1 ATEPTAP PEETUUSYEK 26 - BUKUIT NE TILIIL Sireet ne Dutero Kanon

Riibiigap Hekaluut

¹ Pcheutigap riibiigap kurgotik che kiwoljinge ko: che po Koraik ko ki: Meselemya weeriitap Kore, che po weeriigap Asaph.

² Ki tinyei weeriik Meselemya, Zekariah taita, Jediael ne po aeng', Sebadia ne po somok, Jatniel ne po ang'wan,

³ Elam ne po muut, Jeohanan ne po lo, ak Eliehenai ne po tisap.

⁴ Ki tinyei weeriik Obed-edom; Semaiah taita, Jeosabad ne po aeng', Joah ne po somok, ak Sakar ne po ang'wan, Nethanel ne po muut.

⁵ Amiel ne po lo, Issakar ne po tisap, Peuletai ne po sisiit. Ki iberuur `Kamuktaindet ineendet.

⁶ Ki kisikyi weeriik Semaiah agine, che ki pou kootap kwandanywa; amu ki piik che kiimeen che nyigoonen.

⁷ Weeriigap Semaiah ko ki: Otni, Repael, Obed, ak Elsabad. Ki piik che ki nyigoonen tupchosyekwak, Elihu ak Semakia.

⁸ Chuuto tugul ko ki weeriigap Obed-edom, piik che kiimeen eng' otisyennywa kobooto weeriikwak ak tupchosyekwak, ki piik tamanwogik lo ak aeng' tugul.

⁹ Ki tinyei Meselemya weeriik ak che tupcho, piik che nyigoonen, taman ak sisiit.

¹⁰ Ki tinyei Hosah agine, ne po lagogap Merari, weeriik; ki ne oo Shimri, (nganda ki ma ko taita ineendet, ko ki yai kwandanyi ineendet koek ne oo;)

¹¹ Hilkiah ne po aeng', Tebalia ne po somok, Zekariah ne po ang'wan. Ki taman ak somok weeriik tugul che po Hosah kobooto tupchosyekyik.

¹² Ki mi eng' chuuto pcheutigap piik che ki riibei kurgeet, piik che eecheen, kotinyei riipsosyek che uu che po tupchosyekwak, si kobois eng' kootap Kamuktaindet ne Toroor.

¹³ Kiseer parbareek kogergeit, piik che mengeechen ak che eecheen, kobee kooriigap kwanisyekwak, agobo ormariichet age tugul.

¹⁴ Ki punji parbaryat ne kitokyigei kong'asiis Selemya. Yeityo koseer parbareek agobo Zekariah weeriinnyi, ne ki kirwoogindet ne ng'oom; ak ki mong' parbaryandennyi kotokyigei murot kaataam.

¹⁵ Ki po Obed-edom ne kitokyigei murot tai, ak ki punji weeriikyik koot ne kigonoree tuguuk.

¹⁶ Ki punji Supim ak Hosah ne kitokyigei cherongo, ole neegitee ormariichetap Saleket, eng' ole kitogostoe, kotokyindos riibiik.

¹⁷ Ki mi Lawiik lo komostap kong'asiis, komi ang'wanu komostap murot kaataam peetuut age tugul, komi komostap murot tai ang'wanu peetuut age tugul, ak ki aeng' aeng' che po koot ne kigonoree tuguuk.

¹⁸ Ki mi piik ang'wanu ye kitogostoe eng' Parbar, komostap cherongo, komi aeng' Parbar.

¹⁹ Chuuto ko ki pcheutigap riibiigap kurgotik eng' weeriigap Koraik, ak weeriigap Merari.

Poisyonik alak che po Hekaluut

²⁰ Ak eng' Lawiik, ko ki riibei Ahija tuguuk che po ole kigonoree tuguuk che po kootap Kamuktaindet, kobooto tuguuk che itabaanatiin.

²¹ Weeriigap Ladan: weeriigap Gershonik che po Ladan, kandoigap kooriigap kwanisyek che po Ladan Gersonindet, ko Jeieli.

²² Weeriigap Jeieli ko ki: Setam ak Joel ng'eetap kamet, ak ki pou icheek ole kigonoree tuguugap kootap Kamuktaindet ne Toroor.

²³ Che po Amramik, che po Isarik, che po Hebronik, che po Usyelik:

²⁴ ak ki pou Sebuel weeriitap Gershom, weeriitap Musa, ole kigonoree tuguuk.

²⁵ Ak tupchosyekyik eng' ooreetap Elieser: ki sich `Elieser Reabia weeriinnyi, Jesaia weeriinnyi, Joram weeriinnyi, Zikri weeriinnyi, ak Selomot weeriinnyi.

²⁶ Ki pou Selomot ak tupchosyekyik ole kigonoree tuguuk tugul che itabaanatiin, che kiga kotabaan Laitoryat Daudi, kobooto kandoigap kooriigap kwanisyek, kiptainigap eliphuusyek ak che po pogolwogik, ak kiptainigap lugeet.

²⁷ Ki itabaan kebeberyat eng' tuguuk che ki kibooru eng' lugoosyek, si keteege ole ki kobutok eng' kootap Kamuktaindet ne Toroor.

²⁸ Ki pou Selomot ak tupchosyekyik tuguuk tugul che kiga kotabaan Samuel keerindet, ak Saulo weeriitap Kish, ak Abner weeriitap Ner, ak Joab weeriitap Zeruiah.

Poisyetap Lawiik alak

²⁹ Eng' che po Isarik kogiyaei Kenania ak weeriikyik poisyonigap saang' che po Israel, koek kiptainik ak kirwoogik.

³⁰ Eng' Hebronik, kogiriibei Asabia ak tupchosyekyik, icheeget piik che nyigoonen, piik eliphuut agenge ak pogol tisap, Israel eng' Jordan pitoniin komostap cherongo; agobo poisyonik tugul che po Kamuktaindet ne Toroor ak otisyetap laitoryat.

³¹ Eng' che po Hebronik, ko ki Jerija ne oo, ko uu ibinwekwak ak eng' kooriigap kwanisyek. Ki kicheeng' pichooto eng' kenyiitap artam ne po laitornatetap Daudi, ak ki piit eng' icheek piik che kiimeen che nyigoonen eng' Jaser ne po Gilead.

³² Ki ek tupchosyegap Jerija, piik che nyigoonen, eliphuusyek aeng' ak pogol tisap, kandoigap kooriigap kwanisyek, che ki inde Laitoryat Daudi koboi piigap Reuben, ak Gadik, ak kebebertap pororyetap Manasseh, agobo kiy age tugul ne tokyingei Kamuktaindet ak ng'aleegap laitoryat.