1 ATEPTAP PEETUUSYEK 24 - BUKUIT NE TILIIL Sireet ne Dutero Kanon

Poisyonigap tisiik

¹ Ki chu pcheutigap weeriigap Aron. Weeriigap Aron ko ki: Nadap, Abiu, Eleazar, ak Ithamar.

² Ago ki pek Nadap ak Abiu kotom kome kwandanywa, ama sich lagok. Kibois anyun Eleazar ak Ithamar eng' tiseinateet.

³ Ak kipchei Daudi ak Zadok, eng' weeriigap Eleazar, ak Ahimelek, eng' weeriigap Ithamar, kopchei icheek ko uu koiitennywa eng' poisyennywa.

⁴ Kibiitune pounik che chaang' weeriigap Eleazar kosiir che po weeriigap Ithamar; ki kipchei ko uu ni: ki ek taman ak lo che po weeriigap Eleazar kandoigap kooriigap kwanisyek ak ki ek sisiit che po weeriigap Ithamar ko uu kooriigap kwanisyekwak.

⁵ Ki kipchei anyun ko uu ni eng' parbareek, chu ak chu kogergeit; amu kimi pounik che po ole-tiliil, ak pounik che po Kamuktaindet, ki po tuwai weeriigap Eleazar ak weeriigap Ithamar.

⁶ Ki kigoochi Semaiah weeriitap Nethanel, ne ki po Lawiik, koek siriindet, ne sirisyei icheek eng' taitap laitoryat, pounik, Zadok tisiindet, Ahimelek weeriitap Abiathar, kobooto kandoigap kooriigap kwanisyek che po Tisiik ak che po Lawiik. Ki kinam koot age ne po kwanisyek kobunji Eleazar, kenam age kobunji Ithamar.

⁷ Ki mong' parbaryat ne po tai kobunji Jehoiarib, kobunji ne po aeng' Jedaiah.

⁸ Ki punji ne po somok Harim, kobunji ne po ang'wan Seorim.

⁹ Ki punji ne po muut Malkija, kobunji ne po lo Mijamin.

¹⁰ Ki punji ne po tisap Hakos, kobunji ne po sisiit Abijah.

¹¹ Ki punji ne po sogool Jeshua, kobunji ne po taman Shekaneiah.

¹² Ki punji ne po taman ak agenge Eliasib, kobunji ne po taman ak aeng' Jakim.

¹³ Ki punji ne po taman ak somok Hupa, kobunji ne po taman ak ang'wan Jesebeap.

¹⁴ Ki punji ne po taman ak muut Bilga, kobunji ne po taman ak lo Imer.

¹⁵ Ki punji ne po taman ak tisap Hesir, kobunji ne po taman ak sisiit Hapises.

¹⁶ Ki punji ne po taman ak sogool Petaia, kobunji ne po tiptem Jeskel.

¹⁷ Ki punji ne po tiptem ak agenge Jakin, kobunji ne po tiptem ak aeng' Gamul.

¹⁸ Ki punji ne po tiptem ak somok Delaiah, kobunji ne po tiptem ak ang'wan Maasia.

¹⁹ Niito ko ki koitennywa eng' poisyennywa, kobwa kootap Kamuktaindet ne Toroor ko uu ng'atuutyet ne ki kigoochi icheek eng' kwandanywa Aron, ko uu ye kiga ng'at ineendet Kamuktaindet ne Toroor, Kamuktaindetap Israel.

Kandoigap Lawiik eng' kooriikwak

²⁰ Chu che kiga ng'et che po weeriigap Lawi: che po weeriigap Amram, ko ki Subael ak che po weeriigap Subael, ko ki Jedaiah.

²¹ Che po Reabia: che po weeriigap Reabia, ko ki Isia ne oo.

²² Che po Isarik, ko ki Selomot ak che po weeriigap Selomot, ko ki Jahat.

²³ Weeriigap Hebron ko ki Jeria ne oo, Amariah ne po aeng', Jahasyel ne po somok ak Jekameam ne po ang'wan.

²⁴ Weeriigap Uzziel ko ki Mikah ak che po weeriigap Mikah ko ki Samir.

²⁵ Ng'eetap kametap Mikah ko ki Isia. Kandoindet eng' weeriigap Isia ko ki Zekariah.

²⁶ Eng' weeriigap Merari ko ki Mali ak Musi, ak eng' weeriigap Jaasia ko ki Beno.

²⁷ Eng' weeriigap Merari che ki sich Jaasia, ko ki Beno, Soham, Sakur, ak Ibri.

²⁸ Che po Mali ko ki Eleazar, ne ki ma sich weeriik.

²⁹ Eng' che po Kish kandoindet ko ki Jerameel.

³⁰ Eng' weeriigap Musi ko ki: Mali, Eder, ak Jerimoth. Chuuto ko ki weeriigap Lawiik ko uu kooriigap kwanisyekwak.

³¹ Kiser chuuto ak icheek parbareek ko uu tupchosyekwak weeriigap Aron eng' taitap Laitoryat Daudi, Zadok, Ahimelek, ak kandoigap kooriigap kwanisyek che po Tisiik ak che po Lawiik. Ki kiyai kooriigap kwanisyegap che eecheen eng' icheek kogergeit ak che po tupchennyi ne ming'in.