1 KORINTOEK 3 - BUKUIT NE TILIIL Sireet ne Dutero Kanon

Kegerei kong' pesyosyek

¹ Ki temena anyun, che kitupche, ang'alaalwok ko uu piik che mi eng' atebeetap Kabuuset ne Tiliil, ago ko uu piik che mi eng' atebeetap poorto, ko uu che manyurunik eng' Kristo.

² Ki aguenak cheego, ma abaenak amitwogik che uueen; amu kitom omuuch; achicha, agot nguno kotom omuuch;

³ amu ta omi eng' atebeetap poorto: amu ko uu ye mi kwenung'wong' ng'etkonda ak pooryeet, tos ma mi eng' atebeetap poorto, ak obendoti ko uu piteetap piik?

⁴ Amu ye mwaei age kole, “Aa po Paulo” ak koleen age, “Aa po Apolo,” tos ma oo piik?

⁵ Nee anyun Apolo? Ko nee Paulo? Kiboitiinik che ki koonok oyan; ak ko uu ye ki igoochi Kiptaiyat age tugul.

⁶ Ki agoole, kobisi Apolo; ago ki ibit Kamuktaindet.

⁷ Nooto anyun ma tilei kiy ne koolei, anan ne ibisi; ago Kamuktaindet ne ibiiti.

⁸ Nooto anyun, ineendet ne koolei ak ineendet ne ibisi ko agenge: ago tuun nyooru age tugul melektanyi ineegei ko uu poisyennyi.

⁹ Amu ki kiboitinigap Kamuktaindet che kiboisyei kobooto ineendet: okweek ko oo mbareetap Kamuktaindet, kootap Kamuktaindet.

¹⁰ Ki alumde lumeiywot ko uu teegindet ne oo ne ng'oom, ko uu myeeindap Kamuktaindet ne ki kigoono; ak teechei chiito age paragunnyi. Ago ingoriip chii age tugul ole teektoi eng' paragunnyi.

¹¹ Amu ma mi lumeiywot age ne imuuchi chii kolumda kobatee nooto kigelum, nooto Jeso Kristo.

¹² Ago ngo teech chii paragutap lumeiywondonooto eng' thahabu, fedha, koik che po kamanuutyet ne oo, keetiik, susweek, mobeek;

¹³ tuun king'aanyei poisyetap chii age tugul: amu tuun ng'aanyei peetuut, amu king'aanyei eng' maat; ak kotyem matole teptoi poisyetap chii age tugul.

¹⁴ Ngo tebi poisyetap chii age tugul ne ki teech paragunnyi, kotaachei ineendet melekto.

¹⁵ Ngo lal poisyetap chii age tugul, kobetos tuguukyik: ago kisaru ineendet; ago ko uu ye kisaru eng' maat.

¹⁶ Mongen okweek ole oo Hekaluut ne po Kamuktaindet, ak menyok Kabuusetap Kamuktaindet?

¹⁷ Ak ngo ng'em chii age tugul Hekaluut ne po Kamuktaindet, kotun ng'emei `Kamuktaindet ineendet; amu tiliil Hekaluut ne po Kamuktaindet, okweek hekaluunooto.

¹⁸ Amat koberbergei chii. Ngo pwaati chii age tugul eng' kwenung'wong' kole utaat eng' peetuusyechu, ko ingoek ne perber, si kobiit koek ne utaat.

¹⁹ Amu ng'omnateet ne po ng'wonyuni ko perberyo eng' Kamuktaindet. Amu ki kisir keele, “Ineendet ne namei che utaatiin eng' ng'aalseennywa;”

²⁰ ak kogeny, “Ingen Kiptaiyat kabwaatutigap che utaatiin, kole puch.”

²¹ Nooto anyun amat koloskei chii eng' piik. Amu tuguuk tugul ko chekwok;

²² ngo Paulo, anan Apolo, anan Kepha, anan meet, anan tuguuk che miitei, anan tuguuk che pwoonei; tugul ko chekwok;

²³ ak oo po Kristo; ak Kristo ko po Kamuktaindet.