1 KORINTOEK 2 - BUKUIT NE TILIIL Sireet ne Dutero Kanon

Kimwaitoi Kristo ne ki kigartaat

¹ Ak ye ki Anyoonjok tupchosyechu, ko ki ma anyoo eng' anyinyindap ng'alaalet anan ne po utaatyet, anyoo aboorwok ung'ootyetap Kamuktaindet.

² Amu ki abegechi ale ma mache anai kiy age tugul eng' kwenung'wong' kobatee Jeso Kristo, ineendet ne ki kigartaat.

³ Ki ami kobootok eng' nyalulet, ak eng' kaiyweisyet, ak eng' potanet ne oo.

⁴ Ak ng'alaalennyu ak ng'olyoondennyu ne ki aamdoi ko ki ma ko ng'aleegap kagaigaet che po utaatyet, ago eng' kaboorunetap Kabuuset ne Tiliil ak ne po kamuktaet:

⁵ si ma tonone kayaneng'wong' utaatyetap piik, ago eng' kamuktaetap Kamuktaindet.

Utaatyetap Kamuktaindet

⁶ Ago kimwae utaatyet eng' kwenutap che ititaatiin: ago utaatyet ne ma po peetuusyechu, anan ne po pounigap peetuusyechu, che machei koek puch:

⁷ ago kimwae utaatyetap Kamuktaindet eng' ung'ootyet, nooto ne kigeuny, ne kiga sip kong'at Kamuktaindet agobo toroornatennyo ye kitom kobiit ng'wony:

⁸ ne manaei agot agenge eng' pounik che po peetuusyechu: amu nda kiga nai, ta ki ma kogartati Kiptaiyatap toroornatet:

⁹ ago ko uu ye ki kisir keele, “Ma mi kong' ne ki kogeer, anan it ne ki kogas, anan muguleldap chii ne kigoguiyo, tuguuk tugul che kichopchi `Kamuktaindet icheeget che chamei ineendet.”

¹⁰ Ago king'ang'wech Kamuktaindet eng' Kabuuset ne Tiliil: amu isyachi Kabuuset ne Tiliil tuguuk tugul, agot tuguuk che po oriit che po Kamuktaindet.

¹¹ Amu tos ng'oo chii ne ingen tuguugap chii kobatee muguleldap chiichooto ne miitei ineendet? Ko uu nooto ma mi chii ne ingen tuguugap Kamuktaindet, kobatee Kabuuset ne po Kamuktaindet.

¹² Ago ki ma kitaach kabuuset ne po ng'wony, ago Kabuuset ne po Kamuktaindet, si kenai tuguuk che ki kogoonech Kamuktaindet puch.

¹³ Tuguuchooto ak icheek che kimwae, ko ma kimwae eng' ng'aleek che ineeti utaatyetap chii, ago che ineeti Kabuuset ne Tiliil; ki poisyee Kabuuset ne Tiliil asi kiguiyo tuguugap saboon.

¹⁴ Ma taachei chiito ne mi eng' atebeetap poorto tuguuk che po Kabuusetap Kamuktaindet: amu perberyo eng' ineendet; ak temenee koobeesyo tuguuchooto, amu naoksei eng' toretetap Kabuuset.

¹⁵ Ago ineendet ne mi eng' atebeetap Kabuuset ne Tiliil kobestos tuguuk tugul, ago ma mi chii ne ibestos ole teptoi chiichooto.

¹⁶ Amu ng'oo ne ki konai kabwaatutigap Kiptaiyat, si kobiit koneet ineendet? Ago ki tinyei acheek kabwaatutigap Kristo.