1 ATEPTAP PEETUUSYEK 23 - BUKUIT NE TILIIL Sireet ne Dutero Kanon

¹ Ye kiga koosit Daudi ak kiga kochang'a peetuusyekyik, ko ki yai Solomon weeriinnyi koek laitoryat koboi Israel.

Poisyetap Lawiik

² Ki iyum pounik tugul che po Israel, kobooto Tisiik ak Lawiik.

³ Ki kiit Lawiik kobooch che po kenyiisyek sosom ak che siirei, ki ek koiitennywa eliphuusyek sosom ak sisiit, ko kagiit chiito agenge agenge.

⁴ Ki tononjin poisyetap kootap Kamuktaindet ne Toroor eliphuusyek tiptemu ak ang'wan eng' pichooto; ak ki eliphuusyek lo kiptainik ak kirwoogik.

⁵ Ki eliphuusyek ang'wan riibiigap kurgotik ak ki ilasu Kamuktaindet ne Toroor eliphuusyek ang'wanu eng' kibugandinik che ki ayae anee, si kilasune Kamuktaindet ne Toroor.

⁶ Kipchei `Daudi icheek, kopchechi poisyonik kobee weeriigap Lawi: Gerson, Kohat, ak Merari.

⁷ Che po Gerson ko ki Ladan ak Shimei.

⁸ Weeriigap Ladan: ne oo ko ki Jehiel, Setam ak Joel, ki somok tugul.

⁹ Weeriigap Shimei ko ki: Selomot, Hasyel, ak Haran, piik somok. Chuuto ko ki kandoigap kooriigap kwanisyek che po Ladan.

¹⁰ Ak weeriigap Shimei ko ki: Jahat, Sina, Jeush, ak Beriah. Chuuto ang'wan ko ki weeriigap Shimei.

¹¹ Ki ne oo Jahat ak ne po aeng' ko Sia, ago ki ma kotinyei weeriik che chaang' Jeush ak Beriah; koek anyun icheek koot agenge ne po kwanisyek.

¹² Weeriigap Kohat ko ki: Amram, Itshar, Hebron ak Uzziel, piik ang'wan.

¹³ Weeriigap Amram ko ki: Aron ak Musa. Ki kitabaan Aron, ineendet ak weeriikyik koigeny, si kotabaan ineendet tuguuk che tiliileen miising', si kobeelei nyamdutik eng' taitap Kamuktaindet ne Toroor, koboisyechi ineendet ak koberuuris eng' kainennyi koigeny.

¹⁴ Ago ki kiitito weeriigap Musa chiitap Kamuktaindet, ooreetap Lawi.

¹⁵ Weeriigap Musa ko ki: Gershom ak Elieser.

¹⁶ Ne ki oo eng' weeriigap Gershom ko ki Sebuel.

¹⁷ Ki tinyei `Elieser Reabia, weeriit ne ki ineegei, ago ki sich `Reabia weeriik chaang' miising'.

¹⁸ Weeriigap Itshar: ne oo ko ki Selomit.

¹⁹ Weeriigap Hebron: ne oo ko ki Jeria, ne po aeng' ko Amariah, ne po somok ko Jahasyel, ak ne po ang'wan ko Jekameam.

²⁰ Weeriigap Uzziel: ne oo ko ki Mikah, ak ne po aeng' ko Isia.

²¹ Weeriigap Merari ko ki: Mali ak Musi. Weeriigap Mali ko ki: Eleazar ak Kish.

²² Kime Eleazar ama sich weeriik, ki sich tiibiik kityo: ak ki itun icheek tupchosyekwak weeriigap Kish.

²³ Weeriigap Musi ko ki: Mali, Eder, ak Jerimoth, ki somok.

²⁴ Chuuto ko ki weeriigap Lawi ko uu kooriigap kwanisyekwak, kandoigap kooriigap kwanisyegap icheeget che ki kiit, kobee koitetap kainaik, ko kagiit chiito agenge agenge, kobooch che po kenyiisyek tiptem ak che siirei che ki yai poisyetap otisyetap kootap Kamuktaindet ne Toroor.

²⁵ Amu ki le Daudi, “Kogogoochi Kamuktaindet ne Toroor, Kamuktaindetap Israel piikyik kamuung'et ak menyei ineendet Jerusalem koigeny,

²⁶ ma koiboti Lawiik koot ne kituiyechin kobooto tuguukyik tugul che po poisyennyi.

²⁷ Amu ki kiit weeriigap Lawi eng' ng'aleegap Daudi che po let, kobooch che po kenyiisyek tiptem ak che siirei.

²⁸ Amu kiboisyennywa koboisyechi weeriigap Aron agobo poisyetap kootap Kamuktaindet ne Toroor, eng' seremusyek, ak eng' kooriik che po oriit, ak eng' kaanyinyetap tuguuk tugul che tiliileen, poisyetap otisyetap kootap Kamuktaindet;

²⁹ agobo magatinigap kabartaet ak icheek, ak peek che ng'ootiin che tambulul che po kagoochinetap peek, ngo che po magatiinik che ma kinde mermereek anan che kigelei eng' taabeet, anan che kinuuri, ak eng' tuguuk alak tugul che kigerisye ak che teerchiin eng' ooindo.”

³⁰ Ki tonondos karonet age tugul koweekyin Kamuktaindet ne Toroor kongoi ak kolasu ineendet, ak ko uu nooto agine koskoleny,

³¹ ak kogoochi Kamuktaindet ne Toroor kagoochinoik tugul che kibeelei eng' sabatoisyek ak ye kaleel arawet, ak eng' igoorwek che ki king'at, eng' koiitennywa ko uu ng'atuutyet ne ki king'at agobo icheek, eng' peetuusyek tugul eng' taitap Kamuktaindet ne Toroor.

³² Si koriipso eng' riipseetap emait ne kituiyechin, ak riipseetap ole-tiliil, ak riipseetap weeriigap Aron tupchosyekwak, agobo otisyetap kootap Kamuktaindet ne Toroor.