1 JOHANA 5 - BUKUIT NE TILIIL Sireet ne Dutero Kanon

Kayaneet eng' Weeriitap Kamuktaindet

¹ Age tugul ne iyani kole Jeso ko Kristo kogigesich eng' Kamuktaindet: ak age tugul ne chamei ineendet ne kisichei, kochamei agine ineendet ne ki kisichei eng' ineendet.

² Kingen eng' niito keele ki chame lagogap Kamuktaindet, ye ki chame Kamuktaindet, ak keyae ng'atuutikyik.

³ Amu ni chamyetap Kamuktaindet, ale keriip ng'atuutikyik: ama nyigiisen ng'atuutikyik.

⁴ Amu age tugul ne kigesich eng' Kamuktaindet koterteeri ng'wony. Ak ni ko katerteeret ne iterteeri ng'wony, nooto kayanennyo.

⁵ Ak ng'oo ineendet ne iterteeri ng'wony, kobatee ineendet ne iyani kole Jeso ko Weeriitap Kamuktaindet?

Paornateet agobo Weeriitap Kamuktaindet

⁶ Ni ko ineendet ne ki nyo eng' peek ak korotiik, ineendet ko Jeso Kristo; ma nyo eng' peek icheegei, ki nyo eng' peek ak korotiik.

⁷ Amu mi somogu che paoryani:

⁸ Kabuuset Tiliil, ak peek, ak korotiik; ak iyanjindos chooto somogu kibagenge.

⁹ Ngot ketaache paornateetap piik, ko oo paornateetap Kamuktaindet kosiir ne po piik: amu paornateetap Kamuktaindet ko ni, keele, ki kobaoryan agobo Weeriinnyi.

¹⁰ Ineendet ne iyani Weeriitap Kamuktaindet kotinyei paornatanooto eng' ineendet: ineendet ne ma iyani Kamuktaindet ko kagoyai ineendet koek kiplembechwa; amu ma iyan paornateet ne kibaoryan Kamuktaindet agobo Weeriinnyi.

¹¹ Ak paornatanooto ko ni, keele, ki koonech Kamuktaindet saboondap koigeny, ak mi sabooniito Weeriinnyi.

¹² Ineendet ne tinyei Weeriit kotinyei saboondo: ineendet ne ma tinyei Weeriitap Kamuktaindet koma tinyei saboondo.

Ng'aleek che po let

¹³ Kasirwak tuguuchu, si kobiit onai ole otinye saboondap koigeny, okweek che oyani kainetap Weeriitap Kamuktaindet.

¹⁴ Ak ni nyiganateet ne ketinye eng' ineendet, keele ngesoom kiy age tugul ko uu magennyi, kogaseech:

¹⁵ ak ngot kingen keele kaseech eng' kiit age tugul ne kisoome, kingen keele ki tinyei tuguuk che kigesoom ineendet.

¹⁶ Ngot kogeer chii tupchennyi koyaei tengekto ne ma po meet, kosoom, si kogoochi Kamuktaindet saboondo agobo icheeget che kayai tengekto ne ma po meet. Mi tengekto ne po meet; ma mwaei ale kosoom agobo nooto.

¹⁷ Kiy age tugul ne ma po imanda ko tengek: ak mi tengekto ne ma po meet.

¹⁸ Kingen keele ma yaei tengekto chii age tugul ne kigesich eng' Kamuktaindet; ago ineendet ne kigesich eng' Kamuktaindet koriibei ineendet, ama twaei chiichooto ineendet ne ya.

¹⁹ Kingen keele ki po Kamuktaindet acheek, ak miitei ng'wony komugul eng' pounatetap ineendet ne ya.

²⁰ Ak kingen keele kigonyo Weeriitap Kamuktaindet, ak ki kogoonech kaguiyet, si kobiit kenai ineendet ne po iman, ak kemi eng' ineendet ne po iman, eng' Weeriinnyi Jeso Kristo. Niito ko Kamuktaindet ne po iman, ak saboondap koigeny.

²¹ Lagochu mengech, oistoegei kanamonik.