1 KORINTOEK 13 - BUKUIT NE TILIIL Sireet ne Dutero Kanon

Konunotyotap Chamyet

¹ Agot ndang'alaale kutusweegap piik ak che po malaikaisyek, ama tinye chamyet, ko kaegu sugunwet ne cheei, anan sanitap sugunwet ne polei.

² Ak ngot atinye konunetap maonateet, ak angen ung'ootik tugul ak naet tugul, ak ngatinye kayaneet tugul, kot amuuch autoe tuloonook, ago ma tinye chamyet, ko aa puch.

³ Ak ngot agoite tuguukyuk tugul abae kibananook, ak ndagoite poortanyu kebeel, ago ma tinye chamyet, ko magelwo kiy.

⁴ Muitoi chamyet, ak ko tala; ama tinyei chamyet ng'etkong', malosegei chamyet, ama meenei,

⁵ ama yaei ne ma nyolu, ama cheeng'jingei chechiik ineegei, ama iiti tagisyet, ama iiti yaityo;

⁶ ma paibai eng' ne ma po imanda, ago paibai eng' imanit;

⁷ siisei eng' tuguuk tugul, iyani tuguuk tugul, imang'u tuguuk tugul, muitoi eng' tuguuk tugul.

⁸ Mararu chamyet agoi: ago ngo miitei maonatosyek, kotun igeesugei; ngo mi kutusweek che teerchiin, kotun siistos; ngo mi naet, kotun igeesugei.

⁹ Amu kingen eng' kebeberta, ak keamdoi eng' kebeberta:

¹⁰ ago ye tuun nyo ne ititaat, kogeskei anyun kebeberta.

¹¹ Ye kingo aa lakwa, kogiang'alaali ko uu lakwa, ki aguitosi ko uu lakwa, ki abwaati ko uu lakwa: nguno, ko kaaegu chiito ne oo, ko kaamete tuguugap lakwandit.

¹² Amu nguno kegeere eng' kioit, eng' tamirmiron; ago tuun ko togoch eng' togoch: nguno angen eng' kebeberta; ago tuun anae ko uu ye kigenaa.

¹³ Ago tebyei nguno kayaneet, kamang'unet, chamyet, chuuto somok; ago ne oo eng' chuuto ko chamyet.