1 JOHANA 4 - BUKUIT NE TILIIL Sireet ne Dutero Kanon

Tyemetap maotik

¹ Chamanichu, amoyan chii age tugul, ago otyem ng'aang'et age tugul, ngot ko punu Kamuktaindet; amu ki komong'ji ng'wony maotik che chaang' che po lembech.

² Ongen eng' ni Kabuusetap Kamuktaindet. Ng'aang'et age tugul ne ng'aanyei kole ki nyo Jeso Kristo eng' poorto ko punu Kamuktaindet:

³ ak ng'aang'et age tugul ne ma ng'aanyei kole Jeso, ko ma punu Kamuktaindet. Ak niito anyun ko kirindoindetap Kristo, ne ki ogas keele nyoonei; ak nguno komiitei ng'wony.

⁴ Oo po Kamuktaindet, lagochu mengech, ak ki oterter icheek; amu oo ineendet ne mi eng' okweek kosiir ineendet ne mi ng'wony.

⁵ Po ng'wony icheeget, amu nooto anyun kong'alaali che po ng'wony, ak kogasei ng'wony `icheek.

⁶ Kiboo Kamuktaindet `acheek. Ineendet ne ingen Kamuktaindet kogaseech; ineendet ne ma po Kamuktaindet koma kaseech. Kingen eng' niito muguleldap imanit, ak muguleldap keniisyet.

Kamuktaindet ko Chamyet

⁷ Chamanichu, ongechamye: amu chamyet ko po Kamuktaindet; ak age tugul ne tinyei chamyet ko ki kosich Kamuktaindet, ak kongen Kamuktaindet.

⁸ Ineendet ne ma tinyei chamyet koma ingen Kamuktaindet; amu Kamuktaindet ko chamyet.

⁹ Kigeng'aany eng' niito chamyetap Kamuktaindet eng' acheek, keele ki koyook `Kamuktaindet Weeriinnyi ne ki kisich ineegei konyo ng'wony, si kobiit kesapchee eng' ineendet.

¹⁰ Niito chamyet, ma keele ki kicham Kamuktaindet, ago ki chamech ineendet ak koyook Weeriinnyi koek tiseiywot agobo tengekwogikyok.

¹¹ Chamanichu, amu ki chamech Kamuktaindet ko uu ni, konyaaljinech agacheek kechamye.

¹² Ma mi chii ne ki kogeer Kamuktaindet ole kigoi; ngot kechamdosi, komenyech Kamuktaindet, ak keyaei chamyennyi koek ne ititaat eng' acheek:

¹³ kingen eng' niito keele kimenye eng' ineendet ak komenyech ineendet, amu ki kogoonech keyamde kobun Kabuusennyi ne Tiliil.

¹⁴ Ak ki kegeer ak kebaoryani keele ki iyook `Kwanda Weeriit konyo koek Yetindetap ng'wony.

¹⁵ Age tugul ne ng'aanyei kole Jeso ko Weeriitap Kamuktaindet, komenyei Kamuktaindet eng' ineendet ak komenyei ineendet Kamuktaindet.

¹⁶ Ak kingen ak ki kiyan chamyet ne ting'enech Kamuktaindet; Kamuktaindet ko chamyet; ineendet ne menyei chamyet komenyei Kamuktaindet, ak komenyei `Kamuktaindet ineendet.

¹⁷ Kigeyai chamyet koek ne ititaat eng' acheek, si kobiit kesich nyiganateet eng' peetuutap kirwooget; amu ko uu ole uu ineendet, keu nooto acheek eng' ng'wonyuni.

¹⁸ Ma mi kaiyweisyet eng' chamyet: ago oonei chamyet ne ititaat kaiyweisyet, amu tinyei kaiyweisyet kergong'yet; ak ineendet ne iyweisyei koma kiyaei koek ne ititaat eng' chamyet.

¹⁹ Kichame, amu kisip kochamech ineendet.

²⁰ Ngot komwa chii kole, “Achame Kamuktaindet,” ago wechei ne tupcho, ko kiplembechwa: amu ineendet ne ma chamei ne tupcho ne ki kogeer, koma imuuchi kocham Kamuktaindet ne tomo kogeer.

²¹ Ki tinyei anyun ng'atuutyoni punu ineendet, keele ineendet ne chamei Kamuktaindet, ko ingocham ne tupcho agine.