1 ATEPTAP PEETUUSYEK 7 - BUKUIT NE TILIIL Sireet ne Dutero Kanon

Issakar

¹ Weeriigap Issakar ko ki: Tola, Pua, Jasub ak Simron, ang'wan tugul.

² Chu weeriigap Tola: Usi, Repaiah, Jeriel, Jamai, Ibsam ak Semuel, kandoigap kooriigap kwanisyekwak, che po Tola; piik che ki kiimeen che nyigoonen eng' ibinwekwak. Ki ek koiitennywa eng' peetuusyegap Daudi eliphuusyek tiptem ak aeng' ak pogol lo.

³ Weeriitap Usi ko ki: Israia. Weeriigap Israia ko ki: Mikael, Obadiah, Joel ak Isia. Ki piik muut tugul ak ko pounik.

⁴ Ki mi kobooto icheek, kweanaigap lugoosyek che kiyaei lugeet, eng' ibinwekwak, ko uu kooriigap kwanisyekwak, piik eliphuusyek sosom ak lo, amu ki tinyei kwonyiik ak weeriik che chaang'.

⁵ Kitupchosyekwak, eng' ortinwek tugul che po Issakar, piik che ki kiimeen, che nyigoonen, che kiga kiit eng' tetuutigap ibinwekwak tugul che ki kosiirto, ko ki eliphuusyek tamanwogik sisiit ak tisap.

Benjamin

⁶ Weeriigap Benjamin ko ki: Bela, Beker ak Jediael, piik somok.

⁷ Chu weeriigap Bela: Esbon, Usi, Uzziel, Jerimoth, ak Iri, piik muut. Ki kandoigap kooriigap kwanisyekwak, piik che kiimeen, che nyigoonen. Ki kiit eng' tetuutigap ibinwekwak che ki kosiirto, koek icheek eliphuusyek tiptem ak aeng' ak sosom ak ang'wan.

⁸ Weeriigap Beker ko ki: Semira, Joash, Elieser, Elioenai, Omri, Jeremot, Abijah, Anatoth ak Alemet. Chuuto tugul ko ki weeriigap Beker.

⁹ Ki kiit ko uu tetuutigap ibinwekwak che ki kosiirto, kobee ibinwekwak, kandoigap kooriigap kwanisyekwak, piik che kiimeen che nyigoonen, ak ki ek tugul eliphuusyek tiptem ak pogol aeng'.

¹⁰ Weeriitap Jediael ko ki: Bilan. Weeriigap Bilan ko ki: Jeush, Benjamin, Ehud, Kenaana, Sethan, Tarsis ak Aisaar.

¹¹ Chuuto tugul ko ki weeriigap Jediael, ko uu kandoigap kooriigap kwanisyekwak, piik che kiimeen che nyigoonen, eliphuusyek taman ak tisap ak pogol aeng', piigap pooryeet che ki imuuchi koba lugeet.

¹² Supim agine ak Hupim ko weeriigap Ir, ak Husim ko weeriigap Aher.

¹³ Weeriigap Naphtali ko ki: Jasyel, Guni, Jeser ak Shallum, weeriigap Bila.

¹⁴ Weeriigap Manasseh ko ki: Asriel, ne kisichei kwondonyi chebaigeiyandennyi.Ki sich `Chebaramindet Makir ne ki kwandap Gilead.

¹⁵ Ak ki cheeng'ji Makir osotik koyop Hupim ak Supim. Ki kiguure chepkamennywa Maaka. Ak kainetap ne po aeng' ko ki Zelophehad: ak ki sich tiibiik icheegei.

¹⁶ Ki sich weeriit Maaka kwondap Makir, ak koguuree kainennyi Peres. Ki kiguure ng'eetap kamet Seres, ak weeriikyik ko ki Ulam ak Rakem.

¹⁷ Weeriitap Ulam ko ki: Bedan. Chuuto ko ki weeriigap Gilead weeriitap Makir, weeriitap Manasseh.

¹⁸ Ki sich `chepkamennyi Hamoleket Isod, Abiezer ak Mahlah.

¹⁹ Weeriigap Shemida ko ki: Aian, Shekem, Liki ak Aniam.

Ephraim

²⁰ Chu weeriigap Ephraim: Sutela, Bered weeriinnyi, Tahat weeriinnyi, Eleada weeriinnyi, Tahat weeriinnyi,

²¹ Sabad weeriinnyi, Sutela weeriinnyi, Eser ak Elead, che ki par piigap Gath che ki kisikyi emonooto, amu, ki pwa korek kobar tuukwak.

²² Ki riir Ephraim kwandanywa peetuusyek che chaang', ak ki pwa tupchosyekyik kogaigai ineendet.

²³ Ki ituiyogei ak osotyonnyi kogeny, ak ki manach ak kosich weeriit. Kiguure kainennyi Beriah, amu ki piit kiy ne ya eng' koonnyi.

²⁴ Ki kiguure cheptonyi Seera, ne kiga teech Beth-horon ne rektoot ak ne po meto, ak Usen-seera.

²⁵ Ki weeriinnyi Repa, ak Resep, ak Tela weeriinnyi, ak Tahan weeriinnyi,

²⁶ Ladan weeriinnyi, Amihud weeriinnyi, Elisama weeriinnyi,

²⁷ Nun weeriinnyi, Joshua weeriinnyi.

²⁸ Tuguukwak, komoswekwak che ki menyei, ko ki Bethel ak nganasookyik, komostap kong'asiis Naaran, komostap cherongo Gezer, kobooto nganasookwak; Shekem agine kobooto nganasookyik, agoi Ayya ak nganasookyik.

²⁹ Ye neegitee kiwotisyegap lagogap Manasseh ko Beth-shean ak nganasookyik, Taanak ak nganasookyik, Megiddo ak nganasookyik, Dor ak nganasookyik. Ki menyei chuuto lagogap Joseph weeriitap Israel.

Asher

³⁰ Weeriigap Asher ko ki: Imnah, Isba, Isbi, ak Beriah. Zerah ko ki chepkamennywa.

³¹ Weeriigap Beriah ko ki: Heber ak Malkiel, ne ki kwandap Birsait.

³² Ki sich `Heber Japlet, Somer, Hotam, ak Sua chepkamennywa.

³³ Weeriigap Japlet ko ki: Pasak, Bimal ak Asba. Chuuto ko ki weeriigap Japlet.

³⁴ Weeriigap Semer ko ki: Ahi, Roga, Jeuba, ak Aram.

³⁵ Weeriigap Helam ng'eetap kamet ko ki: Sopa, Imnah, Seles ak Amal.

³⁶ Weeriigap Sopa ko ki: Sua, Harneper, Shual, Beri, ak Imra,

³⁷ Beser, Hod, Shammah, Silsa, Itran, ak Beera.

³⁸ Weeriigap Jeter ko ki: Jepune, Pispa ak Ara.

³⁹ Weeriigap Ula ko ki: Ara, Haniel, ak Risia.

⁴⁰ Chuuto tugul ko ki lagogap Asher, kandoigap kooriigap kwanisyekwak, piik che ki kilewen, che kiimeen che nyigoonen, che eecheen eng' pounik. Ak koitetap icheek che ki kiit kobee tetuutigap ibinwekwak che ki kosiirto si koyai lugeet, ko ki piik eliphuusyek tiptem ak lo.