ko uu piteetap piik? Anan ma mwaei agine Ng'atuutyet chooto?

⁹ Amu ki kisir eng' Ng'atuutyetap Musa keele, Amerat kutitap eito ye tyechei peek koborye. Tos ibwaati Kamuktaindet miising' agobo eiik,

¹⁰ anan mwaei kityo amu acheek? Ee, ki kisir amu acheek: amu ineendet ne ibatisyei, ko nyolu kobatis eng' kamang'unet, ak ineendet ne porei koboorei komang'u kole sige kiy.

¹¹ Ngo ki kigooljok tuguugap saboondo, ko tos kiy ne oo ngeges tuguukwok che po poorto?

¹² Ngot kotinyei piik alak yamdaet eng' kamugoniito koboiywok, ko tos ma kisiirtoot? Ago ma kiboisyee acheek kamugoniito; ago kimuitoi eng' tuguuk tugul, si ma ki kirinde logoiywek che myach che po Kristo.

¹³ Tos mongen ole icheeget che poisyei agobo tuguuk che tiliileen koamei tuguuk che po Hekaluut, ak icheeget che riibei kaptisisyet kotinyei kebebertanywa kobooto kaptisisyet?

¹⁴ Ki ng'at ko uu nooto Kiptaiyat kole icheeget che amdaati logoiywek che myach kosaptos eng' logoiywek che myach.

¹⁵ Ago tomo aboisyee tuguuchooto agot agenge: ama sire tuguuchu ale keyaiywo ko uu nooto: amu kata kaigai ame kosiir kowal chii toroornatennyu koek puch.

¹⁶ Amu ngaamde logoiywek che myach, koma tinye kiy ne alasunegei; amu kanyool ayai ko uu nooto; Pwo eng' anee ngot koma amde logoiywek che myach.

¹⁷ Amu ye ayai ni eng' magennyu aneege, atinye melekto: ago ngo ma po magennyu aneege, atinye riipseet ne ki kiyanwa.

¹⁸ Nee anyun melektanyu? Nooto ko ni, ye aamdoi logoiywek che myach, ayae logoiywechooto myach koek ne ma pooto melekto, si ma poisyee kamugennyu miising' eng' logoiywek che myach.

¹⁹ Agot ngo ki atyagat eng' piik tugul, ko ki ayaige aek ne rataat agobo tugul, si kobiit anyoor che siirtoot.

²⁰ Ak eng' Yahudik, ko ki aige Yahudyot, si kobiit anyoor Yahudik; eng' icheeget che mi eng' Ng'atuutyet, ko ki aige agane ne mi eng' Ng'atuutyet, ama keele ami aneendet eng' Ng'atuutyet, ago si kobiit anyoor icheeget che mi eng' Ng'atuutyet;

²¹ eng' icheeget che ma mi eng' Ng'atuutik, ko ki aige agane chii ne ma mi Ng'atuutik, ma keele ma mi eng' Ng'atuutik eng' Kamuktaindet, ago ami eng' Ng'atuutik eng' Kristo, si anyoor icheek che ma mi eng' Ng'atuutik.

²² Eng' che nyalulyotin ki aegu anee ne nyalulat, si tamangap anyooru che nyalulyotin: ki aegu tuguuk tugul eng' piik tugul, tamangap amuuch asar alak eng' ooreet age tugul.

²³ Ak ayae tuguuk tugul amu logoiywek che myach, si kobiit anyoor yamdaet eng' chooto.

²⁴ Mongen ole icheeget che ibelegei eng' labatet korwaei tugul, ago agenge ne nyooru konunet? Orwai anyun, si onyooru.

²⁵ Ak chii age tugul ne igiilegei eng' ureryosyek, koriibegei eng' tuguuk tugul. Yaei anyun icheek nooto si konyoor kuutweet ne ng'emaksei; ago acheek ko ne ma ng'emaksei.

²⁶ Alabati anyun ko uu nooto, ma ko uu ne tinyei saget, ayae anyun kabeletapkei ko uu nooto, ma ko uu chii ne pirei ola puch:

²⁷ ago abire poortanyu, ak abou ineendet: si ma ye kaamji piik alak, kotun keesia.