1 KORINTOEK 10 - BUKUIT NE TILIIL Sireet ne Dutero Kanon

Kiteu kobun sabeetap piigap Israel

¹ Ma mache anyun, che kitupche, ale oegu che mongen, ole ki miitei kwanisyekyok tugul ng'wonyutap pooldet, ak ki pun tugul nyanjet:

² ak ki kibatisanji tugul Musa eng' pooldet ak eng' nyanjet;

³ ak ki am tugul amdit agenge ne po saboon;

⁴ ak kiee tugul eet agenge ne po saboon: amu kiee tugul eng' rwandet ne po saboon ne ki isubi icheek: ak rwandanooto ko ki Kristo.

⁵ Ago ki ma paibaitune miising' Kamuktaindet che chaang' eng' icheek: amu ki kiserta eng' surkwen.

⁶ Ki ek tuguuchu anyun kaboorunoikyok, si ma kimakyigei tuguuk che yaacheen, ko uu ye kimakyigei icheek miising'.

⁷ Amoegu che saaei kanamonik, ko uu alak eng' icheek; ko uu ye ki kisir keele, Ki tep ng'wony piik koamis ak koe, ak kong'eetyo kourerenso.

⁸ Amongesokse, ko uu ye ki yai alak eng' icheek, ak ki ibutyo eng' peetuut agenge eliphuusyek tiptemu ak somok.

⁹ Anan ketyem Kiptaiyat, ko uu ye kityem alak eng' icheek, ak ki par erenook.

¹⁰ Amat ong'unyng'ung'se, ko uu ye ki ing'unyng'ung'so alak eng' icheek, ak ki pek eng' ng'emindet.

¹¹ Ki yaak anyun tuguuchuuto eng' icheek si koek kaboorunet; ak ki kisir agobo kateunennyo, acheek che kagonyonjech kagesunetap kenyiisyek.

¹² Nooto anyun ingoriipkei si ma ibut, ineendet ne ibwaati kole tononi.

¹³ Ki ma namak yoomseet kobatee nooto ne imuuchi komuitae chii tugul; ago po iman Kamuktaindet ne ma chamdook keyomak kosiir ne tee ne omuuchi; ago kobooto yoomsonooto koyaei agine ooreet ne ochilile, si kobiit omuuch omuite.

¹⁴ Nooto anyun, chamanikyuk, omwee piteetap kanamonik.

¹⁵ Ang'alaali ko uu ye ang'alaaljini piik che ng'oomen; obesye kiit ne amwae.

¹⁶ Kigombetap kaberuret ne kiberuuri, ko tos ma yamdaet ne po korotiigap Kristo? Magatyat ne kibuutuli, ko tos ma yamdaet ne po poortap Kristo?

¹⁷ Amu acheek che ki piik che chaang', ko ki magatyat agenge, poorto agenge: amu ki ame acheek tugul magatyat agenge.

¹⁸ Ogeer Israel o eng' atebeetap poorto: tos ma tinyei yamdaet ak kaptisisyet icheek che amei tiseiywek?

¹⁹ Amwae nee anyun? Amwa ale kiy kiit ne kieng'jin kanamonik, anan tos kiy kanamwet?

²⁰ Ago tuguuk che igoitoi Pororyosyek koeng'jin oik, ago ma Kamuktaindet: ama mache koyai yamdaet ak oik.

²¹ Momuuchi oee kigombetap Kiptaiyat, ak kigombetap oik: momuuchi oam eng' meesetap Kiptaiyat, ak meesetap oik.

²² Anan kitache Kiptaiyat konyoor ng'etkong'? Tos ki kiimeen kosiir ineendet?

Katyaknatetap kayanindet

²³ Chamdaat tuguuk tugul; ago ma tuguuk tugul che nyolu. Chamdaat tuguuk tugul; ago ma tuguuk tugul che teeksei.

²⁴ Amat kocheeng'jigei chii chechiik ineegei, ago che po chiitap kokwennyi.

²⁵ Kiy age tugul ne ki aldoi eng' kabany, oam, amoteep kiy amu kabwaatet;

²⁶ amu po Kiptaiyat ng'wony, ak che nyiitaat ng'wony.

²⁷ Ngo kuurok age eng' icheek che ma iyani kole kobaak, ak omache obe; ko kiy age tugul anyun ne kaginde taing'wong', oam, amat oteep amu kabwaatet:

²⁸ ago ngo leenjok chii age tugul, Kagigoitoi kii koek tiseiywot, ko moam, amu ineendet ne kagoboorun, ak amu kabwaatet:

²⁹ kabwaatet ne amwae koma neng'ung', ago po age; amu kalya si korwookyi katyagennyu kabwaatet age?

³⁰ Ngot ataache eng' kongoi, ko amu nee si kemwaitaena yaityo eng' kiit ne koagoite kongoi?

³¹ Nooto anyun ngo ame, anan ngo ee, anan agot eng' kiy age tugul ne oyae, oyai tugul otoroori Kamuktaindet.

³² Amonach Yahudik anan Yunanik, anan kanisetap Kamuktaindet:

³³ agot ko uu ye aboiboi piik tugul eng' tuguuk tugul, ma cheeng'e kelunennyu aneege, ago kelunet ne po che chaang', si kobiit kesar.