1 JOHANA 1 - BUKUIT NE TILIIL Sireet ne Dutero Kanon

Ng'olyootap Saboondo

¹ Nooto ne ki mi kobooch taunet, nooto ne ki kegas, nooto ne ki kegeer eng' konyekyok, nooto ne kigesue, ak konam eunekyok, agobo Ng'olyootap saboondo,

² (ak king'ang'ak saboonooto, ak ki kegeer, ak kebaoryani, ak kiboorwok saboonooto po koigeny, ne ki mi kobooto Kwanda, ak ki king'ang'wech;)

³ nooto ki kegeer ak kegas ko nooto ne keamwok ak okweek, si kobiit osich ak okweek yamdaet kobootech; ee, miitei yamdaennyo kobooto Kwanda, ak kobooto Weeriinnyi Jeso Kristo.

⁴ Kagi sirwok anyun tuguuchuuto si kobiit kosulda poiboiyennyo.

Kamuktaindet ko lapkeiyet

⁵ Ak ni ng'olyoot ne ki kigas eng' ineendet ak keamwok, keele lapkeiyet Kamuktaindet, ama mi mesundeito eng' ineendet agot kitigin.

⁶ Ngot kemwa keele ki tinyei yamdaet kobooto ineendet ak kebendoti eng' mesundeito, kegenu, ama kiyae imanit:

⁷ ago ngot kebendote lapkeiyet, ko uu ye mi ineendet eng' lapkeiyet, keting'egei yamdaet, ak kotiliilech korotiigap Jeso Weeriinnyi eng' tengekwogikyok tugul.

⁸ Ngot kemwa keele ma ki tinyei tengek, kegenegei, ama mi imanit eng' acheek.

⁹ Ngot keng'aanye tengekwogikyok, koyanaat ak ko po imanda konyoiywech kaat tengekwogikyok, ak kotiliilech eng' kiy tugul ne ma po imanda.

¹⁰ Ngot kemwa keele tomo keyai tengek, ko kagiyai ineendet koek kiplembechwa, ama miitei ng'olyoondennyi eng' acheek.