1 ATEPTAP PEETUUSYEK 5 - BUKUIT NE TILIIL Sireet ne Dutero Kanon

Lagogap Reuben

¹ Weeriigap Reuben taitap Israel, (Nganda kitaita iman ineendet, ko ki imurwon itoogutap kwandanyi, ki kigoochi etunatennyi ne po sigeet weeriigap Joseph weeriitap Israel; ak ma kiit tetuutigap ibinwek che ki kosiirto kisube etunatetap sigeet.

² Nganda ki iterteeris Judah kosiir tupchosyekyik ak komang'une ineendet pounindet; ko ki punji Joseph etunatetap sigeet.)

³ Weeriigap Reuben taitap Israel ko ki: Hanok, Palu, Hesron ak Karmi.

⁴ Weeriigap Joel ko ki: Semaiah weeriinnyi, Gog weeriinnyi, Shimei weeriinnyi,

⁵ Mikah weeriinnyi, Reaiah weeriinnyi, Baal weeriinnyi;

⁶ Beera weeriinnyi, ne kiluul Tilgath-pilneser laitoryatap Assyria komut. Beera ko ki pounindetap piigap Reuben.

⁷ Chu tupchosyekyik eng' ortinwekwak, ye kingi iit tetuutigap ibinwek che ki kosiirto ko uu tilyonutikwak; ne oo, Jeiel, Zekariah,

⁸ Bela weeriitap Asas, weeriitap Shema, weeriitap Joel, ne ki menyei Aroer, agoi Nebo ak Baal-meon.

⁹ Ki meny icheek kotokyigei kong'asiis agoi ye kimandoe kebendi surkwen kobooch aineetap Yufrets, amu kitesagis tuukwak eng' emetap Gilead.

¹⁰ Ki yai lugeet icheek ak Hagrik eng' peetuusyegap Saulo, ak ki pek eng' eunekwak. Ki meny emaisyekwak eng' emet tugul eng' komostap kong'asiis ne po Gilead.

Lagogap Gad

¹¹ Ki meny weeriigap Gad kotokyin ak icheek, eng' emetap Bashan agoi Saleka:

¹² ki ne oo Joel, korup Sapam, Janai ak Sapat eng' Bashan.

¹³ Tupchosyekwak che po kooriigap kwanisyekwak ko ki: Mikael, Mesulam, Sheba, Jorai, Jakan, Sia ak Eber, tisap tugul.

¹⁴ Chuuto ko ki weeriigap Abiail weeriitap Huri, weeriitap Jaroa, weeriitap Gilead, weeriitap Mikael, weeriitap Jesisai, weeriitap Jado, weeriitap Bus.

¹⁵ Ahi weeriitap Abdiel, weeriitap Guni, pounigap kooriigap kwanisyekwak.

¹⁶ Ki meny Gadik emetap Gilead eng' Bashan, ak nganasookyik, ak emotinwek tugul che kiyagisye che po Sharon agoi kiwotosyekwak.

¹⁷ Ki kiit chuuto tugul eng' tetuutigap ibinwekwak che ki kosiirto eng' peetuusyegap Jotham laitoryatap Judah, ak eng' peetuusyegap Jeroboam laitoryatap Israel.

Kiplugotinigap pororyosyegap kong'asiis

¹⁸ Weeriigap Reuben, che po piigap Gad, kebebertap pororyetap Manasseh, che po piik che nyigoonen, murenik che ki imuuchi koip long'eet ak rotwetap chok, ak komwokse kwanget, ak kongen lugeet komyee, ko ki eliphuusyek artam ak ang'wan ak pogol tisap ak tamanwogik lo che ki imuuch komanda koba lugeet.

¹⁹ Ki yai lugeet ak Hagrik, Jetur, Napis ak Nodap.

²⁰ Ki kitoret kobargei ak icheeget, ak ki kinde Hagrik eunekwak, kobooto tugul che ki mi kobooto pichooto, amu ki riirchi Kamuktaindet komi lugeet, ak ki kas riirekwak, amu ki imang' ineendet.

²¹ Ki kweri kiyagikwak; tambeesikwak eliphuusyek konom, keechiirek eliphuusyek pogol aeng' ak konom, ak sigiroik eliphuusyek aeng'. Ki imut piik eliphuusyek pogol agenge,

²² ak ki kibar che chaang', amu ki po lugeet Kamuktaindet. Ak kimeng'iis eng' olooto kogeer icheek kot koit peetuut ne ki kiluule.

Piigap Manasseh eng' kong'asiis

²³ Ki meny emonooto lagogap kebebertap pororyetap Manasseh: kitesak kobooch Bashan agoi Baal-hermon ak Senir ak tulweetap Hermon.

²⁴ Chu ko ki kandoigap kooriigap kwanisyekwak: Epher, Isi, Eliel, Asriel, Jeremiah, Hodabiah ak Jadiel. Icheek ko ki piik che kiimeen, che nyigoonen, che taagunotiin ak kandoigap kooriigap kwanisyekwak.

²⁵ Ago ki ingelelji Kiptaiyat Kamuktaindetap kwanisyekwak ak ki ibotkei ak kanamonigap piigap emonooto, che kiga par Kamuktaindet eng' tainnywa.

²⁶ Ki ing'eet anyun Kiptaiyat Kamuktaindetap Israel Pul laitoryatap Assyria, ak Tilgath-pilneser laitoryatap Assyria, ak ki imut, piigap Reuben, piigap Gad, kebebertap pororyetap Manasseh koba emet ne ma nenywa. Ki imut koba Hala, Habor, Hara ak kot koit aineetap Gosan, agoi ra.