1 KORINTOEK 12 - BUKUIT NE TILIIL Sireet ne Dutero Kanon

Konunoik che terotin

¹ Nguno anyun agobo konunoik che po Kabuuset ne Tiliil, che kitupche, koma mache oegu che mongen.

² Ongen ole kingo ta ko oo Pororyosyek, ko ki kiretook obe ye mi kanamonichooto che ma twegu, ko uu ye ki kindoiywok.

³ Nooto anyun agoonok oguiye ole, ma mi chii ne ng'alaali eng' Kabuusetap Kamuktaindet ne mwaei kole, “Jeso ko chuboot!” ama mi chii ne imuuchi komwa kole, “Jeso ko Kiptaiyat,” kobatee eng' Kabuuset ne Tiliil.

⁴ Nguno anyun, komiitei konunoik che pesyotin, ago agenge Kabuuset ne Tiliil.

⁵ Ak miitei riipsosyek che pesyotin, ago agenge Kiptaiyat.

⁶ Ak miitei poisyonik che pesyotin, ago agenge Kamuktaindet, ne yaei tuguuk tugul eng' tugul.

⁷ Ago kigoochin chii tugul kaboorunetap Kabuuset ne Tiliil si kobiit kotoretegei.

⁸ Amu kigoochin chiito age ng'olyootap utaatyet eng' Kabuuset ne Tiliil; ak kigoochin age ng'olyootap naet, eng' Kabuusonooto:

⁹ kigoochin age kayaneet, eng' Kabuusonooto; ak kigoochin age konunoigap kasaabet, eng' Kabuusonooto agenge;

¹⁰ ak kigoochin age poisyonigap kamuget; ak age maonateet; ak age kabesyetap konunoigap Kabuuset: ak age kutusweek che teerchiin; ak age weeksetap kutusweek:

¹¹ ago poisyee chuuto tugul Kabuuset ne Tiliil ne nooto agenge, kopchechin age tugul ko uu ye makyin.

Poorto agenge ne mi kebeberwek che chaang'

¹² Amu ko uu ye agenge poorto, ak kotinyei kebeberwek che chaang', ak kebeberwek tugul che po poorto, agot ngo chaang', ko poorto agenge; ko uu nooto agine Kristo.

¹³ Amu eng' Kabuuset ne Tiliil agenge ko ki kibatisanech acheek tugul keegu poorto agenge, ngo Yahudik anan Yunanik, ngo ratotiin, anan kotyagotin, ak ki kigoonech acheek tugul kee eng' Kabuuset ne Tiliil agenge.

¹⁴ Amu poorto, koma kebeberta agenge, ago chaang'.

¹⁵ Ngot komwa keeldo kole, “Amu ma aa euut, koma po poorto,” tos ma po poorto amu nooto?

¹⁶ Ak ngot komwa itit kole, “Amu ma aa konda, koma po anyun poorto,” ko tos ma po poorto amu nooto?

¹⁷ Nda poorto komugul ko konda, kota mi ano kastaet? Nda poorto komugul ko itit, ko tos mi ano kang'utoet?

¹⁸ Ago nguno ko ki konde Kamuktaindet kebeberwek, age tugul eng' icheek, eng' poorto, ko uu ye ki cham ineendet.

¹⁹ Ak nda tugul ko kebeberta agenge, ta mi ano poorto?

²⁰ Ago nguno ko kebeberwek icheek che chaang', ago agenge poorto.

²¹ Amaimuuchi konda koleenji euut, Ma magenen kiy: anan kogeny, ma imuuchi metit koleenji keelyek, Ma magenok kiy.

²² Ago ne siirei miising' ko, kebeberwechooto po poorto che uu keele nyalulyotin, ko chooto che nyolu:

²³ ak kebeberwechooto po poorto, che kiiti keele matya teegistanywa, ko chooto che kilaakyin teegisto ne oo kosiir; ak kebeberwekyok che ma tinyei korooronindo ko chooto che tinyei korooronindo ne oo kosiir;

²⁴ amu kebeberwekyok che tinyei korooronindo, koma machei kiy: ago kiituiyo Kamuktaindet poorto, kogoochin teegisto ne oo kosiir kebeberta kirarchi;

²⁵ si ma piit kabesyet eng' poorto; ago si koriipkei eng' riipseet agenge, kebeberwechooto, koriip age age.

²⁶ Ak ngo nyalili kebeberta agenge, konyalildos kebeberwek tugul kobooto nooto; anan ngegonyiti kebeberta agenge, koboiboitu kebeberwek tugul kobooto nooto.

²⁷ Nguno anyun, okweek ko oo poortap Kristo, ak oo kebeberwegap poroto, age tugul eng' okweek.

²⁸ Ak kigonde Kamuktaindet alak eng' kaniset, che po tai ko che kiyooktoi, che po aeng' ko maotik, che po somok ko kaneetik, yeityo ko kwang'utik, yeityo ko konunoigap kasaabet, toretosyek, kandoinatosyek, ak kutusweek che teerchiin.

²⁹ Tos tugul ko che kiyooktoi? Tos tugul ko maotik? Tos tugul ko kaneetik? Tos tugul ko yaigap kwang'utik?

³⁰ Tos tinyei tugul konunoigap kasaabet? Tos ng'alaali tugul kutusweek che teerchiin? Tos iweechi tugul kutusweek?

³¹ Ago ocheeng' miising' konunoik che eecheen. Ak aboorwok ooreet ne myee miising' ne siirei tugul.