1 KORINTOEK 8 - BUKUIT NE TILIIL Sireet ne Dutero Kanon

Tuguuk che kieng'jin kanamonik

¹ Nguno anyun agobo tuguuk che kieng'jin kanamonik: kingen keele ki tinyei acheek tugul naet. Menei naet, ago teeksei chamyet.

² Ngo leen chii age tugul ingen kiy age tugul, ko tomo konai ko uu ye kanyool konai;

³ ago ngo chamei chii age tugul Kamuktaindet, konaat chiichooto eng' ineendet.

⁴ Nooto anyun eng' ameet ne po tuguuk che kieng'jin kanamonik, kingen keele ma mi kanamwet ne kiy eng' ng'wony, ama mi Kamuktaindet age kobatee agenge.

⁵ Amu agot nganda miitei che keguure kamuktaik, ngo eng' kipsengwet, anan eng' ng'wony; ko uu ye miitei kamuktaik che chaang', ak kiptainik che chaang';

⁶ ago eng' acheek komiitei Kamuktaindet agenge, ineendet Kwanda, ne punu tuguuk tugul ak acheek eng' ineendet; ak Kiptaiyat agenge, Jeso Kristo, ne mi tuguuk tugul amu ineendet, ak acheek eng' ineendet.

⁷ Ago ma mi naonooto eng' piik tugul: ago ko uu ye ki konerta alak kanamonik agoi nguno, koamei ko uu kiit ne kagieng'ji kanamwet; ak murwoniitu kabwaatennywa ne nyalulat.

⁸ Ago amitwogik koma kiit ne imutech keriikyi Kamuktaindet: anan ngo ma ki amisye, ko mararwech kiy; anan, ngeamisye, ko matesak kiy.

⁹ Ago oriipkei si ma ek kanagutyet kimnatoning'wong' eng' che nyalulyotin.

¹⁰ Amu ngo keerin chii inyee ne itinye naet, iamisyei eng' Hekaluut ne po kanamwet, ko tos manyiganitu kabwaatennyi, ngot ko nyalulat, kot koam tuguuk che kieng'jin kanamonik?

¹¹ Ak lusei ineendet ne nyalulat amu naeng'ung', ineendet tupchet ne ki mechi Kristo.

¹² Ak uu nooto anyun, ye koyachini tengek tupchosyek, ak oguoteni kabwaatennywa ne nyalulat, ko koyachi tengek Kristo.

¹³ Nooto anyun, ngot konachi amitwogik ne kitupche, koma aame panyeek agoi, si ma nach ne kitupche.