1 ATEPTAP PEETUUSYEK 29 - BUKUIT NE TILIIL Sireet ne Dutero Kanon

Kagoochinoik che po teekseetap Hekaluut

¹ Ki leenji `Laitoryat Daudi tuiyet tugul, “Ta ko ming'in Solomon weeriinnyu, ne ki lewen ineegei Kamuktaindet, ak kota ko etyet, ak ko oo poisyet; amu koyooto po laitoryat koma po chiito, po Kamuktaindet ne po Toroornatet.

² Ki achop anyun eng' kimnateennyu tugul, thahabu agobo tuguugap thahabu, che po kootap Kamuktaindennyu, fedha agobo tuguugap fedha, sugunonik agobo tuguugap sugunonik, kariik agobo tuguugap kariik ak keetiik agobo tuguugap keetiik; koik che kiguure soam, ak koik che kitetei, kindoi kotabon ng'wony, che po saleiywek che teerchiin, koik alak tugul che po kamanuutyet ne oo, ak koik ng'iisyat che leelach.

³ Kogeny, amu ki acham miising' kootap Kamuktaindennyu, ko uu ye atinye tuguukyuk che po thahabu ak fedha, agoochini kootap Kamuktaindennyu, che siirei tuguuk tugul che ki achopchi koot ne tiliil;

⁴ talendaisyek eliphuusyek somok che po thahabu, che po thahabu che po Opir, ak talendaisyek eliphuusyek tisap che po fedha che tiliileen, che kiliige inatusyegap kooriik,

⁵ che po thahabu agobo tuguugap thahabu, ak che po fedha agobo tuguugap fedha, ak che po poisyet age tugul che yaei musogik. Ng'oo anyun ne chamei kotabaanjigei Kamuktaindet ne Toroor eng' peetuuni?”

⁶ Ki igoito anyun eng' chamyet pounigap kooriigap kwanisyek, ak pounigap ortinwegap Israel, ak kiptainigap eliphuusyek, ak che po pogolwogik, kobooto pounik che ki pou poisyetap laitoryat.

⁷ Ki igoito agobo otisyetap kootap Kamuktaindet talendaisyek eliphuusyek muut che po thahabu kobooto kebeberwek che mengeechen eliphuusyek taman che po thahabu, talendaisyek che po fedha eliphuusyek taman, talendaisyek eliphuusyek taman ak sisiit che po sugunonik, ak che po kariik talendaisyek eliphuusyek pogol.

⁸ Chii age tugul eng' icheek ne ki tinyei koik che po kamanuutyet ne oo, ko ki igoito kinde ole kigonoree tuguugap kootap Kamuktaindet ne Toroor, koba eutap Jehiel Gersonindet.

⁹ Ki poiboitu anyun piik, amu ki igoito eng' chamyet, amu ki igoochi Kamuktaindet ne Toroor eng' muguleldo ne igesunotkei. Ki paibait agine Laitoryat Daudi eng' poiboiyet ne oo.

Komwaei Daudi kongoi

¹⁰ Ki ilas anyun `Daudi Kamuktaindet ne Toroor eng' taitap tuiyet tugul, ak ki le, “Iberuurot inyee, Kamuktaindet ne Toroor, Kamuktaindetap Israel kwandanyo, koigeny ak koigeny.

¹¹ Ee Kamuktaindet ne Toroor, neng'ung' ooindo ak kamuktaet, ak toroornatet ak katerteeret ak etunateet, amu cheguuk tuguuk tugul che mi kipsengwet ak che mi ng'wony. Neng'ung' ee Kamuktaindet ne Toroor laitornatet, ii toroorot ak ii metitap tugul.

¹² Punun mogornatosyek ak teegisto, ak ibou tugul. Mi eung'ung' kimnateet ak kamuktaet, inyee ne ieeti ak igoochini tugul kimnateet.

¹³ Ara anyun, Kamuktaindennyo, kimwaun kongoi, ak kilasu kaineng'ung' ne po toroornatet.

¹⁴ Ago aa ng'oo anee, ak nee piikyuk, kot kimuuch kigoite eng' chamyet ko uu ni? Punun tuguuk tugul, ak kagigoonin tuguuguk.

¹⁵ Amu ki toek eng' taing'ung', ak ki kiprutoinik, ko uu ye ki uu kwanisyekyok tugul. Uu peetuusyekyok eng' ng'wony urwet, ama mi ne tebyei agoi.

¹⁶ Ee Kamuktaindet ne Toroor, Kamuktaindennyo, punu eung'ung' tuguuchuuto tugul kogechop si keteegunenen koot ne po kaineng'ung' ne tiliil, cheguuk tugul.

¹⁷ Angen, ee Kamuktaindennyu ale, ityeme muguleldo, ak ibaibai eng' ne po iman. Ki agoonin tuguuchuuto tugul eng' chamyet ak lititindap muguleldanyu. Ak kaageer nguno eng' poiboiyet piiguk che mi yu kogoonin eng' chamyet.

¹⁸ Ee Kamuktaindet ne Toroor, Kamuktaindetap Abraham, ak ko po Isak, ak ko po Israel, kwanisyekyok, riip ng'olyoondoniito koigeny eng' kabwaatutik che ibwaati mugulelwegap piiguk, ak ichopchigei mugulelwekwak.

¹⁹ Ak igoochi weeriinnyu Solomon muguleldo ne ititaat, si koriip ng'atuutiguk, paornatosyeguk ak kaneetisyosyeguk, koyai chuuto tugul, ak koteech kootap laitoryat, ne ki achopchi tuguuchuuto.”

²⁰ Yeityo koleenji `Daudi tuiyet tugul, “Olasu Kamuktaindet ne Toroor Kamuktaindeng'wong'.” Ak ki ilas tuiyet komugul Kamuktaindet ne Toroor, Kamuktaindetap kwanisyekwak, ki ing'uruuk ak kogutung'ji Kamuktaindet ne Toroor, ak laitoryat.

²¹ Eng' peetuut ne po aeng' ko ki eeny tiseiywek koeng'ji Kamuktaindet ne Toroor, ak kogoochi Kamuktaindet ne Toroor kagoochinoik che kibeelei, eiik eliphuut, mengichik eliphuut ak aaregap keechiir eliphuut, kobooto kagoochinoikwak che kieei, ak koroseek ng'iisyat che po Israel tugul.

²² Ki amis ak koeeiso icheek eng' taitap Kamuktaindet ne Toroor eng' peetuunooto eng' kagasetapkei ne oo. Ki yai Solomon weeriitap Daudi koek laitoryat kogeny, ak koiil ineendet eng' taitap Kamuktaindet ne Toroor koek pounindet ak koiil Zadok koek tisiindet.

²³ Ki tebee anyun Solomon ng'echereetap laitornatet ne po Kamuktaindet ne Toroor koek laitoryat, kogeer Daudi kwandanyi. Kibor ineendet ak ki kas iit Israel tugul ineendet.

²⁴ Ki kas iit pounik tugul ak piik che kiimeen, kobooto weeriik tugul che po Laitoryat Daudi, Laitoryat Solomon.

²⁵ Ki ieet `Kamuktaindet ne Toroor Solomon miising' eng' taitap Israel tugul, ak kogoochi ineendet etunatetap laitornatet ne kitom kigoochi laitoryat age tugul eng' Israel ne ki indoune ineendet.

Meetap Daudi

²⁶ Ki laitoran Daudi anyun weeriitap Jesse eng' Israel tugul.

²⁷ Ki laitoran eng' Israel kenyiisyek artam; ki laitoran eng' Hebron kenyiisyek tisap ak kolaitoran eng' Jerusalem kenyiisyek sosom ak somok.

²⁸ Ki ilil, ko kagoyam peetuusyekyik, mogornatosyek ak teegisto. Ki laitoran Solomon weeriinnyi kogeer ineendet.

²⁹ Ak poisyonigap Laitoryat Daudi, che po tai ak che po let, ko siraatiin eng' kitabuutap Samuel keerindet, ak kitabuutap Nathan maotyot ak eng' kitabuutap Gad keerindet,

³⁰ kobooto laitornatennyi tugul ak kimnateennyi, ak peetuusyegap sabeennyi, ak che po Israel, ak che po laitornatosyek tugul che po emotinwek.