1 KORINTOEK 5 - BUKUIT NE TILIIL Sireet ne Dutero Kanon

Ibeetapkei ak kaniset

¹ Mwaat komyee keele miitei ibeetapkei kwenung'wong', ibeetapkei ne ma mi agot eng' Pororyosyek, keele ibegei chii ak osotyotap kwandanyi.

² Ak omendosi, ama agot oaragense, si kobiit keisto eng' kwenung'wong' ineendet ne ki yai kioto.

³ Amu anee iman, ko mamite eng' poorto, ago amite eng' saboon, kaarwookyi anyun ineendet ne ki yai kiito ko uu nooto, ko uu ye amite,

⁴ ye koyumge eng' kainetap Kiptaiyandennyo Jeso, kobooto saboondanyu, ak kamuktaetap Kiptaiyandennyo Jeso,

⁵ ogoochi Setani chiito ne uu nooto si keng'em poorto, si tuun kesar saboondanyi eng' peetuutap Kiptaiyat Jeso.

⁶ Ma karaaran kalasuneng'wong' pogei. Tos mongen ole igutu mermereek tutigin kererutyet komugul?

⁷ Ounde mermereek che po keny, si kobiit oegu kererutyet ne leel, ko uu ye ma mi mermereek eng' okweek. Amu kigeeny agine arwennyo ne po Paska, nooto ko Kristo:

⁸ nooto anyun ongeriip igoorto, ma eng' mermereek che po keny, anan eng' mermeregap yaityet ak tengekto, ago eng' magatyat ne ma kinde mermereek che ma tinyei keniisyet ak po iman.

⁹ Ki asirwak eng' parweennyu ale amonamge ak piik che soksei;

¹⁰ ma mwaei ale otabaanegei miising' che soksei che po ng'wonyuni, anan kipkeinik anan rebiik, anan che saaei kanamonik; amu nda uu nooto ta kanyooljok omande eng' ng'wony:

¹¹ ago nguno asirwok, ale amonamge ak chii age tugul ne kiguure tupchet, ne soksei, anan kipkeiyat, anan ne saaei kanamonik, anan ne chubisyei, anan kibogityot, anan rebindet; amat oamjine ak chiito ne uu nooto, achicha.

¹² Amu amage nee arwookyi icheek che miitei saang'? Tos morwookyini okweek icheek che miitei ko?

¹³ Ago icheek che miitei saang' korwookyin Kamuktaindet chooto. Oiste anyun chiichooto sogoran eng' kwenung'wong'.