1 ATEPTAP PEETUUSYEK 28 - BUKUIT NE TILIIL Sireet ne Dutero Kanon

Teteetap Daudi agobo Hekaluut

¹ Ki iyum `Daudi pounik tugul che po Israel eng' Jerusalem, kobooto pounigap ortinwek, kiptainigap kweanaik che kiboisyechin laitoryat eng' riipseet, kiptainigap eliphuusyek, kiptainigap pogolwogik ak pounik che ki pou tuguuk tugul che po laitoryat, ak che po weeriikyik, kobooto kiptainik, piik tugul che kiimeen ak che nyigoonen.

² Ki tonon anyun Laitoryat Daudi ak kole, “Ogasa, tupchosyekyuk ak piikyuk. Ki mi muguleldanyu ateech koot ne imuung'ee moingetap arorutyetap Kamuktaindet ne Toroor, ak ng'echereet ne tebee keelyegap Kamuktaindennyo, ak ki achop tuguuk che po teekseet.”

³ Ago ki leenjo Kamuktaindet, “Meteekyini koot kainennyu, amu ii chiitap lugeet ak ki itumde korotiik.”

⁴ Ago ki lewena Kamuktaindet ne Toroor, Kamuktaindetap Israel, eng' koot komugul ne po kwandanyu aek laitoryat eng' Israel koigeny. Ki lewen Judah koek pounindet, ak ki paibait eng' anee, eng' kootap Judah, ne kootap kwandanyu, ak eng' weeriigap kwandanyu; ak koyaa aek laitoryat eng' Israel tugul.

⁵ Ki lewen Solomon weeriinnyu eng' weeriikyuk tugul, (amu kigogoono Kamuktaindet ne Toroor weeriik che chaang',) kotebee ng'echereetap laitornatetap Kamuktaindet ne Toroor koboi Israel.

⁶ Ki mwaiwo kole, “Teechei Solomon weeriing'ung' koonnyu ak seremusyekyuk, amu ki alewen ineendet koek weeriinnyu, ak aegu kwandanyi.

⁷ Agimiiti laitornatennyi koigeny, ngot koyai kotugul ng'atuutikyuk ak kirwoogutikyuk, ko uu rani.”

⁸ “Ara anyun nguno, eng' taitap Israel tugul, tuiyetap Kamuktaindet ne Toroor ak kogasei Kamuktaindennyo: Oriip ak ocheeng' ng'atuutik tugul che po Kamuktaindet ne Toroor Kamuktaindeng'wong', si kobunjook emoni karaaran ak obagakyi lagokwok koek porotennywa koigeny.

⁹ “Nai anyun inyee Solomon weeriinnyu, Kamuktaindetap kwandang'ung', ak iboisyechi ineendet eng' muguleldo ne ititaat, ak eng' kabwaatutik che tinyei chameet, amu isyachi Kamuktaindet ne Toroor mugulelwek tugul ak koguitos kabwaatutik tugul che po metit. Ngot icheeng' ineendet, inyooru; ago ngot imete ineendet, kowiirtoin koigeny.

¹⁰ Riipkei anyun; amu ki kolewenin Kamuktaindet ne Toroor iteech koot ne po ole-tiliil. Kimitu anyun ak iteech.”

¹¹ Yeityo kogoochi `Daudi Solomon weeriinnyi kergeindap keterut, ak ne po kooriik che tilaatiin, ne po ole kigonoree tuguuk, ne po kooriik che po parak, ne po kooriik che po oriit ak ne po kerwetap rireenet.

¹² Ki igoochi ineendet kergeindap tuguuk tugul che ki iboorchi agobo seremusyegap kootap Kamuktaindet ne Toroor, kooriik tugul che ki kiyieme, che po ole kigonorisye eng' kootap Kamuktaindet, kobooto che po ole kigonoree tuguuk che itabaanatiin.

¹³ Ki igoochi kogeny pcheutigap riipsosyegap Tisiik ak Lawiik, ne po poisyet tugul ne po otisyetap kootap Kamuktaindet ne Toroor ak ne po tuguuk tugul che kiboisyee eng' kootap Kamuktaindet ne Toroor.

¹⁴ Ki igoochi karagendoetap thahabu ngebiman ne po tuguuk che po thahabu, ak tuguuk che po poisyet age tugul, ak karagendoetap fedha che po tuguuk tugul che po fedha ngebiman, che po tuguuk tugul che po poisyet age tugul.

¹⁵ Ki igoochi kogeny ole tee thahabu che po keelyegap tait, che po taisyekyik ngebiman ak che po keeldo age tugul ne po tait, ole tee tuguuk che po fedha che po tait age tugul ak taisyekyik, keeldo age tugul ne po fedha ngebiman, ko uu poisyetap keeldo age tugul ne po tait,

¹⁶ ak thahabu ngebiman che po mesosyegap magatinigap kabartaet che po meset age tugul; ak fedha che po mesosyegap fedha;

¹⁷ ak kariik che kirutunee panyeek, ak taabook, ak kigombok, che po thahabu che tiliileen tugul: ak che po taaboogap thahabu ngebiman, ko po taabeet age tugul; ak che po taaboogap fedha ngebiman, ko po taabeet age tugul;

¹⁸ ak thahabu che tiliileen ngebiman che po kapkorosuut ne kibeelee nyamdutik. Ki igoochi kora thahabu che po kergeindap chepkichutit, chooto kerubisyek che kiuito kebebaikwak si kouur moingetap arorutyetap Kamuktaindet ne Toroor.

¹⁹ Ki kigoono aguiyo chuuto tugul eng' siruutik kobun eutap Kamuktaindet ne Toroor, poisyonik tugul che po kergeini.

²⁰ Ki leenji `Daudi Solomon weeriinnyi, “Kimitu nyiganitu, ak iyai poisyet. Meiywei anan itoptoben, amu mi kobooten Kamuktaindet ne po Toroornatet, ineendet Kamuktaindennyu. Mabagaaktoin anan kometen agoi kogeskei poisyet tugul ne po otisyetap kootap Kamuktaindet ne Toroor.

²¹ Keero, mi riipsosyegap Tisiik ak Lawiik agobo otisyet tugul ne po kootap Kamuktaindet, ak mi kobooten eng' poisyet age tugul chii age tugul ne chamei ak ko utaat, agobo otisyet age tugul. Kase iit ng'atuutyeng'ung' komyee kiptainik ak piik tugul.”