1 JOHANA 2 - BUKUIT NE TILIIL Sireet ne Dutero Kanon

Kristo Toretindennyo

¹ Lagokyuk che mengech, asirwok tuguuchu, si moyai tengek. Ak ngot koyai chii tengek, ketinye Ne saiywech Kwanda, ineendet Jeso Kristo ne po imanda:

² ak ineendet tiseiywot ne po tengekwogikyok; ago ma po tengekwogikyok kityo, ago po komugul ng'wony agine.

³ Ak kingen eng' ni keele kingen ineendet, ngot keriibe ng'atuutikyik.

⁴ Ineendet ne mwaei kole, “Angen ineendet,” ama riibei ng'atuutikyik, ko kiplembechwet, ama mi imanit eng' ineendet;

⁵ ago ineendet ne riibei ng'olyoondennyi, ko kageyai koek ne ititaat chamyetap Kamuktaindet eng' ineendet. Kingen eng' niito keele kimi eng' ineendet:

⁶ ineendet ne mwaei kole menyei eng' ineendet konyaaljin agine kowendot ko uu ye kiga wendot ineendet.

Ng'atuutyet ne leel

⁷ Chamanichu, masirwok ng'atuutyet ne leel, ago ng'atuutyet ne po keny ne ki otinye kobooch taunet: ng'atuutyonooto po keny ko ng'olyoot ne ki ogas.

⁸ Ak kogeny, asirwok ng'atuutyet ne leel, ng'olyoot ne iman eng' ineendet ak eng' okweek, amu siirtoi mesundeito, ak kagoluu lapkeiyet ne po iman.

⁹ Ineendet ne mwaei kole mi eng' lapkeiyet, ak kowechei ne tupcho, komi eng' mesundeito agoi nguno.

¹⁰ Ineendet ne chamei ne tupcho komenyei eng' lapkeiyet, ama mi kanagutyet eng' ineendet.

¹¹ Ago ineendet ne wechei ne tupcho komi eng' mesundeito, ak kowendoti eng' mesundeito, ama naei ole wendi, amu kagotuuch mesundeito konyekyik.

¹² Asirwok lagochu mengech, amu kigenyoiywok kaat tengekwogikwok amu kainennyi.

¹³ Asirwok kwanisyechu, ama ki onai ineendet ne ki mi kobooch taunet. Asirwok murenju, amu ki oterter ineendet ne ya. Kasirwak lagochu mengech, amu ongen Kwanda.

¹⁴ Kasirwak kwanisyechu, amu ongen ineendet ne ki mi kobooch taunet. Kasirwak murenju, amu oo kiimeen, ak komenyok ng'olyootap Kamuktaindet, ak ki oterter ineendet ne ya.

¹⁵ Amocham ng'wony, anan tuguuk che mi ng'wony. Ngot kocham chii ng'wony koma mi chamyetap Kwanda eng' ineendet.

¹⁶ Amu tuguuk tugul che miitei ng'wony, mageetap poorto, ak mageetap koonyek, ak menoteetap saboondo, koma po Kwanda, ago po ng'wony.

¹⁷ Ak siirtoi ng'wony, kobooto magennyi: ago ineendet ne yaei mageetap Kamuktaindet kotebyei koigeny.

Kateunet agobo kirindoigap Kristo

¹⁸ Lagochu, ni sait ne po let: ak ko uu ye ki ogas keele tuun nyoonei kirindoindetap Kristo, agot nguno ko kagobiit kirindoigap Kristo che chaang'; kingen eng' nooto keele niito sait ne po let.

¹⁹ Kimandoi eng' olinnyo, ki ma ko chechook; amu nda ki chechook, ta kitebyei kobootech: ago ki pa, si kobiit kotook keele ki ma ko chechook tugul.

²⁰ Ak ki kiilak eng' Ineendet ne Tiliil, ak ongen okweek tugul.

²¹ Ma asirwak amu mongen imanit, kasirwak amu ongen, amu ma mi lembeita ne mang'unee imanit.

²² Ng'oo kiplembechwet? Ma ineendet ne eesyoi kole Jeso ko Kristo? Niito ko kirindoindetap Kristo, ineendet ne eesyoi Kwanda ak Weeriit.

²³ Age tugul ne eesyoi Weeriit, koma tinyei nooto Kwanda: ineendet ne ng'aanyei Weeriit kotinyei Kwanda agine.

²⁴ Ak okweek anyun, ingomenyok nooto ki ogas kobooch taunet. Ngot komenyok nooto ki ogas kobooch taunet, omenye ak okweek eng' Weeriit ak eng' Kwanda.

²⁵ Ak ni arorutyet ne ki iarorwech ineendet, nooto ko saboondap koigeny.

²⁶ Kaasirwak tuguuchu agobo icheek che machei kobeetook.

²⁷ Ak okweek anyun, komenyok kaiilet ne ki onyooru eng' ineendet, ak manyol koneetak chii; ago ko uu ye ineetook kaiilennyi agobo tuguuk tugul, ak ko po iman, ma lembech, ak ko uu ye ki konetak, omeny ineendet.

²⁸ Ak nguno anyun, lagochu mengech, omeny ineendet; si ye tuun kaging'aany ineendet, kesich nyiganateet, ama kililani eng' tainnyi eng' nyonunennyi.

²⁹ Ngot ongen ole po imanda ineendet, ongen ole age tugul ne yaei imanda kogigesich agine eng' ineendet.